Walang Matris ang mga Mambabatas

Walang Matris ang mga Mambabatas

1

wala silang gunita

ng balat na iniuunat

sa bawat udyok ng paglaki

ng lamang hinabi ng mga pintig,

lamang nanahanan

nang ilang buwan,

nagpupuyos na kumawala

upang salubungin ang daigdig,

nag-uumapaw sa pagtataka

gayong panig-panig

ang panganib

2

wala silang gunita

ng pangamba at tuwa

sa mga unang pakikipagbuno

sa hatak ng lupa

ng munting katawan

hanggang sa wakas

makatayo sa mabuway

na mga binti,

bumitiw sa gabay

at buong giting

na buhatin ang isang paa

samantalang naninimbang

ang kabila

upang subukan

ang unang hakbang,

manghang-mangha

3

wala silang gunita

ng pagpigil-hininga

samantalang nakatalungko,

halos di-tumitinag

sa pag-aabang

ng baha-bahagyang

paghimpil

ng tila babasagin

na mga pakpak

ng tutubi

4

bugtong:
walang matris
walang puso
walang utak
walang kaluluwa
panay bulsa at bunganga
sino sila?

[image error]Image by Garciabillyjoe – Own work, CC BY-SA 4.0, https://commons.wikimedia.org/w/index.php?curid=61272452