Newcomer يا الف اهلا يا ميت مرحبا ..

[Ahmad]

Reham wrote: "السلام عليكم ورحمة الله وبركاته
بدايتى مع القراءة بدأت من زمن غير بعيد ..قترات تتجلي واخري تنسلخ من حبي ومواظبتى واخري من اهمالي للقراءة
:
:
:
خلاص نبدأ بقي :
عرفت الموقع من واحدة صاحبتى ..موقع ر..."


اهلا ريهام .. نورتي الموقع ..
ان شاء الله يكون جروبنا عند حسن ظنك ... وتكوني انتي عند حسن ظننا ... وتستفيدي وتفيدي كل القراء
وربنا ما يجيب خمول ابدا .. شدي حيلك انتي معانا بس ..

خدي لفة في الجروب واتفرجي فيه كويس ..
وفيه فهرس لسه عامله جديد وبيتحدث . هيفيدك انتي وكل القراء الجدد ان شاء الله

https://www.goodreads.com/topic/show/...

نورتينا

[Mona]

اهلا بحضرتك
منى عبد اللطيف ..كاتبة قصص قصيرة و مقالات أدبية و خواطر
بدايتى مع القراءة من فترة طويلة جدا ...و القراءة مش بس غذاء للروح ولكنها تعتبر المادة الخام للكاتب الذى يطوعها كيف يشاء ...انا كاتبة جريئة نوعا ما و دا ال بيميزنى عن غيرى ...انا سعيدة جدا بانضمامى لحضراتكم ..و للتعرف عليا اكتر ..دا الفيس بتاعى ..
https://www.facebook.com/profile.php?...

[Ahmad]

gehad wrote: "أنا هنا من فتره بس مش كبيره بس لسه فى الخط النايم فى الجروب ده
على العموم أنا بحب القراءه جدا من وأنا صغيره من ميكى وماجد
وأميرات لحد الروايات
عرفت الجروب لما كنت بدور على حد بيحب يقرأ مش كل مقول..."


اهلا بيكي يا جهاد نورتينا .. وانتي خلاص بقيتي في الخط الساخن يا افندم .. :) شدي حيلك بس وتابعي معانا وفيدينا بافكارك وارائك وقرائاتك .. واستفيدي .. ونورتينا

[Ahmad]

Mona wrote: "اهلا بحضرتك
منى عبد اللطيف ..كاتبة قصص قصيرة و مقالات أدبية و خواطر
بدايتى مع القراءة من فترة طويلة جدا ...و القراءة مش بس غذاء للروح ولكنها تعتبر المادة الخام للكاتب الذى يطوعها كيف يشاء ...انا ..."

اهلا بيكي يا مني .. نورتي الجروب
واكيد تواجدك هيثري الجروب ان شاء الله وتفيدي الجميع وتستفيدي ، ويشرفنا تعرضي اصداراتك في قسم (اصدارات الاعضاء الجديدة) .. وعجبني وصفك للقراءة بانها مادة الكتابة الخام ... تشبيه في محله جدا

دمتي مبدعة .. وبالتوفيق

[Lobna]

انا لبنى .. عرفت الجروب من واحده صحبتى هنا عندكم ، القرايه بالنسبالى هروبمن واقع و حياه تانيه اقدر اعشها جوا الصفحات .. و تجارب جديده بتعلمها من كل روايه .. مليش فى الكتب اوى ، اكتر روايات لان هى الى بعيش فيها حيوات تانيه :) بس كده

[Ahmad]

Lobna wrote: "انا لبنى .. عرفت الجروب من واحده صحبتى هنا عندكم ، القرايه بالنسبالى هروبمن واقع و حياه تانيه اقدر اعشها جوا الصفحات .. و تجارب جديده بتعلمها من كل روايه .. مليش فى الكتب اوى ، اكتر روايات لان هى ا..."

اهلا بيكي يا لبني .. نورتي الجروب
وان شاء الله تستمتعي بوقتك معانا وتستفيدي ...
والقراية لو كانت ظاهريا هروب من الواقع .. الا انها وكأثر ثانوي تدريجي بتساهم في تشكيل الواقع بتاعك للاحسن .. واتمني انها تشجعك علي مواجهة الواقع بتاعك وتغييره للاحسن . مش بس الهروب منه ..

نورتي :)

[أحمد]

اولا اهلا بكل اعضاء الجروب
ثانيا انا عرفت الجروب ازاي كنت بدور علي كتاب اقراءه وحبيت يكون حد يشاركني الراءي فدورت علي الجروبات هنا واشتركت
بحب القراءه والكتابه طبعا بس للاسف مشاغل الحياه
اخر 3 روايات قريتهم
الفيل الازرق
قواعد العشق الاربعون
هيبتا

وحاليا بدور علي روايه تكون جيده زيهم اقراها
احس فيها ببلاغه الكاتب واعيش معاه روايته واكون متحمس لانهائها وميصبنيش الفتور زي بعض الروايات

بالنسبه للمشاركه اكيد ما سمح الوقت بذلك

تحياتي

[Dreamer]

أنا جديدة ربما تظأخرت في التعريف عن نفسي أنا أستسقي من القراءه تعرفت على القروب بالصدفة وأشكر الله على هذي الصدفة الجميله أتمنىأن أكون شخص خفيف و أهلن بكم ^^

[Dr.ehab]

سلام عليكم انا د.ايهاب محمد طبيب بدرس ماجستير فى القصر العينى قارئ نهم لكل اصناف الكتب من الرواية الى السياسة الى التاريخ و الفلسفة و غيرها و للاسف انشغالى بالدراسة و العمل حارمنى من المشاركة فى المجموعة من انضمامى ليها اللى فات عليه شهور

فاعذرونا

[Ahmad]

أحمد wrote: "اولا اهلا بكل اعضاء الجروب
ثانيا انا عرفت الجروب ازاي كنت بدور علي كتاب اقراءه وحبيت يكون حد يشاركني الراءي فدورت علي الجروبات هنا واشتركت
بحب القراءه والكتابه طبعا بس للاسف مشاغل الحياه
اخر 3 رو..."

