“وحشتني الضحكة اللي بجد
وحشتني الفرحة من القلب،
وحشتني "بحبــك" تتقالي
أو أقولها .. واستنى الرد

وحشتني الحاجة ف أولها
و واحشني تردد أفـكاري
عن إني أقرر أعملها ..
ولا أمشي راجع ف قراري

وحشتني الضحكة ف عنيها
وجناني يشاور لي عليها
وأنا أصلاً عُمري ما أعرفها
ولكني مصمم أروح ليها ..

وحشتني الروح المجنونة
و واحشني صديقي الهلاّس
كان أول ما يشوفني أتضايق
يقول لي هاتضحك .. وخلاص
ويقوم يتشقلب ف مكانه
ويضحكني قصاد الناس!

م الآخر وحشتني الدنيا
وأنا حابس نفسي برّاها
أنا عارف أيوة حياة بسيطة
لكني ما أقدرش أنساها !”