الغطا والحلة Quotes

“عزيزي زوجي المستقبلي ....
تحية طيبة وبعد ...
مبدئيا انا عايزاك تصلي عالنبي في قلبك لانه واضح اننا اتخذنا قرار الزواج .... -يلا ماحدش بيموت ناقص عمر- وبما اننا أخدنا القرار ده فكان فنفسي كام حاجة عايزة اقولهُملك ....
احنا هنعيش سوا ... قرار الجواز ده مش لعبة -على الأقل بالنسبالي- مؤبد يعني !
وعشان كده حاول تبقى "لطيف" .... يعني بين الحين والآخر قولي يا حبيبتي ... -بلاش بيبي عشان عندي ارتكريا- ...
ادخل عليه كل شهرين ببوكيه ورد -انا عليه الكباب- !
لو رجعت ولاقيت شكلي منكوش وحالتي كرب عشان كنت لِسَّه راجعه من الشغل و بحاول الحق اعمل اكل ... ممكن ممكن يعني تنكُش شعرك و تقف تساعدني شويه -مش عيب- !
لو يوم حسّيت أني تعبانه فاجئني واعملي كوباية شاي -عشان انت عارف أن اكتر حاجة بحبها في الكوكب الشاي- !
تعالى في يوم قولي ماتيجي نتجنن ونسافر يومين .... نلم شنطة صغيرة ونهرب من الكوكب الكئيب !
الدنيا مسؤوليات واحنا كُبار بس الدنيا من غير جنان مش هينفع تتعاش ... مش هنقدر نكمل !
اوعدني تحاول تتجنن قدر الإمكان ....
اوعدني انه على الرغم اننا في ايام كتير هنقوم مش طايقيين فيها بعض و عايزين نولع في بعض بجاز و نلعن و نسب اليوم اللي اتجوزنا فيه .... بعد ساعة نتصالح و نقعد نلعب بلاي ستيشن !
اوعدني اما تلاقي المسلسل اللي بحبه بدأ تديني الريموت عشان اقعد اتفرَّج :)
اوعدني تفضل الشخص اللي على الرغم أن في ايام هبقى مش طايقاه فيها عشان نسي يدفع فاتورة الكهربا ومش كل حاجة انا اللي اعملها بس انتَ "الوحيد" اللي انا بإرادتي الحرة وقلبي المنشكح اختارته عشان اتخانق معاه على فاتورة الكهربا اللي لِسَّه ماتدفعتش :)
وأخيرا .... شكرًا والي لقاء قريب”
― رحاب هاني, الغطا والحلة

“عارف الأزمة فين ؟
الازمة ان ف ناس بنحبهم بس مشكلتهم انهم عمالين يبنوا سور حوالين نفسهم ويعلوه !
السور دا بيفصل بينك وبينهم ..
السور دا بيمنع احساسهم انه يوصلك ..
السور دا بيفصل بين احتمالية كل شئ جميل وبين الرغبة ف الانعزال ..
الفكرة انهم بيطالبوك انك تكون متفهم لمشاعرهم مع ان المنطق بيقول " اتفهم مشاعرك ازاي اذا كنت اصلا مش عارفها"
انت بتبني سور حواليك ..
ف ناس هتحاول تنطه علشان توصلك ودول كويسين مفيش كلام بس مش دا الطبيعي ولا دا المطلوب .. مش المطلوب اطلاقا انك تصعبها ع البشر علشان يحبوك ويقربوا منك لان بوجود السور دا يكاد يكون مستحيل ..
الوصول ..”
― رحاب هاني, الغطا والحلة

“كل يوم كنت بتأكد من نفس المعلومة ؛
اللي بيحبك هيتفنن كل يوم انه "يحسسك" انه بيحبك ...
واللي عايز يبقى موجود في حياتك هيتشقلب عشان يفضّل موجود ....
واللي انت غالي عليه هتحس من كلامه والاهم افعاله قد ايه انت غالي .....
اللي يومه ما بيكملش من غيرك .....
مابيكملش من غيرك !
دي حقيقة مطلقة مافيهاش تأويل ولا تغيير ....
في ناس بقى انتَ عايزهم يكونوا ما سبق بس هما مش كده وصدقني لا الاعذار ولا الاوهام اللي بتقولها لنفسك هتخيلهم كده .....
فرق بين الغالي في حياتك ..... وبين الناقص !”
― رحاب هاني, الغطا والحلة

“أزمتنا اننا بندخل علاقات كتير غلط عشان مقتنعين اننا هنقدر نغير اللي قدامنا !
فكرة انك متقمص شخصية "المخلص" اللي هينقذ الاخر من اي ما كان فيه فكرة خاطئة جدا !
البني آدم مابيغيرش بني آدم ......
الظروف هي اللي بتغير الانسان و احنا ما نقدرش نتحكم في الظروف !
وعليه لو انت من البداية شايف انه غلط نصيحة أخوية بلاش .... امشي بعيد ...
امشي بعيد و بلاش تخلصه عشان في احتمال كبير ان هو يغرقك !”
― رحاب هاني, الغطا والحلة

