Kan ALI modelle hulle hande opsteek?

Verlede week het ek julle ingenooi in my skoollewe. Dankie vir die kommentaar wat ek gekry het op epos en in die blog. Mens sukkel regtig om deur te dring in hierdie kultuur, maar dit voel goed om te weet jy maak darem 'n klein verskil. Die kinders geniet die kleurvolle klaskamer baie en ek het besluit dit was tyd vir stap twee: Gebruik die studente as my modelle.


Models Inc


Kinders oor die hele planeet wil graag voel hulle is belangrik, maak nie saak van watter kultuur hulle af is nie. Enige goeie woord van 'n ouer of 'n onderwyser kan 'n baie lang tyd 'n impak op daardie kind hê. Ek stap toe so kameragereed na die Graad 6-2 klas nou die dag en vra vir die onderwyser dat ek opsoek is na drie modelle wat graag op die klaskamer se muur wil wees.  Ek noem ook dat ek net 'good looking' kinders nodig het.  Voor my gaan 'n hand op. Die seun waai amper sy arm af. En hy is niemand anders as Ali nie.


Nou liewe Ali is daai seun in die skool wat geen meisie sou ooit mee wil matriekafskeid toe gaan nie. Sy Engels is goed, maar hy's glad nie baie gewild in die klas nie en hy word baie gespot oor sy voorkoms.  Ek besluit net daar en dan dat ek ou Ali se dag gaan maak.  "Yes, Ali! You're handsome. I want you on my wall!"  Ek kies toe nog 2 seuns, maar my oog vang vir Ali. Daai laaitie glimlag soos ek lanklaas 'n kind gesien glimlag het.  Ek neem hulle toe na die kantoor vir hulle 'photo shoot'. Maak sus, maak so, vertel ek hulle. Ou Ali probeer sy bes om vir Mr Marion te wys hy kan.

Ek het die fotos toe uitgedruk en vir Ali nou saam met die Idiome in die klas gesit. Toe hulle klas daar instap verlede week, toe glimlag hy weer soos 'n beer wat heuning gekry het. Sedert toe wag hy in die oggende vir my by die skoolhek om net te groet, hy kom gesels met my pouses en sy hele gesig verlig wanneer ek in die klas instap.

 
Handsome Ali, trots op die klas se muur.
Hoe min kos dit om 'n kompliment te gee vir iemand? Maar nee, ons raak so vasgevang in ons daaglikse 'rat race' dat ons skoon vergeet van mense soos Ali. Miskien pas hy goed saam met die idiome. 'Beauty is (indeed) in the eye of the beholder'. Hy is werlik 'n dierbare siel vasgevang in 'n reus se lyf. Kom ons hoop hy hou vas aan die yl gesaaide komplimente in sy lewe en verander die wêreld eendag.