മരണ വംശം [Marana Vamsam] Quotes

“രോഗമാണ് മനുഷ്യന്റെ വലിയ ശത്രു. പണമില്ലാത്തതോ സുഹൃത്തുക്കളില്ലാത്തതോ അധികാരമില്ലാത്തതോ ഒന്നുമല്ല. കിടപ്പിലായാൽ രോഗിയെപ്പോലെ അനാഥൻ ആരുണ്ട്. എല്ലാവരും അടുത്തുണ്ടെന്നു തോന്നിയാലും അവസാനം രോഗിയും രോഗവും മാത്രമാവും. എല്ലാവരും ഉറങ്ങുമ്പോൾ ഉറക്കം കിട്ടാതെ, ഓർമ്മകളിൽ ഇല്ലാതെയാവും. എങ്ങനെ നടന്ന മനുഷ്യനായാലും കിടന്നുകഴിഞ്ഞാൽ കഴിയും ആനന്ദങ്ങളുടെയും ആഹ്ലാദങ്ങളുടെയും അധികാരത്തിന്റെയും നടത്തങ്ങൾ.”
― P.V. Shajikumar, മരണ വംശം [Marana Vamsam]

“ചില തീരുമാനങ്ങൾ അങ്ങനെയാണ്. എന്തിനാണ് ചെയ്യുന്നതെന്നു ചോദിച്ചാൽ ഉത്തരമുണ്ടാവില്ല. ചെയ്യുന്നു, അത്രമാത്രം. ചെയ്തുകഴിഞ്ഞാലും അതിന് ഉത്തരം കിട്ടില്ല. അങ്ങനെ ഉത്തരം ലഭിക്കാത്ത എന്തെന്തു കാര്യങ്ങളുണ്ട് ഈ ലോകത്ത്..!”
― P.V. Shajikumar, മരണ വംശം [Marana Vamsam]

“ചില മനുഷ്യർ അങ്ങനെയാണ്. മറ്റുള്ളവർ അനുഭവിക്കുന്ന ദുരന്തങ്ങളിൽ പുറമേക്ക് ദൈവത്തെ വിളിക്കും. സംഭവിച്ചല്ലോയെന്ന് വിലപിക്കും. സഹതാപത്തിന്റെ ദീർഘനിശ്വാസമിടും. എന്നാൽ ഉള്ളിൽ ആഹ്ലാദത്തിന്റെ തിരയിളക്കങ്ങളിൽ മനം കുളിർക്കും.”
― P.V. Shajikumar, മരണ വംശം [Marana Vamsam]

“ചെയ്യേണ്ട ശരികൾ വേണ്ടസമയത്ത് ചെയ്യാൻ തോന്നില്ല. ചെയ്യണമെന്നു തോന്നുമ്പോഴേക്കും സമയവും സന്ദർഭവും കഴിഞ്ഞുപോകും. മനസ്സിൽ മായാത്ത മുറിവായി അതു ജീവിതമുള്ളിടത്തോളം കിടക്കും.”
― P.V. Shajikumar, മരണ വംശം [Marana Vamsam]

“ഒരു കുറ്റവാളി കുറ്റം ചെയ്യുന്നതും ഒരു രാഷ്ട്രീയനേതാവ് കുറ്റം ചെയ്യുന്നതും രണ്ടും രണ്ടാണ്. കുറ്റവാളിയുടെ കൃത്യം അതിക്രൂരതയായി പരിഗണിക്കുമ്പോൾ രാഷ്ട്രീയക്കാരന്റെ ചെയ്ത്തിന് മാന്യതയുടെ പരിവേഷം വരും. കുറ്റവാളി രാഷ്ട്രീയാധികാരമേറ്റുകഴിഞ്ഞാലോ അയാളെ എങ്ങനെ ശ്രമിച്ചാലും പിടിച്ചാൽ കിട്ടില്ല.”
― P.V. Shajikumar, മരണ വംശം [Marana Vamsam]

“തമ്മിൽത്തല്ലി ചാവാനാ മനുഷ്യരെ വിധി. ചിലർ നേരിൽ തല്ലും. ചിലർ നേരിലല്ലാതെ തല്ലും. ചിലർ നേരിനു വേണ്ടി തല്ലും. ചിലർ നേരും നെറിയുമില്ലാതെ തല്ലും...”
― P.V. Shajikumar, മരണ വംശം [Marana Vamsam]

“ഏറെ ഇഷ്ടമുള്ളവർ പിണങ്ങിയാൽ വൈരാഗ്യത്തിന്റെ വിടവ് വലുതായിരിക്കും. ശത്രുവിനെക്കാൾ ശത്രുത മിത്രങ്ങൾ ശത്രുക്കളാവുമ്പോൾ. ഒന്നിച്ചുണ്ടായിരുന്ന നിമിഷങ്ങൾ കണ്ണിൽ പിടിക്കാതെയാവും. പരസ്പരം താങ്ങുംതണലുമായി നിന്ന സന്ദർഭങ്ങൾ മറവിയുടെ മഞ്ഞുകാറ്റിൽ മാഞ്ഞുപോകും. എങ്ങനെയെങ്കിലും തകർത്തുകളയാനുള്ള കണക്കുകൂട്ടലിൽ ശിഷ്ടജീവിതം അവർ കണക്കിലെടുക്കും.”
― P.V. Shajikumar, മരണ വംശം [Marana Vamsam]

“ഒരാളോടു ശത്രുത തോന്നിയാൽ അതു കൂട്ടാനുള്ള കാരണങ്ങൾ സ്വയം കണ്ടെത്തിക്കൊണ്ടേയിരിക്കും. ദേഷ്യത്തിന്റെ കനൽ കെടാതിരിക്കാൻ കുറ്റങ്ങൾ മാത്രം കണ്ണിൽ തെളിയും. വെറുക്കാനുള്ള കാരണങ്ങൾ തേടിയെടുക്കും.”
― P.V. Shajikumar, മരണ വംശം [Marana Vamsam]

“പ്രണയത്തിന്റെ വഴിയും വശവും ആർക്കും പ്രവചിക്കാൻ കഴിയില്ല. അതു ശത്രുക്കളെ ഉണ്ടാക്കുന്നു. ശത്രുക്കളെ ഒന്നിപ്പിക്കുന്നു. കൂടപ്പിറപ്പിനെ മറക്കാനും വെറുക്കാനും തീർച്ചപ്പെടുത്തുന്നു.”
― P.V. Shajikumar, മരണ വംശം [Marana Vamsam]