اهلا بيك يا احمد نورت الجروب
وان شاء الله تشاركنا كل ما يتاح عندك وقت وتفيد وتستفيد ، وهتلاقي في الجروب هنا وفي الجود ريدز عموما ريفيوهات ومناقشات عن روايات كتيرة قبل ما تقرأها تعرفك هي تستحق القراءة ولا لا ..

ومادام بتدور .. وقريت الفيل الازرق .. طب اقرأ بقا لنفس الكاتب .. تراب الماس ...

نورت :)

[Ahmad]

Dreamer wrote: "أنا جديدة ربما تظأخرت في التعريف عن نفسي أنا أستسقي من القراءه تعرفت على القروب بالصدفة وأشكر الله على هذي الصدفة الجميله أتمنىأن أكون شخص خفيف و أهلن بكم ^^"

اهلا بكي اختي .. نورتي الصفحة وان شاء الله تكوني عضوة فعالة في الجروب وتستفيدي وتفيدي كل الاصدقاء ..
بس اتفاعلي وارجعي تاني عرفينا اكتر عن نفسك وكلمينا عن عاداتك في القراءة واللي بتحبي تقريه . .

نورتينا :)

[Ahmad]

Dr.ehab wrote: "سلام عليكم انا د.ايهاب محمد طبيب بدرس ماجستير فى القصر العينى قارئ نهم لكل اصناف الكتب من الرواية الى السياسة الى التاريخ و الفلسفة و غيرها و للاسف انشغالى بالدراسة و العمل حارمنى من المشاركة فى ا..."

اهلا بيكي يا د. ايهاب معانا .. نورت الجروب
وربنا يعينك علي الماجستير ويباركلك في وقتك عشان متتحرمش من متعة القراءة ، اللي لولا حبك ليها سابق الطب كان هيبقي صعب جدا تحبها وتتعلق بيها بعده وبعد ما تنشغل بدراسته ..
في انتظار ولو 10 دقايق من وقتك تتصفح فيهم الجروب وتتابع الجديد ، واحدث الكتب .. وتفيد وتستفيد ، واتمني لك كل التوفيق في الماجستير ان شاء الله ..

نورتنا :)

[Gilan]

انا جديده، مكنتش بفتح النت عشان الدراسه و كده بس انا في gade 10 الدبلومه الامريكيه و بحب القرائه من زمان و نفسي اخش اعلام قسم صحافه او تليفزيون بس طبعا اهلي مش موافقين عامتا بقرأ من سنتين تقريبا روايات و كده و ابتديت بسبب اختي الكبيره كانت بالصدفه نزلت ربع جرام pdf بس هي مكملتش و انا بقيت بقرأ كتير جدا نصهم pdf لغايه مفتحوا مكتبه الف بقيت بشتري منها و قريت كتب كتير في اﻷجازه بس حاليا لسه مستنيه اجيب كتاب جديد معلش طولت عليكوا و فكره الجروب حلوه :)

[Ahmad]

Gilan wrote: "انا جديده، مكنتش بفتح النت عشان الدراسه و كده بس انا في gade 10 الدبلومه الامريكيه و بحب القرائه من زمان و نفسي اخش اعلام قسم صحافه او تليفزيون بس طبعا اهلي مش موافقين عامتا بقرأ من سنتين تقريبا رو..."

اهلا بيكي يا جيلان . نورتي الجروب
(كتبت الاسم صح ولا ايه ؟)
هو مبدئيا انتي مطولتيش ولا حاجه .. انتي هنا لسه هتتعلمي الرغي اكتر واكتر، ومستنيين منك تعرفينا عن نفسك اكتر واكتر من خلال مشاركاتك وتفاعلك معانا، وان شاء الله هتحبي القراية اكتر وتتعلقي بيها وتبقي جزء اساسي من حياتك ..

القراية الالكترونية وفرت علينا كتيير كلنا ... وان كان الواحد ميقدرش ابدا يستغني عن الكتب الورق ومتعة قرايتها ... كوني مكتبتك ... وهتحسي بسعادة كبيرة

واقري معانا لو فيه وقت كتاب شهر اكتوبر وناقشيه معانا
او تابعي معانا في قرايات الشهور الجاية ..

نورتي :)

[Dreamer]

بسبب مشاغل الحياة تأخرت عن التفاعل في القروب أنا فتاه عاطله عمري 19 سنه احب اقرا الكتب التاريخيه والفلسفه وخاصه الكتب الفكريه احب الكتابه جدا لكن مازالت ظروف الحياة تاخرني عن التقدم في القراءه... والكتابه
اما عاداتي في القراءه فكل كتاب اقراءه يجب اعمل له بحوثات من ناحية المواضيع أرجو ان اكون عضو فعال بينكم واعوض كل اللي اوقت اللي فات في القراءة
مشكورين

[Samaa]

