“وكإنى مدينه بدون عنوان
وكإنّى وطن مزروع فى ميدان
وكإنى ملاك جرّب يحلم
سخطوه فى الحلم صبح إنسان

*************

قولوا لحبيبتى أم العيون ناعسه
كل القلوب رسيِت ومش بارسى
كل القلوب رضيِت بطعم الطوب
وانا قلبى رافض يقبل النكسه

************

مخلوق غلط
............. مخلوق ضعيف
......................... مخلوق غبى
مخلوق بيعشق
............ أى شيء مش أجنبى
مخلوق مواطن
........... من طراز الأنبيا
مخلوق مهادن... بس ما طلعتش نبى

***************

العيد وصل للناس وما وصلنيش
بارمح لآخر صوت ما بالحقنيش
رغم إنى عاجبك
....................... ليه ما باعجبنيش؟
وإزاى باشوف العيد ولا يشوفنيش؟
يا صمت واقف ع السكك زنهار
.....قول للحمار يسكت ولا يغنيش

**************

أيام زمان

"كانت لنا أرض
وكان لنا وطن"

أيام ما كان للطيبين قبله
والكلمه كانت رمح أو نبله

"كانت لنا أرض
وكان لنا وطن"

أيام ما عنتر مات عشان عبله

*************

روحك شعاع الضىّ فى ضلوعى
روحى انتصار الشمس ع القضبان
روحك مدد حريّه لطلوعى
من بين أيادى السُّلطه والسجان
يا محدّدانى وطالقه ينبوعى
وملبّسانى العمّه والقفطان
ضمينى لحظة خوفى وخضوعى
وسيبينى أحسّ إن الوطن نعسان

***************

سعيدحامد شحاتة”