“أنا مش عايزاه فارس أبيض يركبلي حصان ولا حمار
أنا مش عايزة حلاوة هيثم ولا عضلات عبد الجبار
ولا عايزاه حالم ورومانسي ويحبني ليل ويا نهار
أنا عايزاه متربي وواعي يقدر يشاركني الأفكار

شوفتوش حاتم... جالي بهانم... طلعت مامته جايه معاه
يوم ماخرجنا.. طنطنا فتنة.. ماسكة في إيدي وموش سايباه
جابلي هدية قلت الله... قال ذوق ماما حماها الله
قلت لا يمكن تاني استحمل... وطلعت اجري بالمشوار
أنا عايزاه مترستأ واعي يقدر يشاركني الأفكار

شفت أسامة... قلت يا ماما... بقه معقول كل دي عضلات
كات خروجتنا.. لازم تخلص.. بالشلاليت ويا روسيات
قلت له لأه.. ده ليلة الدخلة... لازم في الكراكون هانبات
قلت لا يمكن تاني استحمل... ده مش راجل.. ده جرار
أنا عايزاه متربي وواعي يقدر يشاركني الأفكار

أم جه أمجد.. قلت اتأكد.. قبل ما أغرق في التيار
قال يا عمري.. طريقي وقدري.. وقعد ينظم لي في أشعار
قلت وماله.. ده يحسسني.. إني أميرة ليل ونهار
بس زهقت... أفلام وأغاني.. وكلام فاضي مالوش أسعار
أنا عايزاه مترستأ واعي يقدر يشاركني الأفكار

برايد - 1999”