“مورفين العك

من يوم ما رجلي
خطت ع الدنيا
وانا مابشوفشي غير عك ..
وعرك في حواري الكوكب
وجواري وبهلوانات لزوم الفرك ..
في حيطان السيرك ..
اللي اتحشى زمان في أدمغة البشر ..
حجر من مورفين العك ..
أنا عقلي كُتر ما حك...
في جدران الطوب الاحمر ..
اتعود يستحمر ..
اتعود يتعك ..
أنا مفيش مرة عديت من زحمة ..
الا ولقيت فيها دعك ..
وشك
بين اليقين والشرك ..
و السك علي قفة الاحلام ..
أنا وجودي صبح حرام ..
مع غياب الضحك ..
مع لعبكة الايام ..
اللي مش لاقيلها فك ...
انا عمري ماشُفت الجنة ..
عشان عمري ما ضحكت ...
عمري مالقيت ربنا ...
عشان أنا عمري ما إرتحت ...!!
أنا عقلي انعصر
م الرغي وكتر التفهات ..
والعاهات ..
وبوز السكات ..
اللي طبع علي وشي ..
وعلمني أمشي ..
ماأشوفشي غير الارض ..
أنا صاحبت طوب الارض ..
مع اني كتير بشوطهم ..
من كتر الوحدة ..
أنا وشي صدى ..
من كتر الدمع
اللي انساب ع الخد وماتمسحشي ..
تقريباً أنا مابقاش علي لساني غير كلمة معلشي ..

انسانجيات - راوي عزيز”