التراث الشعبي

في إطار مروري العابر على الريد كاربت لـ #مهرجان_الموسيقى_العربية وأنا في الأوبرا جاشت بعقلي بعض الأفكار
من فترة كنت لاقيت مسابقة بحثية لـ #المركز_القومي_للمسرح_والموسيقى_والفنون_الشعبية عن دور #داود_حسني في الموسيقى المصرية
الصراحة أنا بعشق الأبحاث كدة لله في لله يعني؛ فقلت طب ما أجرب
ولإني كنت مشغولة لسة في إنجاز أطروحة الماجستير العظيمة ومش فاضية أعمل أبحاث تانية في الوقت ده
فقلت ع بال ما أخلص أبحاث الماجستير أسمع موسيقى داود حسني وأنا بشتغل
وفعلاً كنت صاحية نايمة قايمة قاعدة بسمع أغاني داود حسني وألحان داود حسني وأوبريتات داود حسني وطقايق داود حسني وأدوار داود حسني وأوبرا داود حسني
لدرجة إني لاقيت مسلسل إذاعي معمول عن داود حسني بطولة كرم مطاوع وحسن حسني سمعته
ولاقيت مقاطع من مسلسل معمول عنه برضه ع ماسبيرو زمان شفتها
وكان ناقص أفتح حنفية في البيت ينزل منها داود حسني 😁
وبغض النظر عن إني صرفت نظر في الآخر عن إني أعمل البحث ده؛ لإني بعد ما دورت عن الأبحاث في الموسيقى بتتعمل إزاي؛ فلاقيت إنهم بيطبقوا ع النوت والألحان وكدهون يعني
وأنا آخري طبعاً إني أتكلم عن الشخصية وعن إنطباعي عن أعماله كمستمعة يعني أنا لا أفقه شيء في خلفيات العمل الموسيقي والنوت والكلام ده يعني
بس الفترة اللي قعدت أدور فيها عنه دي خلتني عرفت حاجات كتير مكنتش أعرفها
الحقيقة أنا قبل ما أشوف إعلان المسابقة دي مكنتش أعرف إن فيه حد اسمه داود حسني أصلاً
وأثناء بحثي اكتشفت مثلاً إن أغنية #يمامة_بيضا اللي أنا بحبها وعرفتها بصوت #علي_الحجار و #هدى_عمار هي أصلاً ألحان داود حسني
وإنه أول من لحن أوبريتات وعمل أول أوبرا مصرية لقصة #شمشون_ودليلة (وده طبعاً مع خلفيته اليهو*دية أصلاً لإنه كان من يهو*د مصر وهو مكتشف #ليلى_مراد)
ولحن لكل عمالقة الطرب المصري والعربي من أول منيرة المهدية مروراً بأم وكلثوم وحتى أسمهان، ويمكن مفيش مطرب مصري في الفترة دي متعاونش معاه ده غير طبعاً ألحانه اللي غناها بنفسه
ومن النوادر اللي سمعتها عنه إن #محمد_عبد_الوهاب أول ما ظهر وهو شاب صغير كدة راح ينصحه إنه لازم يعمل برستيج لنفسه كدة وميتعاملش بشكل سبهللي مع الجمهور ويخلي فيه حاجز بينه وبين الناس عشان يبقى له هيبة عندهم وكدة يعني، وضرب له المثل في ده بالفنان #يوسف_وهبي، لكن داود حسني رفض نصيحته وقاله إنه ميفهمش في الكلام ده، وإنه من الناس ومن وسط الشعب ده ونجاحه نابع منهم، وبيستلهم ألحانه وأنغامه منهم ومن حياتهم؛ فمينفعش يتعالى عليهم، وإنه بيكره حياة الأرستقراطيين البغيضة دي ^_^
والحقيقة إن تراثنا المصري ثري بعباقرة في كل الفنون ومجالات الإبداع
والتراث ده كله بيأثر وبيتأثر ببعضه
ومينفعش يبقى فيه كاتب أو موسيقي أو فنان تشكيلي أو مسرحي أو ممثل وميعرفش حاجة عن تراث الفن التاني حتى لو مش هو النوع اللي بيقدم إبداعه فيه
وأنا وإن كنت معملتش البحث اللي فكرت فيه في بداية بحثي عن الموضوع إلا إن كل اللي عرفته ده فتح مواضيع كتير في دماغي أقدر استغلها في كتابة أفكار تانية كتير مختلفة
وعشان كدة من المهم لكل كاتب إنه يكون على دراية بأكتر ما يمكنه بالتراث الشعبي لبلده في المقام الأول والتراث الشعبي العالمي في المقام الثاني
وعشان كدة احنا اختارنا في مؤتمر #نادي_القصة_بأسيوط السنة دي إنه يكون عن #تجليات_التراث_الشعبي_في_السرد_المعاصر
عشان نلقي الضوء على أهمية توظيف التراث الشعبي على اختلاف أنواعه ومجالاته وتأثيره في فنون السرد المختلفة
فأكيد هنستناكم كلكم تشاركونا خبراتكم وآرائكم في جلسات المؤتمر البحثية ونقاشاته
كونوا ع الموعد ^_^

#صفحات_من_حياتي
#سارة_الليثي