السلام عليكم احب بداية اشكركم على الاهتمام البالغ والتقدير بالاعضاء الجدد
انا عندى مشكله في القراءة ..انا عندى حب اطلاع لكل ماهو جديد وبحاول استفيد واطور من اى حاحة او اى حدث او اى معلومة بتحصل ولكن ..مش عارفه هل ممكن لو بدات قراءة في كتاب معين هياثر ده على تفكيرى _انا في3ثانوى_ وطبعا سنه مهمة جدا بالنسبالى ....مش بتكلم على الوقت اللى هاخده في القراءة وانما بتكلم عن الانشغال الفكرى هل ده فعلا ممكن ياثر او لا؟؟
واية نسبة الفائدة اللى هتعود عليا
اشكركم جميعا ودمتم قرّاء مثقفين (((:

[Dreamer]

Samaa wrote: "السلام عليكم احب بداية اشكركم على الاهتمام البالغ والتقدير بالاعضاء الجدد
انا عندى مشكله في القراءة ..انا عندى حب اطلاع لكل ماهو جديد وبحاول استفيد واطور من اى حاحة او اى حدث او اى معلومة بتحصل ولك..."
نعم بكل تاكيد انا اول كتاب قراته تغير تفكيري و نمط حياتي يعني اصبح اختلاف واضح قبل القراءه وبعد القراءه وطبعا للافضل وبما انك شخص محب للاكتشاف والتعلم اتوقع راح تكونين شخص مميز بقوه اذا قرأتي موفقه ^_^

[Samaa]

انا اقصد الانشغال الفكرى بعيدا عن الانشغال الدراسي ..يعنى ممكن اقرا كتاب عن قضية معينه اوحى الي بفكرة معينه يظل فكرى مشغول بهذه الفكرة ..مع ان الاولى الانشغال الدراسي لانها تعتبر سنه مصيرية ..ده طبعا مجرد افتراض
ف مش عارفه اقدم ع الخطوة ولا اخلينى في الاهتمام الكلى والجزئي بالدراسه لحين ماتنتهى المهمة وابدا في الانطلاق ؟؟!! دى الفكرة اللى بتكلم فيها

[Nada]

السلام عليكم
جديدة على الجروب..
أحب القراءة و أكتب أحياناً.. و أحب جداً أنا اتابع أراء القراء حول ما يقرأونه.. لهذا أنا هنا ^_^

[Ahmad]

Dreamer wrote: "بسبب مشاغل الحياة تأخرت عن التفاعل في القروب أنا فتاه عاطله عمري 19 سنه احب اقرا الكتب التاريخيه والفلسفه وخاصه الكتب الفكريه احب الكتابه جدا لكن مازالت ظروف الحياة تاخرني عن التقدم في القراءه..."

اهلا بيكي .. .نورتي الجروب
عجبني كلامك عن عاداتك في عمل بحوث عن موضوعات الكتب الي بتقريها .. شئ مفيد جداا وبيثري ويعمق معرفتك ..
زي ما بيقولوا .
لو قريت 5 كتب عن موضوع واحد هتبقي من اعلم اهل الارض بيه ..

استمري .. واتمني منك تفيدينا بابحاثك بنشر مواضيع بحثتي فيها وفتح باب للمناقشة وعرض للكتب اللي تخص الموضوع ..

نورتي :)

[Ahmad]

Samaa wrote: "السلام عليكم احب بداية اشكركم على الاهتمام البالغ والتقدير بالاعضاء الجدد
انا عندى مشكله في القراءة ..انا عندى حب اطلاع لكل ماهو جديد وبحاول استفيد واطور من اى حاحة او اى حدث او اى معلومة بتحصل ولك..."

نورتينا يا سما .. وان شاء الله تفيدي وتستفيدي .. وربنا يوفقك في ثانوي وتدرسي في الكلية اللي تتمنيها ..

بخصوص سؤالك

الانشغال الفكري بعد قراية كتاب ضرورة .. لانه لو محصلش يبقي ضيعتي وقت ..

لما بتتفرجي علي فيلم اجنبي حلو . ولما يخلص تلاقي دماغك لسه شغال وبتفكر في احداثه ... وقتها بيبيقي الفيلم فعلا فكرته تستاهل ويستحق المشاهدة ..

القراءة مش عملية تلقي يا سما
القراءة هي مناقشة بين عقلك وعقل الكاتب ...

فمن ناحية التأثر:
مينفعش تقبلي افكار اي كتاب كأنها مقدسة .. اقبلي اللي يقتنع بيه اعقلي وارفضي الباقي .. ومتكمليش الكتاب لو مكنش جذاب لعقلك او حسيتيه ساذح او لا يستحق القراءة .. متحسيش بالذنب من عدم اكماله ..

من ناحية الانشغال بعده :
الانشغال لازم يكون اثناءه وبعد قرايته بتبقي كأنك طالعه من معركة حربية . فيه ضحايا عندك (افكار غلط ماتت) وفيه افكار في الكتاب جايز كمان غلط .. وفي النهاية بتستفيدي في الحالتين

حتي لو الكتاب كله افكاره غلط . بتستفيدي انك عرفتيها وهتقدري توضحي لغيرك الصح من الغلط بخصوصه ..

============= خلاصة كلامي
انشغلي وفكري اثناء وبعد القراءة .
ودا مش هيأثر علي مذاكرتك في حاجه .
العقل عضلة .. كل ما تستعمليها تقوي وتكبر
العقل بدون تفكير ... بيقف عن النمو ..

نورتينا :)

[Ahmad]

Nada wrote: "السلام عليكم
جديدة على الجروب..
أحب القراءة و أكتب أحياناً.. و أحب جداً أنا اتابع أراء القراء حول ما يقرأونه.. لهذا أنا هنا ^_^"


اهلا يا ندا نورتينا :)
ايه الرغي دا كله .. عيني وجعتني من كتر الكلام اللي كاتباه ...

