مزيف

لو بس تقولي منين بتجيب الضي ف روحك
ولا حتى ازاي واقف على رجلك رغم جروحك
دي الناس بتبدل كده في اللحظة ميت ألف قناع
ومتبقاش عارف مين اللي شاريك ولا مين باع
وتحس البرد في عز الصيف وتموت م الحر في شهر ديسمبر
تقدر على كل الدنيا إلى على غدر الناس ابدا ما حتقدر
****
مش ناوي تقول؟
طب إيه معقول؟
حتسيب الضي من روحي يسرسب
ولا حتجيبلي قناع متركب
وتقولي اتعلم زي الناس
وخلاص راح زمن الإحساس
ولازمن تتعلم تقدر تستعفى
بجروح الناس قادر تستكفى
وكأنك ياض الغول بعيونه الحمرا
يسكر بدموع الناس وكأنها خمرا
كفاياك أحلام
فوق م الأوهام
*****
وأداري وشي كده في كفوفي
اتمنى الأرض ف لحظة تبلعني
منك وبسببك زاايد خوفي
وكلامك قادر يوجعني
وخلاص مش عايزك تاني تسمعني
****
لازم وحدي أنا أفضل عايش
ناسك ساكن ديره ع الهامش
دي الدنيا بالناس مرضانة
والوحدة علاجها بأمانة
كفايانا أوجاع كفايانا