أسباب وجيهة للفرح Quotes

“و حياة عنيكي
بتطرد كل ليلة
من أي شارع عبيط
و لا بزعل..
و لا بنزوي ف الحيط

و حياة عنيكي
بنكسف منك قوي
لما بشوفك ف المنام
أكمن حلمي مش قد المقام
و لسة بحلم بيكي
مشوار و سكة و شطوط
قبل المراكب ما تتحول بيوت”
― عمر مصطفى, أسباب وجيهة للفرح

“خللينا نستفسر
عن أول الفراشات
عن أروق الينابيع
خللينا لما نضيع
ماننتهيش فجأة
خللينا في الزنقة
نغازل الوسعات
و افتكري ليه في الفرح..ابدعتي في البسمات
و افتكري ليه فعلا
قدرتي ترضيني
و أنا كنت مش راضي”
― عمر مصطفى, أسباب وجيهة للفرح

“باحب اغيب
واسيب مكاني غريب
وتترسم علامة تعجٌب ساهية علي وشك
وانت اللي لامحني بطرف عين حسًك
وأنا مستخبي جُوه سحًارة
وباضحك في سري
شطور بنضارة
انا مش هنا .. انا مش هناك
لكن خيالي معاك”
― عمر مصطفى, أسباب وجيهة للفرح

“جوًه المزيكا الحلوة
ساعات بينُط نشاز بيفرحني
بيكسر كل أزاز الصمت
الحاجز عني الحس اياه
انا طرت معاه
وسمعت بنشوة ايقاع
مكسور بيهد السور اللي ما بينًا”
― عمر مصطفى, أسباب وجيهة للفرح