و أنا أعرف من قتلني

[Rabie]

ما بعرف من وين بدي بلش ...
يا ترى من اللحظة يلي حسيت حالي مع القاضي وهو باخر لحظات حياته عم يواجه الموت بدون ما يكون عم يعيش اللحظة يلي الكل بيكون طول عمره هي هاجس اله وقاهره الوحيد, كان كل همه انه يستفيد من موته بكشف حقيقة يلي كان عم يتعامل معهن وعاطيهن ثقته , كان كل همه وهو بيعرف انه ميت لا محال إنه يبرأ حاله لأنه رح يكون أول متهم والكل رح ينسى إنه هو قاضي وحالف قسم النزاهة و حفظ القانون لما رح يموت وتنكشف بعدها حقيقة التجاوزات يلي كان عم يعملها مدير أعماله وشريكه ,
كان ذكي لدرجة انه خلاهن يعترفوا بسرقاتهن لأنه تهمة السرقة كيف ما كان أهون من القتل وهالشي بلسانهن هنن,
قديش صعبة اللحظات يلي بنحس حالنا عم نعيشها على حافة الهاوية والشي يلي عمله القاضي هو الرقص على حافة الهاوية بكل معنا الكلمة , لأنه أي خطأ كان ممكن يخلي كل شي يروح عالفاضي و ما يحقق هدفه و ينتصر , أستغل أخر لحظات حياته لحتى يموت وهو بوضعية هي مفتاح باب محاكمة شريكه ومدير أعماله ,,
ولا بلش من عند السائق والمدبرة يلي ما كان ذنبهن أخف من يلي قبلهن لأنه خانوا ثقته ويمكن الخيانة ذنب أكبر من القتل بحد ذاته لأنه فيها بنكون عم ننقتل بكل لحظة وبكل مرة عم تجي عيوننا بعيون يلي عم يخوننا ونحنا ما عم نقول شي ...
ولا بلش من موقف صعب بحياتنا و هو نفقد حدا غالي علينا و بيكون هالشي النا مفترق يلي بعده مو متل يلي قبله وحياتنا بتكون مالها طعم ولا شي بيكون اله طعم بدونهن , زوجة و طفلين وشو ضل بهالدنيا ولا شي , قديش ضروري انه نحاول نعيش بسعادة و رحمة و ودّ و حب مع شركاء حياتنا يلي بيفهومنا وبيعرفونا اكتر من أهلنا ويمكن أكتر من حالنا لأنه اللحظة يلي رح تروح ما رح ترجع وما بلومه لانه ما ضل عنده سبب يعيش مشانه واختار انه ما يتعالج بالبداية وحتى بعد ما بلش علاج اختار بلحظة ما انه يوقف العلاج و هو بيعرف انه هالشي في نهايته , مع أني أعتقد أنه اختار العلاج حتى يعيش الفترة اللازمة حتى ينهي تنفيذ خطته ولما حس أنه الوقت حان لتقديم الجلاد للاعتراف أمام سلطة أقوى اختار وقف العلاج وكان على قدر كبير من الجرأة و القوة إنه ينتظر لحظة بلحظة و على مدار اكثر من يومين انه تحين لحظة النهاية و حتى كان عم يحتفل من بنصره يلي رح يتم إعلانه باللحظة يلي رح يموت فيها, في جملة انقالت بعهد أحد قياصرة روما و ظهرت بأحد الأفلام : (( إنه اذا جاءنا الموت ليس علينا الا أن نبتسم له )) وبظن انه هاد يلي عمله القاضي,,,
ولا بلش من القيمة العلمية للرواية ويلي خلتني إنه ارجع دور عن كتير من المعلومات والحقائق يلي انفرض علينا نقبلها من غيرنا لأنه هنن يُعتبروا حضارات متقدمة ونحنا من العالم الثالث,,,
و لا بلش من أجمل ما قرأت بحياتي : ((كن أنت المفترق ..فلا يكونن ما بعدك كما كان ما قبلك ! )) ,بفهمي الها صار فيني اتخيل كمية الايجابية يلي ممكن نكون فيها نحنا لما رح نتحرك و نساعد و نحاول نقدم شي للعلم للناس للمجتمع ,و كمان فهمي الها خلاني شوف بُعد جديد لجملة : ((الطيبة هي الضوء الذي يكسر جميع الحواجز , أحيانا يلزمنا تصرف واحد من الطيبة لنغيّر حياة أحدهم)) وقتها رح نكون مفترق لأنه رح نكون قدرانين نغير بحياة كتير من الناس يلي عنجد هنن بحاجة وبانتظار حدا يجي يكون المفترق بحياتهن مو بسبب تواكلهن وإنما لأنه هنن بواقع طموحاتهن و أحلامهن أكبر من إمكانياتهن,,,
و لا بلش من عنوان الرواية : ((أنا اعرف من قتلني )) القاضي السرطان قتله , بس قديش في ناس متل القاضي بهالدنيا و قديش فيه سرطانات رح تقتلهن , السرطان مش بالضرورة يكون خلايا استلمت زمام السيطرة و خرجت عن الهدنة مع صاحبها , السرطان فيه يكون كذب عم نعيشه كل يوم, او خيانة ثقة من قريب او بعيد عطيته ياها كاملة ,أو ظلم من انسان ما تخيلت انه يظلمك بيوم , أو حب ضاع أو عم يضيع أو مات قبل ما ينولد أو ...أو .... كتير حياتنا غنية بالسرطانات ... كل حدا فينا عنده قاتله الخاص فيه , لكن مين الرجل الحقيقي أو الانثى الحقيقية يلي ممكن تتجرأ و تقول : (( أنا أعرف من قتلني )) ..............
قديش كتير منا بحاجة لانه حدا يسمعنا و يسمع صوت التعب جواتنا , قديش بحاجة حدا يفهمنا و يشملنا بداخله ...
قديش منا كتار يلي وصلو لمرحلة : (( أن ترى ما لا يراه الآخرون.. أن تقرأ ما بين السطور... أن تقرأ المستقبل ..بعين البصيرة لا البصر )) ,(( متعب أن تكون وحيداً... تترجم أفكارك وحيداً ....))
عنجد ما بعرف من وين بدي بلش ... بداخلي و بداخل كل واحد فينا حكي كتير يمكن ما فينا نقول أغلبه ...
كل الشكر إلك أستاذنا الغالي و أديبنا و أخونا الكبير , بتمنى تلاقي عفويتي عندك ولو فسحة صغيرة من زمان و مكان ,فيكون مرورها عليك خفيف الظل ...
كل الشكر إلك لأنه كلماتك عبرت عن كتير شغلات فينا ما عرفنا من قبل نقولها...

#أنا_أعرف_من_قتلني
و أنا أعرف من قتلني ...