Revised version ng Bagong Taon, Bagong Buhay

Pina-revise sa akin ang tulang isinubmit ko sa Malikhaing Pagsulat 215 class. Ito ang resulta:



Ambango ng royal flush na nasa akin.

Basta’t umulpot at bumukadkad ang ten

Ng hawak kong Ace, King, Queen at Jack na flower,

Ay, mapipitas na ang premyong bente mil!



Ngunit ano ito at panay ang ngiti

Ng mga kalaban kong kasingbusisi?

Ang inaabangan ng aking daliri

Ay na kay Vice kaya na suri nang suri?



Buo na ba ang baraha ni Abby Twal?

Wari ay nagagalak ang kanyang kilay.

Si Ben Iling na sinta kong kaibigan,

Ipinampaypay pa ang lima n’yang pandan!



Lord, alam kong bihasa silang talaga

Pero ang premyo, sa ‘kin dapat mapunta,

Ipambibili ng handa sa pamilyang

Ilang araw nang hindi nakakasama.



Miss ko na sina Bunso, Kuya at Ate.

Baka abangan nila ‘ko ngayong gabi,

kaya ‘wag naman sanang mabangkarote

ang bulsa ko at ang aming medya noche.



Ay, ipinapangako ko po sa Inyo:

Bagong taon, bagong buhay, bagong ako.

Ang mam-bluff at magtimpi’y sakit sa ulo,

Ayoko nang mag-poker, last ko na ito.



Kapag nasilip na ang sampung bulaklak,

sasambulat ang aking pasasalamat.

Hanggang langit ang palakpak ko’t halakhak,

Talo ang Gangnam bomb at Goodbye Pilipinas!