“واحد وعشرين يوم تريننج

من يوم ما مسكت الأوقرة ..
وفتحت بأمل الباب ..
غابت ملامح من بكرة ..
وإتقفل في وشي الباب ..
خبيت الكام سنة تعليم في جيبي ..
لجل ال salary
لجل عمري اللي قرب يشيب ..
من قبل ما أجري ..
عُمر ما كان وشي بيضحك ..
عُمر ما كان لي شئ مخصوص ..
عُمر ما كان في ايدي أستك ..
عشان عمر ماكان في جيبي في فلوس ..
أنا عمري ما عرفت أبوس .....
ايد حد ..
لجل ما أنول الرضا ..
أنا اتعودت ع الفضى ..
اتعودت ع الفشل ..
ياه ع التخشيبة ..
اللي عتبتها ..
وكأنها مقوَّى ..
لتأمين مستقبلي ..
قاعدين ولا فاهمين شئ ..
والدماغ أخر فُلالي ..
يوم والتاني ..
عتبنا ال floor
وشمينا ريحة الأمل ..
زاد الهبل ..
أول ما مسكنا السماعة ..
ومعرفناش ايه نوع العمل ..
السخان بدأ يستهبل ..
لما التلاجة مبتعصرش ..
والشفاط مالهوش ترموستات ...
وليه البوتجاز مابيشفطش ...
أنا عقلي طلعله كرش ..
من كتر التعدية ع المكلمات ..
كان وقت ال shadowing
كما وقت المحاكمات ..
كل اللي بعمله اني بتصنت ..
وأستعبط مع الايجينتات ..
ويوم يجر يوم ..
لحد ما جه أخر يوم ..
وسقطت في التيست كول ..
خدو مني 21 يوم ..
و مخدتش منهم غير رغي بقشيش ..
وتحبيش في كام لحظة ضحك
مع فتحي ..
وكام لحظة قلش مع شوقي ..
وmug عبد الرحمن
اللي صبح من رزقي ..
وكام لحظة زغزغة في جنب صلاح ..
واصطباح علي مترو العابسية ..
اللي عمره ما فاتني ..
ولا سابقني ..
لكنه ساقني ..
رايح جيّ ..
ونزلني أخر التريننج ..
وقالي استنى انت الدور الجىّ ..


انسانجيات - راوي عزيز”