فارس خشب
الااونا الادو
فتحوا المزاد
وناس كتير
اتجمعت من غير ميعاد
***
صرخ المنادى بالتمن
والثانية كان عمر الزمن
هتف المزايد وبشجن
رسيت عليه والصمت ساد
***
الااونا الادو
فتحوا المزاد
نادى قوى على تانى صنف
صوت كما الكرباج يطرقع
وصوت تانى كان ساكنه ضعف
ورقم يزيد ورا واو العطف
مالك جديد بفلوسه جاد
***
الااونا الادو
فتحوا المزاد
دورى انا مين يشترى
فى وش خاف
صوته جرى
سكت المنادى م الزهق
صرخ نهق
ما حد رد
ولا نطق
***
مين يشترى فارس خشب
سوس خلاص من التعب
صوت المنادى خلاص خفت
لجلج سكت
ورجعت تانى للرفوف
تبر التراب كسانى صوف
قررت فى ليلة
بلا اى خوف
انى انكسر
تعبت جدا م الكساد
قفلوا المزاد
No comments have been added yet.
