شكلها سافرت Quotes

“لازم نستمتع أكتر بالناس اللي حوالينا، نستمتع بوجودهم، ساعات مابيبقاش فيه مرة جاية”
― سها الفقي, شكلها سافرت

“-في حاجات عبيطة كتير الواحد عملها ما كانش ليها لازمة
= زي ايه ؟
-زي السفريات الحلوة اللي الواحد لغاها في آخر لحظة عشان نشتري بالفلوس حاجات مادية مالهاش معني وضيع علي نفسه لحظات السعادة .”
― سها الفقي, شكلها سافرت

“ابتسم ابتسامة توجع القلب وقال لي " ربنا يكفيكي شر حياة عايشاها بدل غيرك”
― سها الفقي, شكلها سافرت

“القدر مفيهوش حسابات، مافيش قواعد، مافيش شروط، مافيش كتالوجات، مفيش (المفروض)..”
― سها الفقي, شكلها سافرت

“ساعات بنلاقي اللي إحنا محتاجينه في المكان الوحيد اللي مفكرناش ندور فيه.”
― سها الفقي, شكلها سافرت

“مش كل اللي بيضحك مبسوط ومش كل اللي عنده حكايات عاشها... معظم الوقت بنضحك عشان منتسألش مالنا، معظم الوقت بنضحك عشان بنخاف نزهق اللي حوالينا من الوش الحزين، معظم الوقت بنستسهل الضحكة عن الدموع، معظم الوقت بنستصعب نشتكي ونقول اللي جوانا.”
― سها الفقي, شكلها سافرت

“فيه حاجات صغيرة لو ركزنا فيها هنكتشف إن فيها متعة كبيرة قوي لكن إحنا بنضيعها بالروتين، بنضيعها عشان بنعملها من غير روح، عشان حافظين، منها اللبس، والأكل، إمتى آخر مرة فطرت فيها حاجة معينة عشان نفسك تفطر الحاجة دي مش عشان لازم تاكل قبل ما تنزل؟”
― سها الفقي, شكلها سافرت

“فيه حاجة بتوحشنا في الواقع أول ما بياخد صفة (الماضي).”
― سها الفقي, شكلها سافرت

“المطار مكان له طبيعة خاصة. ليا صديق كان دايماً يقول إن أرض المطار شهدت على دموع حب وأحضان صادقة أكتر من اللي شافتها قاعات الأفراح ودور المناسبات، جايز عشان فيه ارتباط وثيق بين لحظات الوداع والمشاعر الحقيقية.”
― سها الفقي, شكلها سافرت

“أيوه انا مدمنة قهوة!! ومش اي قهوة، انا مدمنة كراميل مكياتو من ستاربكس. المكان ده بالذات فيه حاجة، أو مافيهوش، لكن احنا دايما بنبرر حبنا الغير ممنطق للناس والأشياء بان فيها حاجة، حاجة ايه؟ ماحدش عارف.”
― سها الفقي, شكلها سافرت

“كان يوم جمعة... أول جمعة بعد رمضان... صحيت بدري من غير منبه، صليت وحمدت ربنا انه اداني يوم جديد أعيشه... فطرت ونطيت في جينز وتي-شيرت عليه باتمان وضربت نظارة شمسية. سلمت على ماما وبست رأسها وأخذت دعوة كل يوم: "روحي يا بنتي.. ربنا يحبب فيكي خلقه".”
― سها الفقي, شكلها سافرت

“اللي اتجوزت أول واحد واللي اتجوز أول واحدة عرفها في حياته محظوظ وقراره سهل، لكن اللي فشل ووقع وقام وكمل، لما بيقرر بيقرر بصعوبة عشان ماعندوش استعداد يختار غلط تاني.”
― سها الفقي, شكلها سافرت

“فيه لحظات كده مينفعش تفضل متمسك بعلاقتك باللي قدامك فيها عشان متبقاش بايخ.. فيه لحظات لازم تديله مساحته وفرصته يبعد عنك أو ميبعدش بس يبقى عمل اللي يريحه.”
― سها الفقي, شكلها سافرت

“الوقت.. الحاجة السحرية اللي بتغير كل شيء..
اللي بيغير طعم حاجات... وبيضيع طعم حاجات تانية.
بيقوي ناس وبيموّت ناس تانية..
الوقت.. الطرف التالت في علاقاتنا ببعض وعلاقاتنا بالأشياء..
الوقت بيفضح.. وساعات بينسي.. وبيقوي.. وكتير بيعالج..”
― سها الفقي, شكلها سافرت

“في حاجات المبالغة في تحليلها بتفقدها معناها وطعمها...”
― سها الفقي, شكلها سافرت

“بقينا عايشين في كهوف جوا كهوف، كهف العربية والبيت، وكهف الأوضة جوا البيت، وكهف الموبايلات اللي جواه كهف الفيسبوك والواتساب وغيره. كهوف جوا كهوف جوا كهوف.”
― سها الفقي, شكلها سافرت

“أعلى درجة من درجات الحب هي إن الناس تتجمع في مكان حباً في شخص وهو مش موجود في وسطهم، بيسلموا على بعض ويحضنوا بعض جامد وبعدين يقعدوا ساكتين يسمعوا كلام ربنا ويفتكروه... إيه الجمال ده كله. العزا أشبه بحفلة الوداع بس بشكل مختلف.. وداع مادي لشخص بقى ذكرى معنوية.
العزا مش بيشكل لي أزمة تماماً عشان حقيقي جداً عكس المجاملات السخيفة والتجمعات المصطنعة.”
― سها الفقي, شكلها سافرت

“مش كل المجرمين في السجون... الحبيب اللي ساب مجرم وذكرياته سجن... الصديق اللي خان مجرم وذكرياته سجن..
الذكريات في حد ذاتها سجن، انعدام الثقة بالنفس والمقارنة الظالمة بيننا وبين حلم عمرنا ما هنوصل له سجن، البحث عن الكمال سجن.”
― سها الفقي, شكلها سافرت

“مش المفروض تسيب حد يشاركك لحظات ضعفك غير لو عمل مجهود حقيقي يخليه يستحق ده، يشاركك لحظات الفرح ماشي، الغضب، الحماس، لكن لحظة الضعف أمانة كبيرة مش أي حد قدها.”
― سها الفقي, شكلها سافرت