زاوية ميل Quotes

“أهون ما في عصارة مرارتك ذل
أصعب ما فيكي إن إنتي دايسة الكل .. ومكابرة
اللي احتمى في حماكي مالقاش ضل
وانتي - اللي فارضة الصبر - مش صابرة ..”
― إسراء علي, زاوية ميل

“تشوف الدنيا من برا
تحس إنك ملِك عصرك
تفوت جواها تتعذب
وتلقى إن الزمان عَصَرك
تجيك الضربة من ضهرك
تجيك من زاوية مُلتفّة
ماتعرفشي تجيب حقك
تقف على حافة الحافة
ماتعرف مين يقوم زاقّك
تقع مهزوم لقاع القاع
وتنزل حدف
مافيش في الموت ألم ولا نزف
ماتزعلشي !!”
― إسراء علي, زاوية ميل

“أنا حاطة مشاعري في تلاجة
وربطت على الجرح بطوبة
وكتمت الدم بحبة بُن
إوعى يصورلك سوء الظن
إن أنا هسامحني وهتعايش
معلومة عن الجسد البايش
لو مهما هتلحم وترقّع
وتداوي فيهدى ويتناسى
روحه إللي في حضن الكماشة
هتموت على فرصة عشان تطلع ..!”
― إسراء علي, زاوية ميل