صورة يوسف Quotes

“يوسف
إيَّاك أن تُعرض عن الليل والغُنا فـ وسط المدينة
أول فُصول الملحمة الغربة
فاسطُر قصيدتك بالرحيل”
― أحمد مدره, صورة يوسف

“الأنبيا
مش محتاجين يتصوَّروا من ضهرهم
علشان يخبُّوا مُعجزاتهم م الشيطان”
― أحمد مدره, صورة يوسف

“علشان مفيش إحساس بيصدق إلا لو كان تجربة”
― أحمد مدره, صورة يوسف

“مين اللي سرقك حتى من حلمي الفقير؟”
― أحمد مدره, صورة يوسف

“الأرض بتشدّ الدموع الناشفة على كُمِّي وانا
أنا اللي أجبن م الأرانب والقطط
بصرخ فـ عيني لاجل تخرس أو تنام”
― أحمد مدره, صورة يوسف

“الشعر أكبر معجزة فالصو
والشعرا أكبر كهنة متواريين
ألقوا الحبال / جوَّه السطور دسُّوا
مزيكا خادعة ترقَّص التعابين
يدبح مجازهم كل مين لمسوا
تنزل دموعكم يمّ ما تِرسوا
فاقروا القصايد وابكوا ثم انسوا
كل القصايد محض وهم مبين”
― أحمد مدره, صورة يوسف

“كدَّابين فـ الضحك.. ممكن
بابتسامات البلاستيك
كدَّابين فـ الشعر.. جايز
بالمجاز
بس صادقين فـ الدموع
وارتعاش الحلم فـ القلب الإزاز”
― أحمد مدره, صورة يوسف

“فكِّت ضفايرها هنا والليل نده لي”
― أحمد مدره, صورة يوسف

“والبرد أكبر من طموحي فـ نسمة دافية تكفِّي تتفصَّل دراع بيضُم روحي”
― أحمد مدره, صورة يوسف

“القاهرة بتُعصر خطاوي أهلها قبل امَّا تاكل ﻓـ الغريب”
― أحمد مدره, صورة يوسف

“الشمس ما بتحضُنش عُشَّاقها
والملح ما بيرحمش مين خانُه”
― أحمد مدره, صورة يوسف

“طلِّت بتضحك من ورا الشباك
قلبي اللي داب من حُسنها غنَّى
يا من غوى كذب الذي أفتاك
تفاحة واحدة بتشتري جنَّة”
― أحمد مدره, صورة يوسف

“وانتي بعيد
أنا والقصيدة اتنين يتامى اتقابلوا فـ الغربة”
― أحمد مدره, صورة يوسف

“كان عندنا فـ بيتنا القديم
حتة موكيت
ما اعرفش ليه
شاددني ليها حنين غريب
ما اعرفش ليه
واحشني برد البيت كمان
كان عندنا فـ بيتنا القديم
حتة أمان”
― أحمد مدره, صورة يوسف

“سلِّم صحابك للوجع، وبارك لهم ع التجربة”
― أحمد مدره, صورة يوسف