ارجعي تاني ونبي كملي كلام .. ارحب بيكي ازاي انا دلوقتي بالكلمتين الخطف دول ؟ :) ولا الناس تعرفك ازاي ؟

نورتينا مؤقتاً... لحد ما تيجي تنورينا وتكملي

[أسماء]

وكأني صحوت من غيبوبة دامت طويلا !
عزيزي احمد ، لطالما وصلتني رسائلك عن المجموعة وفعالياتها طوال ثلاث أعوام ماضية ، كنت أشعر فيها بالخجل الشديد من تقصيري نحو القراءة التي كانت كنبض يسري في عروقي وتوقف لوقت من الزمن فجفت معة افكاري وانحدرت لتهتم بالصغائر دون مهمات الأمور !



اسمي أسماء,
عضوة قديمة للموقع
أخذتني الحياة بعيدا عن متنفسي
قررت أن أعود مع مطلع السنة الهجرية الجديدة ملحقة اياها بالميلادية المجيدة للعام الخامس عشر بعد الألفين ..
قررت ان أخذ كبسولات وجرعات وفيتامينات بكميات مكثفة حتى استعيد نشاطي الفكري وقدرتي الكتابية والكلامية
قررت أن أتوقف عن الانحدار وأعود للتسلق نحو القمة التي لا
أعلم لأي مدى يصل رأسها ..



هل أنا بعيدة جدا !!
هل قطع غيري مسافات كبيرة وبات من المستحيل اللحاق بالركب ؟
هل سأحبوا أم سأركض ؟
مشاعر متناقضة تجول بخاطري
مابين حماسة مفرطة وخوف أليم من فجوة المسافة بيني وبين ذاتي اولا وبيني وبين الأخرين ثانيا ..



لا أعلم كيف ابدا ولا من أين
ولكني أعلم أن ما علي اللحاق به كبير جدا جدا
لذا ، قررت شحذ همتي محاولة استجداء مهارتي القرائية عبر خالدة الغزالي (جدد حياتك)، سأئلة المولى لأن يجدد حياتي ويصبغ التنور على افكاري و أن يكلأني واياكم بعين رعايتة وأن يسدد خطانا انه على ذالك قدير .


أطلت عليك
وشكرا لك





أسماء,
3/1/1436

[Ahmad]

Asmaa wrote: "وكأني صحوت من غيبوبة دامت طويلا !
عزيزي احمد ، لطالما وصلتني رسائلك عن المجموعة وفعالياتها طوال ثلاث أعوام ماضية ، كنت أشعر فيها بالخجل الشديد من تقصيري نحو القراءة التي كانت كنبض يسري في عروقي وتو..."

عزيزتي اسماء ..
بعض الكلمات تجرفنا لقرائتها بشغف كأنها كوب قهوة شهي بعد تعب يوم طويل .. وكلماتك عبيرها يعكس صدق انفعالك وحبك للقراءة وشغفك للعودة لاحضان عالمها الاخاذ كما تعبر صورة صفحتك ايضا ..
ربما هي اشتاقت لكي فدعتكِ .. او ربما كنتما علي موعدا طال انتظاره ..
المهم الا تعودي لفرقتها ..
اقرأي كل يوم .. ولو سطر ... اقرأي ولو ما يكتبه عقلك .. وفقط

ولا تنشغلي بالمسافة او باللحاق بالركب ... فالركب ركبك انتي .. والعلاقة بين اي احد والقراءة .. علاقة شخصية بحته... لا تقارن باخر .. ربما قرات الف كتاب .. وقرأتي انتي مائه ... ولكن عمق قرائتك تجعل الكلمة بالف ..

المهم هو .. كيف تستقبلين ما تقرأين .. وكيف يصوغه عقلك .. وينتج ابداعا جديدا ..
المهم دوما ..... هو أنك تقرأين .... وفقط ..

سعيد انا بوجودك وبكلماتك المعبرة ... وفي انتظار تفاعلك ونشاطك والمزيد من حروفك الرشيقة التي تجبر العين علي قرائتها .

شكرا جداااا للاطالة ... ودمتي بخير ..
ونورتينا :)

[Ahmad]

Essraa wrote: "السلام عليكم :-)
اسمي إسراء و مبعرفش اكتب بحب اقرا الروايات فقط لا غير بس كده :-D"


اهلا يا اسراء نورتينا ... وان شاء الله تحبي القراءة اكتر واكتر مش بس الروايات ..

بس مبتعرفيش تكتبي يعني ايه ؟
مانتي كاتبه جملة اهو .. وخطك حلو كمان ماشاء الله
:)

[Ahmad]

Essraa wrote: "اصلي لقيت كل واحد كاتب كومينت صفحة بحالها :-D
قصدي مبعرفش اكتب قصص او شعر او كده :-)))"

ماهو دا المطلوب يا اسراء .. الموضوع دا مفتوح مخصوص عشان ترغوا براحتكم وتفضفضوا وتعرفونا بيكم ... فرصة بقا :)

[Samah]

سلام عليكم ورحمه الله وبركاته :)
أزيكم جميعا
الصراحه انا مش فاكره مين عرفنى على الموقع بس اعتقد من جروب افضاه على فيس عرفت عن الموقع :)
انا سماح دكتورة اشعه
بحب القراءه من زمان ما اعرفش ليه يمكن علشان طلعت لقيت اختى الكبيرة
بتحب القراءه وطبعا اول ما بدات بدات بقراءه ميكى وسمير وبعدها روايات مصريه للجيب السلسلتين الاشهر عاى الاطلاق رجل المستحيل وملف النستقبل ومرورا بالمغامرون الخمسه والشياطين ال 13 اظنكم عرفتوا الجيل :)
فكررت شويه قبل ما اكتب هنا بس اخدا القرار ورضيت عنكم وكتبت :)
والمهم انا مبسوطة من الموقع وباخب الجود ريدز
وكفايه كده وجعت لكم دماغكم

[Ahmad]

Samah wrote: "سلام عليكم ورحمه الله وبركاته :)
أزيكم جميعا
الصراحه انا مش فاكره مين عرفنى على الموقع بس اعتقد من جروب افضاه على فيس عرفت عن الموقع :)
انا سماح دكتورة اشعه
بحب القراءه من زمان ما اعرفش ليه يمكن عل..."

