شاي بلبن Quotes

“اقف عندك
ده حلمى حتة من حلمك
ومن أملى يزيد أملك
ولاجل ما حلمي ده يكمل أنا جنبك
وايدى ماسكة اهي فى ايديك
واشيل عنك كمان حلمك
ولو زاد الوجع جواك
انا وياك يهون ألمك
اقف عندك
ماتحلمشي على قدك”
― هديل عبد السلام, شاي بلبن

“أنا اللي الدنيا بتجيني .. تقولي أؤمري اتمنّي”
― هديل عبد السلام, شاي بلبن

“..أنا العايش
على الهامش
وقلبي كأنه شيء هايش
ولو سألوني عامل أيه؟
هقول عايش
تعيس.. عايش
حزين.. عايش
فقير.. عايش
ولسه عقلي أهو في راسي
لا أنا مجنون ولا طايش
***
ما تسألونيش عن أحوالي
ومالكوا يا ناس كده ومالي؟
ما أنا عايش أهو في حالي
وراضي برزقي وبمالي
ولامم بيتي وعيالي
وعيشة المر تحلالي
***
وجمب الحيط أنا ماشي
ولو عايزني جوا الحيط
هقول ماشي
ولا اتعصب ولا اتنرفز
وصوتي كمان ما يعلاشي
***
لا يوم هفتح بؤي
ولا اتكلم واقول حقي
وما تقوليش دي حرية
ورايا عيالي وولية
كفاية إني أهو عايش
***
صحيح في خلق فوق الأرض

وعايشاها بطول وبعرض
وناس مدفونة تحت الأرض
لكن هارجع وأقول تاني
أنا مالي
ده أتا المهمل.. أنا الهامش
لكن عايش
***
لا في حاضر ولا بكره
ده أنا ماضي
وفقري عليا أهو قاضي
لا ليا ذكر ولا ذكرى
وتاريخي ورق فاضي
ما أنا العايش.. على الهامش

وقلبي كأنه شيء هايش
ولو سألوني عامل أيه؟

هقول ميـــت.. مانيش عايش
وعقلي شط من راسي
بقيت مجنون
بقيت طايش
****
سيبوني يا ناس بقى في حالي
ده أنا فقري بيحلالي
ومهما تقولوا وتعيدوا
هاكون برضه أنا في حالي
أنا في حالي.. أنا في حالي”
― هديل عبد السلام, شاي بلبن

“رسمت احلام لكل الناس
بنيت فى خيالى احلى قصور وعليتها
وفى الاخر مسكت الفاس
وانا اللى بايدى هدتها”
― هديل عبد السلام, شاي بلبن

“قلبى الإزاز كنت حاطاه بين إيديك
وقولتلك دا بيتكسر
خاف عليه وحطه فى عينيك
كنت فاكر إنى خايفة عالإزاز
بس الحقيقة هى إنى
كنت خايفة إنه الإزاز يجرح إيديك”
― هديل عبد السلام, شاي بلبن

“و ليه راضى !!
ضعيف دايما كدة مسلم
وييجوا عليك تقول عادى
وجواك تبكى تتألم
وليه حسك كدة هادى
وليك الحق تتكلم
وليه حزنك عليك قاضى
وفيك الفرح متكتم
وليه تنهار كدة قصادى
كأنك طفل متيتم
وليه نهارك كدة رمادى
ونورك مطفى ومعتم
وليه تسكت و ليه راضى
وجرحك فيك كدة معلم
هخليك صفحة م الماضى
ما حلمى بايدك اتهدم
عليك بعلن انا حدادى
عليك ببكى و بتندم”
― هديل عبد السلام, شاي بلبن

“ثم نسيوا

ثم كانت مرة مصر
اللي شافت ألف نصر
هي شمس ف كل عصر
ثم علمي ثم نهري
***

ثم زعلت
ثم حزنت
ثم راحت
بس رجعت
***

ثم خافت من الأعادي
ثم قالت فين ولادي؟
ثم قلنا في فساد
فيكي ظلم للعباد
ثم زاد الظلم حبة
ثم راحت المحبة
والفساد؟
برضه زاد .. ثم زاد .. ثم زاد
***

ثم جيت للقرب طالبة
انتي كارهة ولا حابة
ثم حبسوا صوتنا فيكي
ثم زاد الخوف عليكي
ثم دوبنا شوق إليكي
***

ثم قامت مرة ثورة
ثم قالوا دي مؤامرة
ثم قالوا بلدنا حرة
ثم خانوا .. ألف مرة
ثم قالوا .. ثم نسيوا
ثم عادوا .. ورجعوا نسيوا
ثم كدبوا .. ثم كدبوا.. ثم كدبوا
***

ثم ننكر .. ثم نرجع تاني نكدب..
ثم اثبت .. ثم أرجع
ثم حقك .. ثم حقي
ثم فاكر؟ .. ولا ناسي..
ثم عقلي مش في راسي..
ثم ضاع في الزحمة حلمي..
ثم لسة عاوزها سلمي..
ثم سال لوطنا دمي..
ثم نسيوا .. ثم نسيوا .. ثم نسيوا..
***

ثم غيرة..ثم حيرة
ثم فين الحق فين؟
ثم قسم ثم فرق
زي نهج المعتدين
ثم فوقنا
ثم روحنا
للمكان الأولاني
ثم أصبح لما كانوا
ثم نسيوا ونسيوا تاني
***

ثم أصحى .. ثم فوق
ثم إهدى .. ثم روق
ثم حط مصر فوق
مصر عالية
مصر مش سلعة في سوق

ثم دمك يا شهيد
ثم نسرك يا عميد
ثم ليه قاعد مكانك؟
ثم ليه ناسي وبعيد؟
ثم ليه تكتيفة ميري؟
ثم ليه حقي لغيري؟
ثم ليه حالف مردش؟
ثم نازل من جديد
***

ثم عزمي من حديد
ثم شمسي راح تقيد
م القناطر للصعيد
ثم حلمك هو حلمي
ثم دمك هو دمي
حتى أمك هي أمي
هو ده عهد الشهيد
مصر دولة مش عبيد”
― هديل عبد السلام, شاي بلبن