عن جارنا "الملتحي" اللي معلق بوستر مرسي بطول العمارة

- من منطلق إني بحب ألاحظ تصرفات الناس، وعندي قناعة إن التصرفات هي غطاء لأفكار كتيــــــر
- جارنا في البيت اللي قدامنا، كان أول حاجة شوفتها لما سكتن في بيتنا الحالي، واحد واقف في البلكونة بالفانلة، وبدقن .

- مهتميتش خالص بموضوع لحيته غير لما شوفت تصرفاته 
-أنا بقالي كتير جدا مبعرفش أقف في بلكونة بيتنا، لأني كل ما أخرج بلاقي الأخ واقف هو أو واحد من ولاده ، 4 أولاد بيعملوا زي باباهم بالظبط، أنا اتأكدت من حاجتين .. انهم بانيين البيت عشان يقفوا في البلكونة .. وانهم مقسمين الوقت نبتشيات . 
- لما كنت بخرج من بيتنا الصبح رايحة الجامعة او الشغل او اي حاجة، وأبقى لابسة هدوم عادية جدا، وهو يبقي خارج .. فيبصلي كويس اوي .. وبعدين يرزع الباب في وشي .. لا يا شيخ .. معرفتكش أنا كده ؟!
- مبحبش الناس اللي بتصور المتدينين على انهم ارهابيين أو متعصبين .. الخ، بس أنا طول الوقت شايفة الصورة دي قدامي، يعني مثلا جارنا التاني - المسيحي - في الحيطة اللي لازقة فيهم، فعمل ايه ؟ راح قفل البلكونات بخشب من ناحية جارنا المسيحي، قال يعني .. !  "من ساعتها بترن في دماغي جملة "بداية الفتنة الطائفية لوح خشب". 
- وسبحان الله، هو هو نفس جارنا ده، اللي بيفضل يبص عليا أو على أختي أو علي ماما أو علي أي حد في بيتنا طول ما هو في البلكونة، حتى لو كنت بعمل حاجة تقليدية جدا، بنشر الغسيل مثلا . 
- بسبب جارنا ده اتكتفت في حاجات كتير، في الأول، يعني كنت ساعات بخرج البلكونة بشعري أول ما سكننا من 10 سنين، بعد كده مبقيتش اخرج وأحط طرحة، بعد كده بقيت بلبس أي حاجة فوق هدوم البيت، بعد كده بقت عباية .. أنا خايفة أجيب نقاب مخصوص للبلكونة ! 
- كان عندي هواية عجيبة اني اقف في البلكونة الساعة 3 الفجر، بحب أبص للسما في الوقت ده جدا، بس مش لدرجة اني آجي أبص فوق ألاقي جارنا واقف، أو واحد من ولاده .. أم كده يعني ! 
- ولأن ماما بتحكيلي إن مراته دايما رامية ودانها مع أي حاجة بتحصل مع أي حد، بقت تقولي شوية نصايح .. متلبسيش كذا عشان الجيران، متعمليش كذا عشان الجيران، وطي صوتك وانتي بتضحكي عشان الجيران، متتكلميش في التليفون في البلكونة عشان الجيران، انشري الغسيل صح عشان الجيران.. وفاكرة كويس اني كنت بنفض لكل ده .
- مش ذنبي انها بتبص علينا من فتحة الشيش !
- قررت أنفض لهم وأبطل سلبية في نفس الوقت، بقيت اعمل اللي يريحني .. وطظ فيكوا
- بدأت ألاحظ تصرفات معظم جيراننا في المنطقة، جارنا المسيحي ومراته وأولاده من أكتر الناس احتراما في المنطقة، وناس خدومة ومحترمة جدا، وفي ناس في حالها، وناس كتير اكتشفت اني ولا كأني شايفاهم ، أكتر حد حبيته هي ست عجوزة جدا و بسيطة خالص وفي حالها .. هو احنا لازم نوصل للسن ده عشان نحترم نفسنا ؟!
- مبيعجبنيش اللي بيعمله جارنا هو ومراته وولاده من ساعة ما سكنت، لحد النهاردة .. وملوش علاقة أبدا بالإسلام كـ دين،  بس عيب  - مستغربتش أبدا لما لقيته بيرشح مرسي، ومعلق البوستر بطول العمارة .. وأكيد المدام والأولاد بيقولوا "آمين".
- أول مرة شوفت البوستر لما الدنيا مطرت من اسبوعين، صحيت من النوم حاسة اني بحلم، بفتح شباك اوضتي لقيت مطرة مصدقتش، جريت ع البلكونة أشوف المطر وببص للسما وآخد نفس عميييييييييق واغمض عينيا وهوووووووب بفتحهم ..لقيت البوستر قدامي . 
- متنساش ان مرسي هيدخلك الجنة .. حتى وانت مش بتحترم حقوق الجار وحرمة بيته برافو لأ Really برافو 
- هذا البوست لا يعني إطلاقا إني بأيد الشفيق فريق .. أنا معنديش ميول إخوانية، معنديش ميول فلولية .. أنا عندي ميول انتحارية - هذا البوست مجرد نموذج وفضفضة، لا يعني أبدا أنه يخص  كل مؤيدين مرسي "عشان عارفةا لدماغ النضيفة .
- في ناس عايزة تاخد حسانت تيك أواي .. وتدخل الجنة ببلاش ! ..أنا وانت وهي منعرفهمش طبعا .. طبعا !