اهلا بيكي د. سماح .. نورتي الجروب
الخط اللي مشيتي فيه ف حبك للقراية اعتقد اغلبنا كان علي نفس الخط .. بالاضافة طبعا لعبقريات احمد خالد توفيق .. :) ما وراء الطبيعه واخواتها ..

مش عارفين نشكر مين علي الرضا دا كله من سعادتك وتواضعك اللي خلانا نقرا كلامك هنا .. :) اما عن دماغنا فلسه موجعتناش .. خليكي واثقة في كدا .. لان الرغي وتقبل الرغي ثمة اساسية في محبي القراءة :)
دا بافتراض ان الكلمتين بتوعك دول رغي اصلا !!
:)
نورتينا

[Nada]

شكراً يا أستاذ أحمد على ترحيبك :)
الحقيقة أني عندما كتبت تعليقي اﻷول لم يكن عندي أي رغبة في الرغي و الكلام..
لكن أعتقد أنه يمكنني أن أرغي اﻵن..
بدأت القرءاة و أنا طفلة فكنت أقرأ المغامرين الخمسة و قصص المكتبة الخضراء.. ثم أصبحت أكبر قليلاً و بدأت روايات رجل المستحيل و عبير و زهور..
مشكلتي أني أرتبط بمن أقرأ لهم و لا يسهل علي أن أشتري كتاب لكاتب لم أسمع عنه.. أو سمعت عنه ممن ذوقهم يختلف عن ذوقي..
و ﻷتغلب على هذه المشكلة أصبحت أهيئ نفسي و أنا أشتريه أن الكتاب قد ﻻ يستحق ثمنه و قد يكون تجربة سيئة.. و أعتقد أني نجحت.. و اتسعت دائرة من أقرأ لهم قليلاً و قل ارتباطي بهم كذلك..
أحب أن أقرأ مقالات عبد الوهاب مطاوع جداً.. أحبها أكثر من قصص بريد الجمعة التي عرف بها.. أحبها ﻷنها شخصية جداً و إنسانية ﻷقصى درجة.. هو حقا كما يكتب عنه على أغلفة كتبه رائد اﻷدب الإنساني..
و أحب كذلك مقالات أحمد خالد توفيق فلديه ميزة رائعة نادرة جداً في هذا الزمن و هي أنه ﻻ يدعي أنه يعرف أكثر من القارئ..
أعاني مع قراءة الروايات الانجليزية بالذات.. أمل في منتصفها مهما كانت شيقة و أستصعبها مهما كانت سهلة..
أحب اللغة العربية جداً و أفضل الكتب المكتوبة بالعربية على تلك المكتوبة بالعامية..
و أحب أن أكتب خواطر و قصص قصيرة.. حاولت و أنا في ثانوي كتابة رواية و كتبت منها فصلين جميلين.. كانت رواية رومانسية.. انشغلت في الدراسة و عندما عدت ﻷكملها وجدتني تغيرت و لم أعد أؤمن بالرومانسية الموجودة في الرواية و لم أستطع كذلك أن أغيرها.. فبقيت فصلين جميلين..
لا أقرأ بانتظام و لست قارئة نهمة فقد أقرأ كتابين في السنة.. و هذا ما أحاول تغييره..
أحب جود ريدز و كيف أنه يسمح لي أن أكتب أفكاري خلال قرائتي للكتاب فأجدها و أتذكر كيف كانت رحلتي مع هذا الكتاب..
مهما كان الكتاب سيئاً أشعر أنه يجب علي إنهاؤه.. كتاب واحد الذي لم أستطع إنهاؤه.. و مهما كان الكتاب سيئا قد أقرأه مرة ثانية ﻷعطيه فرصة إلا كتاب واحد..
كفاني رغيا :)

[Samah]

ادعوالى بقلى ربنا يوفقنى فالامتحانات وارجع امارس نشاطى رغم انه مش متوقف فعليا يعنى :)

[Z]

السلام عليكم ..
بصراحه كده لحد دلوقتي ماقريتش غير حاجات قليله اوي منها ملف المستقبل و كام كتاب تانيين يمكن ما كملتهش اغلبهم للاخر .. مش بقرا الكتاب علي بعضه ممكن اخد فصول او اجزاء معينه بس .. مش عارفه ليه بس نادر لما حاجه تشدني اوي لدرجه اني اكملها لاخر ... نفسي احب القرايه و تبقي جزء اساسي من يومي لاني عارفه انها مهمه جدا و هتفيدني جدا ف كل حاجه ... انا دخلت الجود ريدز اصلا عشان اشجع نفسي ع القرايه ... احيانا بكتب خواطر و اشعار بسيطه ع قدي .. حاليا شغاله ف روايه بس لسه ف اولها و الله اعلم هخلصها ولا لا !!!
يا ريت لو حد عنده نصيحه تحببني ف القرايه يبقي يا ريت ^__^

[Ahmad]

Samah wrote: "ادعوالى بقلى ربنا يوفقنى فالامتحانات وارجع امارس نشاطى رغم انه مش متوقف فعليا يعنى :)"

ربنا يوفقك ان شاء الله وترفعي راسنا .. واكيد لما تخلصي هتشاركي بقوة في المناقشات ونشوف لمساتك في الجروب

[Ahmad]

Z wrote: "السلام عليكم ..
بصراحه كده لحد دلوقتي ماقريتش غير حاجات قليله اوي منها ملف المستقبل و كام كتاب تانيين يمكن ما كملتهش اغلبهم للاخر .. مش بقرا الكتاب علي بعضه ممكن اخد فصول او اجزاء معينه بس .. م..."


