சுஜா's Blog, page 3

குறைந்து குறைந்து – வீரான்குட்டி

காணும் முன்பு
எத்தனை பெரியவராய் இருந்தோம்
பரஸ்பரம் நாம்!
கண்டுகழித்ததும் சிறிதானோம்
பேசத் தொடங்கியபோது அற்பமானோம்
இனி ஒன்றாக நடக்கத் தொடங்கினால்
குறைந்து குறைந்து
இருக்கிறோம் என்றே
சொல்ல முடியாத அளவுக்கு
முழுதுமாய்த் தீர்ந்துவிடுவோமோ
நாம் ஒருவருக்கு ஒருவர்?

கடவுள் காணக் கிடைக்காதது
சாலவும் நன்றல்லவா?

The post குறைந்து குறைந்து – வீரான்குட்டி first appeared on சுஜா.

கடைசியில் – வீரான்குட்டி

நதியைக் குற்றஞ்சாட்டும் எந்தப் பேச்சும்
எனக்குப் பிடிப்பதில்லை
மூழ்கி அமிழ வரும் ஒருவரை
அது முழுதும் ஏற்றுக்கொள்கிறவரையில்
பிளந்து கடக்க வருபவரை அனுமதிக்கிறவரையில்

காண வருபவருக்குக் கொடுப்பதற்காக
சிறுமீன்களின் கண்ணாடிக்குடுவையை
அது பாதுகாத்து வைத்திருக்கிறது.
முத்துகளில்லை
பவழங்களில்லை
அதீத உறுமல்களோ
அலையதிர்வுகளோ இல்லை
இப்படி விச்ராந்தியாகத் தொடங்கினால்
இந்த நதி ஒரு யோகியாகவே
மாறிவிடப் போகிறதென்று நினைத்தேன்.

ஆனால்
கழிமுகத்தை அடைந்ததும்
என்ன நடக்கிறதென்றுதான்
எனக்குப் புரியவில்லை
கடலோடு கூட்டு சேர்ந்ததும்
அது தன் சொந்தப் பெயரிழக்கிறது
நீண்ட பயணத்தின் ஞானமனைத்தையும்
மடிமைக்குச் சமர்ப்பிக்கிறது
பாய்ச்சலை,
பாறை மேல் குதித்தேறிய பின்பு வரும்
வெடிச்சிரிப்பை அக்கணமே மறந்துவிடுகிறது.

இந்தப் பயணம்
என்றென்றைக்குமாய்த் தேங்கிக் கிடக்கத்தானா
என்றெண்ணும்போது
கணவன் வீடு போகும்
புதுப்பெண்ணின் நினைவு வருகிறது.

ஆனால்
நதியிடம் இந்த விஷயத்தைச் சொல்லிப் பாருங்கள்
அதற்குப் புரியப் போவதில்லை
ஏனென்று கேட்காதீர்கள்
அது அப்படித்தான்.

The post கடைசியில் – வீரான்குட்டி first appeared on சுஜா.

நென்னல் மணம்

அவனைச் சுற்றிலும்
நென்னல் மணம்
அங்கு
அவனுக்கானோரும்
இன்றைத் துறந்து திரிகிறார்கள்

நேற்றைக் கை முழுதும்
நிறைத்து வைத்திருக்கிறான்
அதில்
நேற்றைய பூக்களும்
மலர்ந்தே இருக்கின்றன
பெளர்ணமிக்கு முந்தைய நாளின்
முழுமைக்கு மிக அருகிலான
நேற்றைய நிலா
மேகங்களை உரசிக்கொண்டிருக்கிறது

உதடுகளின் வழி உள்நுழைந்து
பாதம்வரை சென்று
பின் தலைக்கேறி
மீண்டும் உதடு தொட்டு
சுழற்சியில்
நேற்றின் பாடலொன்று
அவனுக்குள்
இசைத்தபடியிருக்கிறது

இன்றின் சிறுகீற்றைக் கிள்ளியெடுத்து
அவனிடம் நீட்டிப் பாருங்கள்
நாளை இது கிட்டாதெனவும்
சொல்லிப் பாருங்கள்

ஒரு பதட்டமும் இன்றி
நிரம்பி வழியும் கைகளைக் காட்டி
இங்கு இடமில்லை என்பான்
இன்றை நேற்றைக்கு வர
உத்தரவிடுவான்

கடந்தகாலத்தைக் கடக்க வேண்டும்
என்றோ
உன் கையில் இருப்பது இறந்தகாலம் என்றோ சொல்லிவிடாதீர்கள்

இன்றுடன் அவன்
வாதிட விரும்புவதில்லை
உங்களுக்குப் பதிலுரைக்க
வந்துகொண்டிருக்கிறது
காலம்

சிராங்கூன் டைம்ஸ் – மார்ச் 2022

The post நென்னல் மணம் first appeared on சுஜா.