:D من مذكرات أول يوم بطالة

قاعدة رقم 1:البطالة كنز لا يفني
 أيون لأن كل إبداعك هيطلع بقي من أول الصواريخ والماسكات اللي بتخض وكل الحاجات اللي كان نفسك تعملها من سنين لدرجة إنك مش فاكرها أصلا
 قاعدة رقم 2: إنها بطولة وليست بطالة
 البطالة كلمة لو شلت منها حرف الألف اللي ف النص والهاء الاخير  هتبقي "بطل" ، وإنت فعلا بطل لأنك خلصت الأربع سنين كلية بتوعك في أربعة بس ، مش دبلر يعني ، ده دليل إنك كنت مجتهد ، من حقك ترتاح دلوقتي !
:D

 قاعدة رقم 3: أنت في خدمة أي شخص  
 بما إنك فاضي ، يعني مامتك لما تقولي قومي نضفي الشقة واعملي الغداء وجهزي هدوم أخوكي الصغير عشان يروح النادي وحطي الغسيل في الغسالة ووضبي البيت عشان في ضيوف جايين لحد ما تحسي إنك سيدة في نحن لانزرع الشوك ، وتقولي والله يا زمن ، ما بإيديييييييييينا .. خلصنا الكلية ..:((
..وفي نفس الوقت ممكن متساعدش حد خالص بحجّة إنك بقالك 10 ساعات مقطع نفسك نوم .. لازم ترتاح شوية  
 قاعدة رقم 4: العالم يفتح لك ذراعيه ..
 كل ما تقول لحد أنا اتخرجت ، يقولك أهلا بيك يا حبيبي .. إركننننننننننننن  .. ده لو لقيت مكانك ف الصف أصلاً
 قاعدة رقم 4 للمره التانية : خطط لحياتك
 سؤال من كل اللي حواليك من بعد ما تخلص لجنة آخر إمتحان ، ها .. ناوي علي إيه؟
 وهنا تتذكر إعلان إسبرايت : مـُدرّسة يا مها .. إحنا بنربي أجيال 
 قاعدة رقم 5 : البطيخ يطرق الأبواب في أي وقت
 الجو حر  ، وأنا لسه متخرج إمبارح ، أعمل إيه؟ مفيش غيره قدامي
 قاعدة رقم 6 : متقرفوناش بقي !
 كل ما تقول لحد انا اتجرت هيقولك يييييييييييه يعني هم اللي اتخرجوا عملوا إيه؟ إنت بس شوفلك قهوة حلوة كده عشان تبدأ تقعد عليها ، طب إنت محبط .. أنا مااااااالي ! ، سيبني أكتشف إحباطي بنفسي:D


 قاعدة رقم 7: العين عليها فارس
 نظرة أصحابك اللي غالباً من كلية علوم ومثيلاتها علي إنك فارس ، أيووووووووووة يا سييييدي ، خلصت بقي مش إحنا اللي بنتطحن في الكلية ..


 قاعده رقم 8:الفرخة كلت بيضها..:D
 لما يجيلك النق من أقرب الناس ليك..لو أخت في طب مثلا وانت دخلت الكلية وخلصت قبلها ، تفضل تبصلك شذراً..طب أنا مالي ما كنت الكليات قدامكوا م الأول . حد قالك تختار طب؟ مش عاجبك .. إنت حر



 قاعدة رقم 9: يادبلة الخطوبة .. مش وقتك خالص علي فكرة !
 بالنسبه للولاد..فـ أنا لسه مخلص..استنوا بقي لما أكون نفسي .. موت يا حمار !
 وبالنسبه للبنات ، تخرّج يعني كل واحدة تشوفك تقعد تغمزلك بعنيها ، إيه بقي هه ؟ مفيش حاجة كده ولا كده ؟ هنفرح بيكي إمتي
وكأن المستقبل هو الجواز وبس!
 قاعدة رقم 11 : كل الطرق تؤدي إلي الأنتخة !
 في الأيام العادية ، الحاجة بتتعمل فـ 4 ساعات . في الأجازة بتتعمل في نص ساعة ! .أومال هتحس بالوقت والفراغ إزاي؟
 وتبدأ تبص للأشياء بدهشة ، إيه ده؟ دي كوباية ؟  سبحان الله .. ياااااااااه الواحد بقاله سنين مشافش كوبايات
 لو ولد يقضي نص يومه بيحط جل فـ شعره عشان يخرج بالليل مع أصحابه
 ولو بنت تفضل تبص فـ المرايه..
 
 قاعدة رقم 12: أنا مش بطة بلدي
 الثورة اللي هتجيلك فجأة .. لا أنا لازم أبتديها جد من أولها .. مش هسيب نفسي للضياع.أعمل إيه؟
 أعمل اكونت في كل مواقع التوظيف واقرأ الجرايد عشان أبص علي الوظائف الخالية
 مطلوب سكرتيرة حسناء
 مطلوب طبيبة حسناء
 مطلوب حسناء نفسها ، وبين قوسين "يُشترط الخبرة"..!


 قاعدة رقم 13 : عشان تصرف .. لازم تطاطي
 إنت دلوقتي من غير شغل ، والنصب بتاع أيام الدراسة بتاع الكتب والورق والملازم واللذي منه خلص . ولو فكرت تطلب فلوس كحق شرعي لأنك إبن في هذا البيت هيقولولك إن ليك أخوات برضو في هذا البيت . عشان كده لازم تطاوعهم لحد ما تاخد فلوس بالذوق
قاعدة رقم 14: مزنوق أخاك مش بطل
 إنت مضطر تلاقي شغل مهما طال الوقت . عشان تخلص من الإنتهاكات اللي بتتعمل في حقك وانت عاطل..إحتمال كبير تنضم لحركة كفايه أو منظمات حقوق الإنسان .. مش عشان تطالب بحقوقك..لأ عشان تاخد حق"مقابل" شغلك


 قاعدة رقم 15:البكاء علي الأطلال وعلي سور الجامعة

 مفيش حاجه تعوضك عن صحابك .. هتفتكر الكلمة دي مع كل صورة هتشوفها وكل قلم هتاخده في حياتك بعد كده .. وتسمع الكلمة المعتادة .. اللي مرباهوش أمه وأبوه .. يربوه الأيام والليالي ..

 محدش حاسس باللي إنت فيه غير صحابك المتخرجين زيك .. تجري تكلمهم بسرعة .. وتسمعوا عمرو دياب مع بعض.. ونندم ع العشرة الغالية .. ونرضي بالمكتوب والله وآدي حال الدنيا بتفرق ف القلوب.. ..وحشتوووووووووووني يا اصحابي