اهلا بيكي يا
z
نورتي الجروب .. ونتمني ان شاء الله تستفيدي وتفيدينا .. وردا علي كلامك ... فمبدئيا كويس جدا انك بتسعي للقراءة وللتعلق بيها .. ومفيش وصفة سحرية لسؤالك غير الكلمتين دول ..

اقرأ ما تحب .. تحب ما تقرأ

كلنا بنمل من القراية ساعات ... القراية متنفعش تكون غصب زي المذاكرة مثلا ، لانها متعة والمتعة مينفعش تسبب ملل .. بس اغلبنا بيحس بالذنب لو مكملش كتاب .
وانا بقولك لا متحسيش باي ذنب .. مادمتي بتحبي القراية وسبق وكملتي كتب .. يبقي عادي جدا تقري كلمتين من كتاب وميعجبكيش او رواية وتلاقيها مملة ... او ترفضي افكار الكتاب ..

في الحالة دي .. سبيه وعااادي جدا .. واقري في مجالات تهمك وتجذبك في البداية .. دا سر التعلق بالقراية .. وبالتدريج هتوسعي قرايتك ..

متقريش كتاب لمجرد ان الناس بتكلم عليه كتير او ان شكله حلو او عشان تقولي انا قريته .. اقري الكتاب اللي يشدك .. واللي مهتمه تعرفي عنه اكتر ..

وقبل ما تفتحيه .. اسالي نفسك ؟
انا اعرف ايه عن الكتاب دا وعن موضوعه ؟
ايه المعلومات اللي محتاجه اعرفها لما اقراه؟
ايه اللي هستفيده منه؟
واي اسئلة تانية علي بالك

هتلاقي نفسك وانتي بتقري بتجاوبي علي اسئلتك دي .. وهتحسي بمتعة لانك بتكتشفي اجابات عقلك محتاجاه ..

ناقشي الكاتب وانتي بتقري وفكري في كلامه وافكاره كأنه بيحاورك..

مش لازم تقري الكتاب من الجلدة للجلدة .. ممكن لو كتاب كبير وعايزة منه معلومات معينة .. تقري الفصول اللي تهمك وبس .. وبالترتيب اللي يريحك ..

====== باختصار
القراءة زي سواقة العربية .. لازم انتي اللي تسوقي مش العربية اللي تسوقك ..

والقراءة عملية تفاعلية بحته .. مش تلقي زي المدرسة والمدرس الممل ..

تحياتي .. واسف للاطالة عليكي

[Sama]

ازيكم ازيكم
انا سما او سماح اللى يريحكم
عرفت الجروب ازاى والله مش فاكرة انا اول ما خلت عالابلكيشن من عالفيس وانا عالجروب
عاجبنى جدا انى الاقى حد بيحب القرايه ممكن اتكلم واتنافش معاه
بحب القرايه جدا وخصوصا الخيال
مبحبش الدراما والواقع عندنا منه كتير
بحس ان القرايه بتفتح باب لعالم بعيد مش عايشة فيه
بستمتع جدا لما بقرأ راوية
وممكن لو الرواية عجبتنى افضل مبسوطة كام يوم بسببهها
بحب القرايه من وانا صغيره
اول حاجات ابتديت اقراها طبعا كانت رجل المستحيل وملف المستقبل دا خلانى اروح مكتبة المدرسه ابتدى اشارك ف النشاطات
هبقى عضو نايم او نشيط مش عارف بصراحة
مش عارف حتى ممكن اشارك ف ايه لان دخولى عالنت اليومين دول مش منتظم
اتمنى انى مكنش طولت عليكم :)

[رامي]

جروب ممتاز أحييك عليه .. أتمنى يكون نشط وفيه تفاعل دايماً
- أنا بحب القراية جدا وفي كل حاجة تقريبا .. التاريخ - الأدب
مقارنة أديان - سياسة - أدب الرحلات
كتبت روايات بسيطة وأنا صغير وكتبت شعر ولما كبرت كتبت ونشرت مقالات
ومن فترة قصيرة قررت أخوض تجربة الكتابة الاحترافية في فن الرواية ويارب أنجح

[Asma]

انا لقيت الجروب في اقتراحات goodreads app لما قرأت وصف الجروب حبيت انضم. بحب القراءة خصوصا الروايات و الشعر

[أسماء]

اسمى اسماء عرفت الموقع من ع الفيس بوك وعليه بقالى سنتين الحمد لله...عاوزة اعرف بقى الكندل الالكترونى موجود فى مصر ولا لا ؟واسعاره ومميزاته ؟

[شعاع]

اسمى شهيرة .. عرفت الجروب بالصدفة .. لسه مبتدأه من فترة قصيرة بالقراءة ..احسن عالم بالنسبة لى للهروب من اى شئ ..الكتاب بالنسبة لى هو الصديق الذى لا يخدعنى ..محتاجه لمعرفة الكثير والكثير .. حاسة انى نقصنى حجات كتير جدا على الرغم من انى فى مرحلة الدراسات العليا .

