الجنس الثالث Quotes

“الإرادة ! الإرادة !. قعدنا أجيال نحلم بالإرادة،ونخطب،ونكتب ونقول،ونمجد في الإرادة لما قدسناها،وبقت كلمة السر اللي لو وصلنلها،حتحل مشاكل البشرية.والمشكلة مش هي قوة الإرادة،المشكلة هي هدف الإرادة،ماذا تريد؟ أهم مليون مرة من كيف تريد ؟”
― يوسف إدريس, الجنس الثالث

“احنا مش بنحب بأحلامنا ، احنا بس بنحلم بحرمانا ، إنما لما نحب بنحب بحقيقتنا.”
― يوسف إدريس, الجنس الثالث

“الفرق بين اللي بيصنعوا التاريخ واللي بيتفرجوا عليه، اللي بيغيروا الحياة واللي بيعيشوا الحياة، إن دِكَهُم ناس عندهم القدرة والطاقة على الحب النادر، اللي بيخلق الإرادة النادرة اللي بتستحضر في الإنسان قوة غير عادية، بتقدر تِسَّخر فيه كل نبضة وكل فكرة، وكل ذرة وحركة، لخدمة الهدف اللي عايزين يحققوه. الناس اللي بيقدروا يحبوا لآخر مدى، لحد الجنون والهوس، يحبوا من غير ما يحسبوا ولا يفكروا ولا يدخروا انفعال.”
― يوسف إدريس, الجنس الثالث

“نارة: أنا مش بانتحر في لحظة يأس، وبموتي ما باضيعشي حاجة، أنا ما قررتش أموت إلا لما انتهى كل شيء وضاعت الفرصة الأخيرة وفشلت معاك، وأنا ما اقدرشي أعيش أتسول أمل.

آدم: تتسولي أمل؟ أنا حتجنن. تتسولي ازاي؟ الأمل موجود طول ما انتِ عايشة، ولازم تعيشي عشان ما يموتشي. المهم تعيشي، حياتك هي الأمل، مجرد حياتك أمل.

نارة: (بضعفٍ أكثر) أهو دا السراب اللي بتضحكوا بيه على نفسكم عشان ما تواجهوش الحقيقة، وبالذات لما الحقيقة بتبقى اليأس، لو تيأسوا مرة يأس حقيقي تواجهوه وتبقوا مسئولين عنه، أشْرَف لكم ألف مرة من حياة ذليلة جبانة بتهربوا فيها حتى من مسئولية اليأس.”
― يوسف إدريس, الجنس الثالث

“الدنيا ما بيضيعهاش إلا الناس اللي زيكم، الطموحين جدًا، اللي حاطين قدام عينيهم أكبر وأعظم أهداف، مش عشان تتحقق، إنما عشان يا هما يحققوها، يا عنها ما اتحققت، عشان هما اللي يركَبوها ويسخروها. أنا قرفانة، منك، ومن كل اللي زيك، قرفانة من الناس اللي أكتر مِ الناموس اللي الحياة عندهم هي إنهم يعيشوا وبس، مش مهم ازاي، إنما المهم إنهم يفضلوا موجودين، يتلزقوا على قفاهم مش مهم، يعيشوا زي الدود ميجراش حاجة، ييجوا للدنيا بالملايين ويقضوا العمر على قد ما يقضوه ويسيبوها وكأنهم ما كانوا، لا اتغير حاجة فيهم، ولا غيروا في الدنيا حاجة، إذا كنتم إنتم الأحياء، فالموت أنظف وأشرف وأنبل ودليل حياة أنصع.”
― يوسف إدريس, الجنس الثالث