Ramy liked it

“عايش على النوستالجيا
وحنيني للماضي..
مشوّش حياتي الجاية
بفكّر كتير ف زمان
وبعيش ع اللي كان
طب وأنسى حاجة إزاي
مترسّخة فيّا
أنا خايف أكون ف الجاي
صورة منسيّة
أنا ساند على حيطان الماضي
ومتلصّم ببواقي الذكرى
معرفش بقى بحن بالفطرة
لأيام كانت إمبارح
وناسي إنه فيه بُكرة
وفكري بالحنين سارح
ف عَبَق الماضي وإحنا صُغار
برغم بساطته..لكن صورته
لسه محوطاني ليل ونهار
نوستالجيا لأي حاجة زمان
صورة..شخص..مزيكا..فيلم..أغنية
أي حاجة بتصحّي الحنين فيّا
حتى الروايح والأماكن
أثرها لسه ف الوَجد ساكن
كام ذكرى عالقة ف الخيال
أو زي ما قالوا ف الأمثال
كل أول كان أبرك من آخر
أو الإنسان..بطبعه
بيميل للحنين لزمان
ولا ده سرّه..
إن الماضي ولّى وخلاص إنتهى
ومبقاش بإمكانك ترجع
لحاجات زمان عيشتها
فمن البديهي نسيت عيوبها
ف بتشتاقلها..
وإن رجع بيك الزمن
كنت بنفسك سيبتها
واللي زي حالاتي
مصابين بفرط النوستلجة
الحنين ممزوج بالألم
لشيء راح للأبد
والخوف من إنه فعلاً إتفقد
ومستحيل هيعود..
ف قلبت لحالة مرض
قابلت وشوش مابعرفهاش
بشوفها طشاش
وفارقت وشوش بتحبني
أنا خايف من غيرها أنحني
ف بعمل باك للفلاش
كل ذكرى كات قديمة
بتعدّي زي شريط السيما
ومابنساهاش
عندي داء النوستالجيا
بيجيلي ف كل الأوقات
وساعات..بحس إني خبر كان
وإن الزمان مش زي زمان
وبحن كتير أشوف في الحاضر
الماضي بيرجع مش بيغادر
وأحلم مكونشي إنسان ضايع
قُدّامه مستقبل مُبهم بيصارع
وفجأة أفوق..وأفتّح عيني
ألاقيني..رجعت لفعل مُضارع”
― نورا خشبة, قفص عصافير

7 likes

No comments have been added yet.