[Skena]

السلام عليكم
انا لسه عارفة الجروب النهاردة. .انا بحب القراية من زمان و بكتب قصص قصيرة..الحمدلله نزلي كتاب في المعرض اللي فات وده كان من اهم احﻻمي اللي اتحققت :)
للاسف بقالي فترة مش بقرأ زي الاول فعندي امل ان الجروب هنا يشجعني اقرا تاني انشاء الله

[Ahmad]

سكينة wrote: "السلام عليكم
انا لسه عارفة الجروب النهاردة. .انا بحب القراية من زمان و بكتب قصص قصيرة..الحمدلله نزلي كتاب في المعرض اللي فات وده كان من اهم احﻻمي اللي اتحققت :)
للاسف بقالي فترة مش بقرأ زي الاول ..."

وعليكم السلام ورحمة الله
اهلا بحضرتك استاذة سكينة .. نورتي الجروب ، وان شاء الله نسمع قريب عن كتابك التاني .. او طبعة جديدة للاول ...
وان شاء الله تفيدي وتستفيدي من الجروب ويكون عند حسن ظنك

الشهر دا قراية ومناقشة رواية الحرافيش للرائع نجيب محفوظ ان شاء الله ..

[Aya]

احم ..هو انا مش جديدة ف الجروب انا جديدة ف الموقع عامة وبصراحة مش فاهمة حاجات كتير بس لو على القراءة فانا مدمنة كتب ..يارب اعرف اتفاعل مع الناس هنا وافيدكوا بحاجة

[زهرا]

السلاام عليكم
ازيكو ؟؟
انا جديدة هنا في الموقع ومش فاهمه اي حاجه في اي حاجه ☺
حاسة اني تايهة الكتب اللي ما صدقت لقيتها مش عارفه اقراها ولا انزلها مش عارفه اتعامل خالص :( :(

[Ahmad]

Aya wrote: "احم ..هو انا مش جديدة ف الجروب انا جديدة ف الموقع عامة وبصراحة مش فاهمة حاجات كتير بس لو على القراءة فانا مدمنة كتب ..يارب اعرف اتفاعل مع الناس هنا وافيدكوا بحاجة"

اهلا بيكي يا "آيه" نورتي الجروب ..
مادمتي مدمنة كتب يبقي الباقي سهل جدا وع البركة :)
شوفي كدا الفهرس دا .. هو محتاج يتحدث بس هيفيدك ان شاء الله
https://www.goodreads.com/topic/show/...

اخر الشهر دا ان شاء الله هتكون مناقشة رواية الحرافيش لنجيب محفوظ .. وهيكون فيه تصويت لمناقشة الشهر الجاي ... شاركينا فيه . ومتقلقيش هتجيلك رسالة بكل شئ ..

وفي انتظار افادتنا مشاركاتك وان شاء الله تقيدي وتستفيدي من الجروب

[Ahmad]

زهرا wrote: "السلاام عليكم
ازيكو ؟؟
انا جديدة هنا في الموقع ومش فاهمه اي حاجه في اي حاجه ☺
حاسة اني تايهة الكتب اللي ما صدقت لقيتها مش عارفه اقراها ولا انزلها مش عارفه اتعامل خالص :( :("

اهلا يا زهرا ازيك .. نورتي الجروب
احساس التوهان طبيعي ... بس شوية كدا وهتتعودي وهيبقي الجود ريدز بيتك في كل ما يتعلق بالكتب . وهتنزليه كمان برنامجه علي موبايلك ان شاء الله عشان تعرفي بيه تقييم اي كتاب قبل ما تشتريه وتتابعي نشاطك هنا ..

مبدئيا اللي ملخبطك ودا الخطأ الشايع مع اي حد جديد ..
ان الموقع هنا مش لتنزيل الكتب !!

الموقع هنا لتقييم وفهرسة ومناقشة الكتب .
جروبنا لنفس الهدف بس مخصص للمصريين واخواتنا العرب

يعني الموقع هنا زي موقع
Imdb.com
الشهير جدااا لتقييم الافلام ومتابعة البوكس اوفيس الخ الخ ..

شوفي الفهرس دا
https://www.goodreads.com/topic/show/...
هو محتاج يتحدث شوية .. بس هيساعدك تتفسحي في الجروب شوية ..

اخر الشهر دا ان شاء الله هتكون مناقشة رواية الحرافيش لنجيب محفوظ .. وهيكون فيه تصويت لمناقشة الشهر الجاي ... شاركينا فيه . ومتقلقيش هتجيلك رسالة بكل شئ ..

نورتينا .. :)

[زهرا]

اهاااا شكرااا جزيلا لحضرتك ^_^

[Ahmad]

..السلام عليكم و رحمة الله و بركاته
..بالايجاز كده

أحمد رضا .. 6/6/1999 .. أيوة صغير شوية .. بكتب و بمثل و بخرج .. حاليا شغال أكتر في الكتابة .. القراية بالنسبالي حاجة تلزمني في كل حاجة قبل ما اكتب كلمة عن حاجة ابقي عامل بحوث ايام و اسجلها .. مكتبتي .. يمكن عشان ركزت علي القراية من السنة الي فاتت فا مكتبتي 100 كتاب و شوية بس .. لكن ميغركش يعني كتب مش سهلة :D .. أعمار الاعيان و البحث عن الذات طبعة أولي من السبعينات .. و أعمال لكبار الكتاب و بمناسبة الكتاب :

نجيب مفوظ ♥ .. عندي هو فوق الكل .. هو الي اعماله بتملي مكتبتي ..

توفيق الحكيم ♥ .. في رأيي .. الراجل ده بونبوناية الادب المصري و العربي و الله :D ..

