الأُمـــــــــــــــــــــــة

فاكرة الأُمة...حيطة لما بنلمسها بنفوز
لعبة قديمة..بس نسيتها لأني عجوز
لكن لما رجعت لحضنك
مش عارف ليه حسيت
إن أنا فزت، وحضنك ليا كان محجوز
بُعدك توهة..والدنيا متاهة
لما نسيتك لحظة..ورحت مع النداهة
كنت بغالط نفسي ف عد دموعي قبل النوم
كنت باصحى وأنام مهزوم
ورجعت أكركع ضحك لما رجعت لبيتك "جوز"
مش مهزوز
وكأني أبو ذر بيقينه
وكأني ذي يزن وسيوفه سابقينه
وكأني وكأني وكأني....
وياكي حبيبتي أنا المحظوظ 
*****
حالف جوه عيونك أزرع فدادين راحة
ولما انطق اسمك بالراحة
تغني الدنيا...ف ثانية
ومتبقاش في بينا مساحة
أصلنا واحد مش مقسوم
وإن كان صابه البعد ف يوم
وحسينا حشرجة ف الحلقوم
ده كان موتنا 
قربنا قوتنا
وخلاص فوتنا
لحظات كانت كده جراحة
*****
وجايز ألون كده بشفايفك ورد الكون
ماهو لو مرة شخبطتك بجنون
تطرح كل الدنيا ورود
ييجي الندى يلمس شفايفها
تغير الريح ويبان في حفيفها
ينكسف الورد..يبان اللون
أرقص وأتنطط وأدبدب
تراب الأرض يثور..يتكركب
تتخضي عليا...يحل سكون
أنا ياحبيبتي بيكي مجنون
*****
تطلع شمس الصبح وباهتة
طول الليل سهرانة تفكر
قلب حبيبتي زي البفتة
خايفة ينور زيها وأكتر
تخاف الشمس يطبطب قلبك
يظهر بدر السما من جنبك
طفل وليد
فرحان وسعيد
يبدأ تاني الكون من عندك
وأبقى معاندك
باتدلع جايز
أو يمكن عايز
أسمع كلمة حب جديدة
دوشة وصوت مزيكا سعيدة
خمسينة شاي أو كنكة بن 
من غير تحويجة
*****
أيوة أنا فزت..لمست الأًمة
وحعمل حالا هيصة ولمة
وحرسم رسمة
على حيطة الصبح
طاب فيها الجرح
وزالت الغمة