Mahmoud Anas's Blog

جنين

زمان و انا كنت جنين
انا كنت بداوي الوحدة
فارمي وداني مع الناس
"و اسمع من ناس" مبروك
"و اخبار الحمل معاكي؟"
و ساعتها ماكنتش فاهم
ليه كانت امي بتفرح
رغم انها كات حاسه
برجليا و ايدي بخبط
و ساعتها انا كنت استغرب
ليه كل الناس سايباني

طريق

ابوك ماكانش يجرؤ يسيبك
تعدي الشارع لوحدك
دلوقتي بيسيبك
امك كل ثانية تقريبا ..
كانت بتسأل عن غيابك
دلوقتي بتسيبك
اخوك كان بيلف ايده
حوالين رقبتك
و عمره مايفارقك
دلوقتي بيسيبك
روحك .. لما هتدفن
هتخاف م الضلمة
و هتسيبك

أساطير

معايير الناس مش ثابته
و الكون مالهوش معايير
شوفت السمرا بتسحرني
و البيضا بتشبه جير
شوفت البيضا بتأسرني
و السمرا كما القصدير
ما أمنتش بالأساطير
و لا وصف الناس للناس

وحدة

تمشي تلاقي ف سكِتَك
نوح الغلابة ف الطُرُق
انتوا مين ؟
دول التَمن
كل اللي حضنوا الرصيف
فطبطب عليهم ؛ اتصاحبوا
تمشي تلاقي ف سكتك
كرسي و صاحبُه
القهوة آخر حاجة مازهدهاش
جايز عشان
كل الحكاوي هنا .. ببلاش
في ناس بتلجأ غَصْب للوحدة \ ماتحبهاش

اول علامة نصر

سيبك من الحاجات الثابتة
و اخرج بكامل ارادتك
عن مجريات الكون
و صدقني اول علامة نصر
انك تبان مجنون

ماملكش ريش

كان سهل نضحك
بدون تكلُف ف الصور
و بدون مانرسم ع الوشوش الزيف
و بدون رصيف ... كان سهل نمشي لحلمنا
على قدنا نقدر نعيش
كان سهل نفرح بالصيام
و ماكانش لازمنا الياميش
و انا مش بليق ف حاجات كتير
و لا نفسي اطير .. و لا عندي ريش

غربة

ماكانش صوت السارينا لكن
كان صوت زعاق القطر حُزناً
آخر محطة اكتر مكان ..
بيحَسِس القطر انُه وَحدُه
احنا اصحابه اللي دايما
بنبيعه وقت مانلقى سكتنا

برواز

الناس براويز و الدنيا شروخ
لو طالك هم الصورة تبوخ
الذنب يتوه جوه العاصي
الذنب كبيرة ف حق شيوخ

دماغ

ساكت بتسمع في حكاوي الناس
سارح بتسرق م الدقايق حلم
حلو السهر و الضحك ليك ونَّاس
حواليك رصاص و انت عاشرت السلم

ساند على الفراغ

شحات بيشحت من شحات
مريض بيسند على موجوع
مجروح بيبكي ف حضن دايب
غايب بيلوم حد غايب
شايب بيتعكز على قشة
تايه بيستنجد بتايه
غريب بيستغرب غريب