“- مشكلة الباب..؟

في العتبة اللي قصاد الباب ..
بتخليه لو حتى اتساب ..
يفضل محبوس جوَّه الأوضة ..

زقيت الباب بإيديك كام مرة ..
عمرك خرجته في يوم برَّه ؟؟
مع إنك زقيته بعزمك ..
مقدرش يسيبك، ويخاصمك ..
واتربس ، واستناك تهدى ..
حتى امَّا هديت،
وفتحت الباب على طول،
ومشيت ..
ومقلتش له حتى سلام !
فرجعت لقيته.. كما كان ..
متهزش خطوة لقدام ..
عمرك زقيته، وقال لك لأ!؟
- لأ.
علشان بقى مدمن للزق ..
وعشان بقي مدمن للجرح ..

- مشكلة القلب..؟

في العتبة اللي قصاد القلب ..
برضك هتكون نفس الشرح ..
..
#مفيشاليا
#حسام_ابراهيم”