يوسف إدريس ♥ .. العيب .. الحرام .. جمهورية فرحات .. هو ده يوسف إدريس ..

بالمناسبة : بكتب قصة قصيرة و رواية و شعر و زجل و سيناريو ..

جيت هنا عشان دورت علي جروبات عشان مش هينفع أقعد اكلم نفسي كده في Goodreads ..

لا ناوي أشارك و طموح إني أعجبكم في المسابقة الجاية إن شاء الله مع إن قانون 500 كلمة مضايقني بس مسامح :D ..

بس كده .. إفتكروا الكومنت عشان هتشفوني كتير هنا ..

شكراً .

[Ahmad]

A. wrote: "..السلام عليكم و رحمة الله و بركاته
..بالايجاز كده

أحمد رضا .. 6/6/1999 .. أيوة صغير شوية .. بكتب و بمثل و بخرج .. حاليا شغال أكتر في الكتابة .. القراية بالنسبالي حاجة تلزمني في كل حاجة قبل ما ا..."


انا بعتذرلك عن ردي متأخر عليك .. مشوفتش البوست غير دلوقتي ..

بس بجد نورتنا يا
A. Reda

واضح انك ان شاء الله هتكون عضو مميز جداا في الجروب وليك لمستك ومشاركاتك المثمرة.. وان شاء الله المسابقة الجاية هتنور باشتراكك فيها.. ايوة سنك صغير ودا يخليني احييك اكتر علي اهتماماتك وقراءاتك ... ياريت كل اللي في سنك يكونوا كدا ...

نورتنا مرة تانية وتالتة وعشرين .. ومستني اشوفك في كل حته في الجروب .. انتشر :)

تحياتي :)

[Ahmad]

Adam wrote: "السلام عليكم و شكرا على الترحيب الجميل ده D:

أنا آدم و كنيتي دومز، 14 سنة و ناوي اتم 15 قريب إن شاء الله :) جديد نسبيا في القراءة بس مقدرش أعيش بدون رونق القراءة و عشام كده اشتركت في جودريدز و دور..."

اهلا بيك يا ادم نورت الجروب ، وان شاء الله معانا تزيد قرايتك وتبقي دودة قراية قد الدنيا :) زي اعضاء كتير هنا واحسن .. سعيد جدا بوجودك انت واعضاء كتير سنهم صغير جدا بس مهتمين بالقراءة وبيحبوها احسن من ناس كتييير .. واكيد دا هيفرق جداا في مستقبلكم ان شاء الله ..

انا قبلت الدعوة وزورت بروفايلك زي ما طلبت .. شد حيلك وافرشه بقا وحط صورة وظبط الدنيا واملا مكتبتك كتب .. :)

وانا عشانك وكل الاعضاء المميزة الجدد عامل فهرس للجروب اتمني ان شاء الله يساعدكم في بدايتكم معانا في الجروب .. خش برجلك اليمين :)

https://www.goodreads.com/topic/show/...

نورت :)

[Ahmad]

Roufaidasamer wrote: "مرحباً ..
السلام عليكم :)
انا روفيدة ،١٧ عام
في الحقيقة أنا بدأت القراءة الحقيقية قبل سنتين، بس عملت حساب عل goodreads من قريب
عجبني الموقع، وحسيت انه محفّز جداً للقرَّاء علي أنهم يقرأوا أكثر ويه..."


اهلا يا روفيدة نورتينا وسعداء بوجودك معانا :)
ومتشكرين جدااا علي كلامك الحلو وان شاء الله نكون عند حسن الظن وتلاقي كل اللي محتاجه واكتر في الجروب ووسط الاعضاء المميزين جدااا اللي فيه اللي يشرفوا اي جروب :)

زي ما قلت لادم في المشاركة اللي قبلك ، انا سعيد جداا بوجود اعضاء مميزين وسنهم صغير زيكم ومهتمين بالقراءة وبيحبوها كدا .. ودا ينبئ عن مستقبل باهر ليكم ان شاء الله .

اما عن سؤالك ..
بصي يا ستي .. سؤالك جاوب عنه د. طارق سويدان في موسوعة الثقافة المكونة من اربع كتب وخصوصا في كتاب اسمه ماذا اقرأ .. دا لينك تحميل الكتاب .. حجمه كبير بس كتاب مهم جداا ودليل للقراءة فعلا ..
http://waqfeya.com/book.php?bid=7403

وكاجابة مبدئية عايز اقولك .. في البداية متدوريش علي التخصص .. اقري اللي تحبيه .. ومتحصريش نفسك في مجال معين .. اقري كل حاجه عشان تعرفي انتي بتحبي ايه وهتكملي قراية متعمقة فيه ..

" اعرف شئ عن كل شئ قبل ان تعرف كل شئ عن شئ"

طب ايه ترشيحاتنا للقراءة ؟ فيه قسم في الجروب كامل لترشيحات الكتب .. شوفي المواضيع في الصفحة الرئيسية .. وفي اللينك دا انا عامل فهرس لمواضيع الجروب المهمة وبحاول احدثه كل فترة .. شوفيه وهتلاقي مواضيع ان شاء الله تهمك .
https://www.goodreads.com/topic/show/...

وبما ان مناقشتنا لشهر مايو كانت عند "القراءة" فممكن تقري المناقشة وتشاركينا فيها من هنا
https://www.goodreads.com/topic/show/...

نورتنيا يا روفيدة .. وان شاء الله تكوني انشط عضوة في الجروب وتفيدي ناس كتير وتستفيدي منهم :)

[Roufaidasamer]

ممم فهمت ، شكراً جزيلاً لحضرتك علي المجهود :)