عكننة الاب ... من كتاب الساخر مصريين بالشطة

عكننة الاب
- مش عايزه اسمع صوت حد فيكوا .. بابا نايم
- حاضر يا ماما
يووووه هو انت مسمعتش ماما
- وانا مالي بقى هات القلم ده
- يا عم ارحمني عايز اخلص المشروع .. عندي سكشن بكرة
هه ويروح شادد الورق تبوظ ام اللوحة وتتكرمش ..
- يا مااااااااااااما
إيه فيه إيه ؟ قلتلكم بابا نايم -
صوت قادم من الفراغ ... من اوضة النوم الرئيسية في الصالة
- مين الحيوان اللي بيزعق .. مش هعرف أنام في أم البيت ده شوية ولا إيه ؟
وهوووووب تلاقيه طلع من الاوضة
وهاتك بقى موشح كل يوم
انتوا فاشلين .. وجيل بايظ
- يابابا جيلنا هو اللي عمل الثورة
- ثورة .. هو انتوا متخيلين إن شوية العيال دول هما اللي عملوا ثورة بكرة تشوفوا مسر .. ااااا قصدي بكرة تشوفوا اللي هيحصل ..
.. بدل ما تعملي فيها ثورجي ومثقف ذاكر كده واطلع بتقدير يمكن تبقى معيد بدل البهدلة في الشركات ..
يامااااااااما -
بتنادي على ماما ليه انتي كمان ؟ -
لا أبدا يابابا اصل الكفتة طلعت مفرولة -
- يا خيبتها اووومال هتتجوزي أزاي ؟
- الله إيه بقى أبابا هو الجواز بالكفتة .. !!
- لا يا فلحوسة يا بتاعت التجارة .. الجواز بالطبيخ .. بدل ما تتجوزي واحد وتفضحينا ... كنت بس شاطرة رايحة الجامعة جاية من الجامعة وفي الأخر مش عارفة تعمليلنا لقمة نتغدى بيها
خلاص بقى .. سيب الولاد وادخل انت كمل نوم لحد الغدا ما يجهز -
- أنام ؟ أنام أزاي في الموريستان ده ؟
طاااااااااااااخ ..
الله إيه ده .. يا ماااااااااما ..
الحقي .. عزيز كسر الطبق ...
هو دا اللي كان ناقص ..
- أنا اشتغل واصرف عليكوا وماما تروح تشتري أطباق بالشيء الفلاني .. علشان المفعوص اللي مطلعش من البيضة يكسرهم ..
لازم أطباق الشريف من أم 900 جنيه طبعا لازم علشان أخواتك لما ييجوا يتغدوا عندنا ؟! ميقولوش حاجة
ثم تأتي إلى الذاكرة صورة المبدع عبد المنعم مدبولي أمام كريمة مختار في الحفيد ... لازم بفتيك .. علشان محدش يقول حااااااااااجة .. العزومة مش هتنفع من غير بفتيك ... علشان محدش يقول حاااااااجة ؟!! ..
لازم أطباق جديدة ميلامين علشان محدش يقولك حاجة !!
بعد ساعة ونص بالضبط
- حسين .. حسيييين ..
- إيه فيه إيه ؟
- قوم علشان تتغدى ..
على السفرة
- إيه دا يا شيماء
- دي بيكاتا يا بابا
- إيه؟
- بيكاتا بالمشروم
- عشنا وشوفنا الكفتة يتقال عليها بيكاتا
- يا بابا دي مش كفتة دي بيكاتا بالمشروم
- يعني إيه دي ؟ .. لحمة ولا كفتة ولا مشروم
- دوقها يا بابا
- أنا لانا دايقها ولا منيلها في يومكوا الأسود ده .. أنتي يا ولية أنا مش قايلك عايز اتنيل أكل كفتة ولحمة راس النهارده
- ما هي الكفتة طلعت مع شيماء مفرولة ... فأجلناها وهي قالت هتعمل بيها شاورما ساندوتشات ..
- طب ولحمة الراس ...
- والله ملقيتش يا خويا ..
- ولما ملقيتيش تقومي تسيبيها تعمل العك ده ؟
- عك إيه بس يا بابا .. دي وصفة من الشيف الشربيني
اطلع من هدومي يا ناس .. اطلع في البلكونة واقطع هدومي منكم ... لا عيال نافعة ولا أمهم ..؟ خلاص ما صدقت البت بقت تطبخ ونامت هي .. وقال إيه الفلحوسة بنت الفلحوسة بتشوف وصفات التلفزيون ..
- فين علبة الزفت
- مابكفياك زفت يا سي حسين
- انتى كمان هتتدخلي في مزاجي !!
- والله منا قاعدلكم فيها ..
- اهه سيبتهالك مخضرة وغاير من وشك اهه ارتاحتي .. يا آمال
- يووووووووه والله منا عارفة هو إيه اللي مضايقه كده.. كلوا كلوا يا عيال ..
‫#‏سمير_قنبر‬ من كتابي الساخر ‫#‏مصريين_بالشطة‬
‫#‏معرض_القاهرة_الدولي_للكتاب_2015‬مصريين بالشطة,سميرقنبر