Mostafa Nawarg's Blog, page 6
May 11, 2022
هالك وإعلانات كومباوند ماونتن فيو
“ هالك “ ، وإعلانات كومباوند « ماونتن فيو »
تُعدّ “Mountain View” من بين شركات التّطوير العقاري الخاصّة الرّائدة في مصر. تتخصص “Mountain View” في تطوير مساكن ومُنتجعات من الدّرجة الأولى، وتضم أكثر من عشرة مشاريع في جميع أنحاء مصر، في بعض المواقع الرّئيسية في البلاد، بما في ذلك شرق وغرب القاهرة وساحل البحر الأحمر والسّاحل الشّمالي.
تجذب «ماونتن فيو» المستثمرين المحليّين والدّوليّين بالتّساوي، وتلتزم بالمعايير الدّوليّة للجودة وتعمل جنبًا إلى جنب مع شركات الهندسة والتّصميم والاستشاريّين المؤهلين تأهيلًا عاليًا لتقديم المشاريع التي تُبتكر لتعزيز تجربة المستخدمين سواء كان موضوعًا مميزًا أو مناظر طبيعيّة عالميّة أو استخدام أحدث التّقنيات، فإنّ مشاريع «ماونتن فيو» لا مثيل لها من حيث القيمة والجودة.
أهلًا وسهلًا بحضراتكم..
كان نفسي أطلع وأنا عامل زي الأستاذ “جابر القرموطي” ولابس ليكوا لبس «هالك» الرّجل الأخضر 
بس الحقيقة حسيت إن أنا مش هليق فيه.
ليه «هالك»؟ لأن هو ده موضوع حدوتنا النّهار ده.
وهنتكلم فيها عن التسلسل المنطقي للتفكير:
1- مين هم عملائي؟
2- موجودين فين؟
3- مشكلتهم إيه؟
4- هعالج مشكلتهم إزاي؟
“ماونتين فيو هايد بارك” طلّعت “ماونتين فيو هايد بارك” زي ما حضراتكم عارفين كمبوند راقي وشهير جدًا فسعر المتر فيه غالي جدًا جدًا.
حدّوتة النّهار ده هتورينا إزاي أقدر أبحث عن عملائي –الشّريحة الصّحيحة– موجودين فين؟
وبعدين إزاي أقدر أخاطبهم وأقنعهم إن هما يجولي وهو ده اللي عملته “ماونتين فيو” من خلال سلسلة الإعلانات الشّهيرة اللي ظهر فيها ناس بتتحوّل الى الرّجل الأخضر زي ما هنشوف النّهاردة مع بعض.
1- “ماونتين فيو” سألت نفسها هو فين النّاس الغنية؟ فين أعلى سعر متر للأرض في مصر كلّها؟ لقوه في منطقتين:
المنطقة الأولى: هي الزّمالك والمهندسين والدّقي والعجوزة؛ الحتة الرّاقية بتاعة الجيزة زي ما حضراتكم عارفين.
والمنطقة الثّانية: لقوا أيّ حدّ ساكن على كورنيش النّيل، طبعًا هناك الشّقق غالية جدًا.
بس آدي أول خطوة، يبقى مين يقدروا يشتروا عندي؟ حدّدت هما موجودين في أيّ مناطق جغرافية.
2- تعالى بقى شوف هي إيه مشاكل النّاس اللي ساكنين في المناطق دي؟ لو سلّطت الضّوء على مشكلتهم أوي؛ وقولتلهم إن أنا عندي لا وجود لهذه المُشكلة 90% مُمكن يبيعوا أماكنهم اللي ساكنين فيها؛ ويجوا يسكنوا عندي؛ وأبقى كده نجحت.
– بدؤوا الأوّل بالمناطق المزدحمة اللي إحنا عارفينها: المهندسين والعجوزة والدّقي؛ ودي أكبر مُشكلة أصدقائي كلّنا بنواجهها لما ننزل هناك، ركنة العربيّة، ما بنلاقيش ركنة للعربيّة.
وهو ده اللي صوّرته «ماونتين فيو» في أوّل إعلان لما جابت الشّخص المُحترم اللي عمال يركن وكلّ ما يجي يركن اللي يقول له: لا دي بتاعة الأستاذ “محمد” واللي يقول له: لا باشا متقفلش على الكُشك بتاعي ويروح جارر جرايد قافل بيها عليه السّكة، فالرّاجل يتنرفز ويتعصب ويتحوّل لــ «هالك» ويكسّر الدّنيا!
– تاني إعلان عملوه لأصحاب الشّقق اللي على كورنيش النّيل، قعدوا يفكّروا كتير.
–ولازم حضرتك تعمل تعايش مع العميل بتاعك عشان تفهمه أوي، إيه المُشكلة إنّك تأجّر شقّة على الكورنيش وتقعد فيها 3 أيام لغاية ما تجيلك الفكرة!
لغاية ما اكتشفوا المُشكلة الرّئيسية على الكورنيش هي المراكب السّياحية اللي بتفضل سهرانة لغاية الصّبح، ولأن أهمّ حاجة عندنا هما ولادنا، فجابوا طفل صغير طول اللّيل مش عارف ينام من دوشة المراكب السّياحية، يصحى الصّبح طبعًا مش فايق، ينزل يروح المدرسة ببنطلون البيت، أصحابه يتريقوا ويتنمّروا عليه، يزعل ويرجع البيت، يلاقي المركب مشغل الأغنية، فيتحول لــ«هالك» وينزل يكسر المركب.
– لغاية هنا الدّنيا كانت ماشية كويس جدًا، لغاية ما واحد طلع قالهم ثانية واحدة: في ناس يا جماعة في كلّ المناطق المُستهدَفة دي؛ واخدة الشّقق من زمان جدًا إيجار قديم، النّاس دول ميقدروش يبيعوا الشّقة ويجولك؛ لأنّهم بيدفعوا 9 جنيه إيجار شهري!
وابتدوا يفكّروا طيب أنا عايز الشّريحة العالية اللي قاعدة في شقق تمليك، ما تيجي أكرههم في ممارسات جيرانهم اللي مُمكن ميكونوش من نفس الطّبقة المادّية بتاعتهم؟
وهنا ظهر الإعلان التّالت بتاع السّت اللي بتشتكي من جيرانها اللي بيِتْبَلّوا عليها، فبيرموا الزّبالة على السّلم ويقولوا إن هي اللي رمتها، فتتحول لـ «هالك» وتكسر الدّنيا.
أصدقائي الأعزّاء يمرّ التّسويق زي ما شوفنا كده بعدة مراحل:
المرحلة الأولى: أنا هعمل إيه؟
المرحلة الثّانية: عملائي فين؟
المرحلة التّالتة: عملائي مشكلتهم إيه؟
والمرحلة الرّابعة: الفكرة الإبداعية اللي تطلّع في الإعلان زي «هالك».
وتوتة توتة خلصت الحدوتة.
The post هالك وإعلانات كومباوند ماونتن فيو appeared first on د. مصطفى نوارج.
