إن كنتي تفتكري ولا تنسي مانيش بحبك...بحب نفسي :)

في لازمة شهيرة لعمار الشريعي لما كان يشغل أغنية في برنامجه الجميل جدا اللي كان بييجي على إذاعة البرنامج العام زمان وكنت بتابعه كل ما تيسر لي، كان دايما يقول بعد الأغنية، الله الله الله.. وعمار عموما كان شخص يرى الجمال دائما وكان حكاء للصبح ومفيش مانع يزود حتة ولاّ يقول وصف بليغ ومجامل أحيانا؛ باعتبار البرنامج للمستمع العام بالأساس. وكتر خيره لأنه كان بيسمع الناس مزيكا وكلام وأصوات حلوة وكمان كان بيشرح ليه هي حلوة.. فكان الواحد بياخد الحسنيين، المتعة والفهم، الحس والعقل. في كتاب الفيلسوف والكاتب والشاعر فريدريش شيلر، التربية الجمالية للإنسان، ترجمته وقدمت له الدكتور وفاء إبراهيم، وصدر عن الهيئة المصرية العامة للكتاب، بيعتبر شيلر إن الجمال ممكن نعتبره وسيلة انقاذ فبيقول: يجب أن يستعيد الإنسان نفسه من جديد في كل لحظة عن طريق الحياة الجميلة.. دي طقطوقة نادرة وجميلة ومن اللي يتقال بعدها: الله الله الله.. كتبها أحمد رامي سنة 1926، وهي تعبير عن فكرة مهمة لشخص رومانتيكي منيل بنيلة بيحب فكرته عن واحدة، مش بيحب الواحدة دي نفسها.. بيقولها كده بصراحة:
إن كنت تفتكري والا تنسي
ما نيش بحبك بحب نفسي
وفي مكان تاني هيقولها:
أحب فيكي ذوقي وخيالي
وأشوف في حبك سبب كمالي
وهي مكتوبة حلو ودمها خفيف، ومتلحنة حلو، وصوت عبد الوهاب بقى في بداية العشرينات لسه صغير شوية صحيح لكنه حيوي وطبعا دايما فاهم بيعمل إيه كويس.
الطقطوقة هي مذهب وكوبليهات واللحن الأساسي أو المقام هو المذهب اللي بيتكرر بين الكوبليهات، يعني بننقل منه. طيب ولما نخلص الكوبليه؟ في الأول كان الملحن بيرجع للمذهب كله ومع التطور بقى يرجع لآخر جزء من المذهب.. ومع التطور خالص مبقاش في مذهب وبقت كوبليهات على طول يقولها مطرب فرد وبطوله، ودي بقى هي الأغنية سيداتي سادتي :)

https://www.youtube.com/watch?v=bMAAE...