“انتَ لو غالي عليا واحنا اصحاب او اي كان نوع علاقتنا هتلاقيني بحاول معاك مرة واتنين و عشرة ...
بس في النهاية ماينفعش تتمسك بحد قرر انه يسيبك من الاول أصلا !
إرهاق ذهني ، عصبي .... هتعيش بتستنزف طاقتك على حد مايستاهلش ....
وعشان كده "هي لحظة" بتخلى فيها عن اي حد ...
بمنتهى الاريحية ....
وساعة العتاب ؛ ماتلومنيش عشان انا حاولت (نقطة)”
― رحاب هاني, الغطا والحلة

“الحب الحقيقي -في نظري- هو اللي مبني على الصداقة لان الصداقة أساسها التفاهم ، اساسها مش بالضرورة شخصين شبه بعض -بالعكس ممكن يكونوا خلف خلاف- بس في النهاية فهموا بعض واختاروا يكملوا بعض و يبقوا سوا ....
واقفين سوا في المِحنة قبل الفرح !
الحب الحقيقي اساسه صداقة متينة ....
عشان الصداقة هي -بس- اللي تقدر تقف في وش الريح !”
― رحاب هاني, الغطا والحلة

“مع الوقت اكتشفت اني مابقربش حد مني أبدا !
مهما كنت بحبك .... فأنت بعيد !
مهما كنت غالي .... فأنت بعيد !
ماحدش يعرفني ١٠٠٪ مش لسبب غير اني مابسمحش بده !
علاقاتي مهما طولت ؛
قصيرة ....
والبني ادم مهما قرب ؛
بعيد !”
― رحاب هاني, الغطا والحلة

“اتجوزي للاسباب الآتية :
*اما تلاقي حد تعرفي تتكلمي معاه بقلب مفتوح !
*اما تلاقي حد كل اما تشوفيه ترتسم على وشك ابتسامة بلهاء مالهاش اي معنى ولا سبب غير رؤياه !
*اما تلاقي حد يشجعك انك تسعي ورا أحلامك !
*اما تلاقي حد شايف جنانك ميزة وإنتي شايفه جنانه نعمة !
*اما تلاقي حد انتي عارفه ان اي كلمة حلوة بيقولها في النهاية يقصدك بيها !
*اما تلاقي حد شاف أسوأ ايامك وإنتي متشلفطه عشان طول الليل كنتي سهرانه بتخلصي presentation للشغل ... ومع ذلك اول ما شافك ضحك وقرر ان هو اللي يسوق عشان انتي شكلك تعبان !
* اما تلاقي حد يطبطب عليكي وقت المِحنة ويقولك انها هتعدي عشان إنتوا سوا ....
*اما تلاقي حد تشوفي في عينيه خوف ابوكي وحبه !
*اما تلاقي حد عامل لغيابك حساب اكتر من وإنتي موجودة !
*اما تلاقي حد انتي مستعدة انك تضحي بحاجات كتير في حياتك عشانه وهو يرفض التضحية دي لان الحب مش اننا نتخلى عن احلامنا او حاجات بنحبها الحب مركب بيسوقها اتنين عشان ماتغرقش !
*اما تلاقي حد مش شبهك -مش لازم- بس إنتوا سوا عاملين زي الغطا والحلة ؛ المخ والعضلات ؛ لورين وهاردي ؛ بكيزة وزغلول ؛ بوني وكلايد ؛ ميرفت وعيلاء ..... الى اخر القصص الأسطورية ....
حد بتكملي بيه ومعاه !

اما تلاقي بقى حد فيه ما سبق اتجوزي ؛
حد فيه ما سبق !
مش عشان القطر فات و لا عشان طنطك ام عفاف شايفه انك اتأخرتي في الجواز ولا عشان كل أصحابك اتجوزوا ..... ولا عشان بنت خالتك لولو اتجوزت وهي عندها اربع سنين !!!!!!!
اتمسكي بشروطك .... اتمسكي باسبابك !
اتمسكي بحلمك وما تتنازليش عشان دي "حياتك" انتي مش حياة طنطك ام عفاف !”
― رحاب هاني, الغطا والحلة

“انا مش عايزة اتجوز واحد عادي !
مش هينفع اتجوز واحد مابيعرفش يضحك مثلا !
ما بيحبش السينما و المزيكا ....
مش هينفع يكون شايف انه بيتجوز عشان "جه وقت الجواز" ولا عشان "أصل الجواز أحسن من الانحراف" !!!!!
مش هينفع اتجوز واحد شايف ان الجواز خلاصته "انه يرجع من الشغل يلاقي الاكل موجود" !
الجواز شركة ..... شراكة في كل حاجة !
واحد فاهم انه لا ينتقص فيه اي شئ انه يساعد او انه يقف في المطبخ معايا -ممكن نرمي دقيق على بعض وكده يهدها الكليبات خربت عقولنا- المهم يقف !
يبقى موجود .... يحاول ....
ماينفعش اتجوز واحد مش مستعد انه يحاول ....
مش هينفع اتجوز واحد ماعرفش اضحك معاه !”
― رحاب هاني, الغطا والحلة

“الأهم ان كلنا لازم نعرف أنه اهون ساعات كتير نقضي عمرنا مستنين الشخص اللي نشيب بحب معاه على اننا نرتبط بشخص عشان بس الوقت جري”
― رحاب هاني, الغطا والحلة