عدّي وسيب علامة

لما تكون في وسط زحمة

وحواليك كُتل مــ الناس

محدش هيعرفك بالتفصيل

ومش هتبان إذا كنت أصيل

ولّا واحد كده وخلاص .



~



لما تكون واقف بتغنّي

والمزيكا أعلى من صوتك

صخب وضجيج ماحي وجودك

وبتسأل ليه مش سامعينّي

ده لو حد سمعك إبقى قابلني .



~



لما تكون قُدّام إعصار

ومعاك حاجات كتيرة شايلها

منها الخفيف ومنها التقيل

هتلاقي الخفيف كله طار

والتقيل واقف ثابت وبإصرار .



~



لما تكون بتنخُل فــ الغربال دقيق

وتبُص تلاقي حباته شبه بعضها

بس منها النقي ومنها الردئ

اللي مليان شوائب منه مابتعدّيش

لكن النقيّة بتعدّي مهما الخُرم يضيق .



~



لما تكون بتتفقلس ع القش

وتعبك هيروح ع الفاضي

لا منه بيكبر ولا بيكش

ومهما نطيت مش هتسيب علامة

وأثرك مهما عملت ماهيعلّمش .



~



نفسك تبقى ..

زي مين فيهم في الدُنيادي !!

تكون مش واضح

صوتك مش مسموع

خفيف ومعندكش إصرار

مليان شوائب من جواك

وصعب تعدّي

تعبك مش بيسيب علامة

وبيروح ع الفاضي !!!!



~



عشان كده ..

نفسي أكون واضحة

وصوتي مسموع

وثابتة وعندي عزيمة

وتعبي مايروحش هدر

ونقيّة من جوايا

أنزل من الغربال بسهولة

أعدّي منه .. وأسيب علامة .



.

.



عدّي وسيب علامة

لــ نـورا خشبـة