خرجت أوقع النظام عشان ....

خرجت أوقع النظام عشان ، كنت بدأت أشوف الناس حواليا بتتحول لمسوخ ..

خرجت أوقع النظام عشان ، أوفر أجواء نقية أعرف أفنّ فيها ..

خرجت أوقع النظام عشان ، مسخّرش كتاباتي ومسرحياتي كلها في انتقاد السلبيات ، ومواجهة المجتمع بمشاكله وأبدأ اتوحد - أنا واللي حواليا - مع الكون ..

خرجت أوقع النظام عشان ، أشمت في ممتاز القط ..

خرجت أوقع النظام عشان ، (مصلحتي) مكانتش (أولاً) يا ولاد الكدابة يا حرامية ..

خرجت أوقع النظام عشان ، ابني ومراتي - اللي لسه معرفهمش - صعبوا عليا !

خرجت أوقع النظام عشان ، أحمد نظيف مكانش بيبطل يطول ..

خرجت أوقع النظام عشان ، أول ما اتخرج أشتغل علطول ..

خرجت أوقع النظام عشان ، أوفر لنفسي حياة كريمة وأرفع راس مصر ..

خرجت أوقع النظام عشان ، عشان الناس تقرا وتشتري كتب ..

خرجت أوقع النظام عشان ، ميزانيات مسرحياتي في وزارة الثقافة متتسرقش ، ونتيجة المهرجانات متتكوّسش ..

خرجت أوقع النظام عشان ، أرفع القبعة لـ نجيب سرور وفؤاد حداد ونجيب محفوظ وأمل دنقل وصلاح جاهين والشيخ إمام وأقولهم : احنا اهو .. اهو .. شايفيننا ؟

خرجت أوقع النظام عشان ، لوحات فاروق حسني كانت بتتعرض مقلوبة مهما عدلوها على فكرة !

خرجت أوقع النظام عشان ، إخواتي يمشوا في الشوارع مطمنين..

خرجت أوقع النظام عشان ، حياتي الباقية ، والقط اللي خرج نادماً مثلاً ..

خرجت أوقع النظام عشان ، أأمن من الخوف ، وأعيش الحياة ، ويبطلوا يعاملوني على إني متهم حتى تثبت إدانتي ..

خرجت أوقع النظام عشان ، أعرف إن الأمريكان إن اللي بيدفعوا فلوس عشان يتفرجوا عليه عندهم في هوليود - بيحصل عندنا في الشارع عادي يعني !

خرجت أوقع النظام عشان ، عشان أفضل طول عمري محتار : هي الشوارع في بلدنا أنضف وللا النفوس ؟

خرجت أوقع النظام عشان ، دي مش (بلدهم يا عم)

خرجت أوقع النظام عشان ، نبطل نقول "دستور يا أسيادنا" لأن احنا أسياد الدستور ..

خرجت أوقع النظام عشان ، عشان الإعلام ينضف ، وحمدي قنديل وهيكل يطلعوا ع القناة الأولى ..

خرجت أوقع النظام عشان ، أعرّف النظام إن كان هو اللي علّم الرُخ يبيض ، فاحنا اللي علمنا النسر يصيد !

خرجت أوقع النظام عشان ، أعرف أهلي وعيلتي إننا مش "أبناء الصمت" وإنه : في بيتنا رجل !

خرجت أوقع النظام عشان ، مصر اتأخرت في إنها تبقى دولة عظمى .. يدوب كده

خرجت أوقع النظام عشان ، كنت باخد المنصورة كلها مشي على رجليا لأن المواصلات زبالة وانا خلقي ضيق الصراحة ..

خرجت أوقع النظام عشان ، متهيألي إن ده وقت عمرو سلامه وحمزة نمرة ومحمد وخالد دياب ومحمد أسامه ينفذوا خطتهم الفنية والثقافية ويبنوا عقول ووجدان أمة .. وعشان موقعي جنبهم ..

خرجت أوقع النظام عشان ، نقدر نعمل كرنفالات في الشارع زي ما عملنا وتسحرنا ريحة الحرية الحقيقية وإحساس إن البلد دي ملكي !

خرجت أوقع النظام عشان ، أقول للمونديال : احنا صفر يا ابن الوارمة ؟

خرجت أوقع النظام عشان ، أقول لإسرائيل .. جايينلك يا روح أمك

خرجت أوقع النظام عشان ، أقول لـ أحمد خالد توفيق وعمرو خالد وكل حد زيهم راهن على جيلنا : تكسب يا برنس !

خرجت أوقع النظام عشان ، المصري يقف على قمة إفرست ويقول للكون : أنا بابا ياله !





وإنت .. خرجت توقع النظام عشان إيه ؟



أحمد صبري غباشي