Egyptians Good Readers discussion
note: This topic has been closed to new comments.
نادي الكتاب - ومناقشات الكتب
>
مناقشة شهر إبريل : رواية باب الخروج
date
newest »
newest »
rate: 3 stars -عموماً الكتاب حلو, بس مليان تفاصيل كتيرة كانت ممكن تتشال
-دى أول رواية اقراها لعز الدين شكرى فشير, ومش عارف اذا كنت هقراله تانى ولا لأ, بس الاحتمال الاكبر انى هقراله عناق عند جسر بروكلين
-ممكن حاجات من الرواية تتحقق
-مسألة الحرب بين ايران وأمريكا انا شايفها مستبعدة شوية
-اخر حاجة بقى ان النهاية ضايقتنى جداً
الرواية رائعة ، أنا قرأت روايات د. عز كلها ، و اجد صعوبه في اختيار رواية مفضله واحده منهم ، انا تعجبني ثلاث روايات ، أبو عمر المصري و عناق فوق جسز بروكلين و باب الخروج ، مقتل فخر الدين و اسفار الفراعين و غرفة العناية المركزة و أبو عمر المصري رباعية كتبها الكاتب على مداد سنين طويله ، اراها رباعية قيمة تستحق القراءه ، هو من كتابي المفضلين و ممن أحنرم آرائهم و تحليلاتهم السياسية
انا دى اول مشاركه ليا معاكم للاسف دخلت متاخر و معرفش احداث الروايه بس من خﻻل المكتوب انا مستبعدش ان اسرائيل تتلكك لمصر و تخش فى حرب خصوصا ان حاليا ف استفزازات على ارض الواقع ..موضوع ايران وامريكا ممكن اه و مكن ﻻ ..على حسب تقديم فروض الوﻻءو الطاعه ﻻمريكا ..اما بالنسبه لموضوع اقرا للكاتب فانا نفسى اقرا عناق فوق جسر بروكلين سمعت من كتير انها حلوه بس للاسف مش ﻻقياها بس بدور عشان اجيبها ..ﻻن مبحبش اقرا نسخ رقميه ...شكرا لكم
انا قرأت للكاتب كل أعماله و بحب أسلوبه و أكيد هقراله تاني و بالنسبة لباب الخروج قعجبتني جدا البناء متماسك و الحبكة مقبولة سواء حصلت في الواقع بالضبط او في اختلافات هو مش تنبؤ أو توقع للأحداث دي مجرد رؤية أو وجهةنظر تحتاج تدبر شديد و تقكير حتى لا نرتكب نفس الأخطاء أكتر حاجة عجبتني في الرواية كان الحديث عن السلبية و ازاي ممكن تاكل حياتنا و تضيع عمرنا و اواي بنوجد لنفسنا المبررات بالنسبة الرواية كانت جملة علي شكري لابنه في الجواب" الوضع مبيتحسنش احنا اللي بنعتاد الوحش"
صباح الخير عليكم وعلي كل المصريين :)ويارب شوية نور نشوف بيه مصر احسن واجمل من الاولاحنا مش احنا بعد الثوره
انا ماكملتش الروايه ومش هااقدر اجاوب علي كل الاسئله
دي اول روايه اقراها للكاتب
روائي ممتاز يدخل في تفاصيل ويخرج دون ان تشعر بفقدان اي شيئ من الاحداث الاولي
ولو ان التفاصيل احيانا بتزيد شويه
اكيد ماعجبنيش اي تخيل من التخيلات اللي خنقتني وماقدرتش اكمل بسببها الكتاب !!
بس ده اكيد مش سبب اني ابطل اقرا لنفس الكاتب كتب تانيه
بس انا مش معاكم في السياسه تاني , ارجو المعذره
وبجد شكرا علي المجهود
1-تقييم الكاتب***
2-دي اول روايه تقراها للكاتب والكتاب دا هيشجعك تقرا له
كتب تانية؟
ولو قريت الرواية دي أحسن رواياته و لا ليك راي تاني؟
- لا دي اول روايه اقرأه ليه و ممكن اقرأله تاني بس مش في نقس النمط .
3-إيه رأيك ف الأسلوب عموما ؟
يعني الي حد ما معقول بس احيانا بيطول في الاحداث كتير جدا بدون داعي يعني .
بالنسبة للموضوع :
-----------------------------------
1- ايه اكتر حاجة عجبتك ف الكتاب ولو عندك اقتباس عاجبك اتفضل وقول رأيك؟
باب الخروج الوحيد هو ان تهرب من السفينه قبل ان تغرق ..
2- تفتكر ان نسبة من الرواية دي ممكن يتحقق فعلا علي أرض الواقع؟
ممكن في الوقت الحالي كل شئ جايز .
3- إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛الرئيس بيومي؟
- ندا ... كرهتني في السيدات مثال لاغلب النساء المصرييات اللي الانانيه تتملكهم اهم حاجه حياتهم في رفاهيه مع مين مش فارقه .
علي ... حسسني انه مش بيفكر بجد يعني مستحمل الظلم ومش بيتعلم من اخطائه حسيت انه سلبي جدا.
قطان ,,, مثال للرجل بتاع مصلحته .
نور .. المرأه الحالمه بس في نفس الوقت خائفه ومحتاجه تحس بقوه حواليها .
محمود بشير ..اهوائه متحكمه فيه اكتر .
عز الدين فكري .. اكثر ما صدمني لانه كان مثال لرجل العلم المثقف مكنش نفسي يبقي مستبد وظالم في الاخر كنت متوقعه انه هيكون مفتاح النجاه بس للاسف كلهم سواسيه ..
4-ايه رايك ف اعدام عز الدين فكري و محمود بشير و هما كانوا يستحقوا كدا ؟وازاي كل واحد فيهم بيحاول يخدم
البلد بالطريقة اللي يلاقيها صح؟
هما قتلوا ناس ظلم فـ يستحقوا .
6- هل تتوقع فعلا حدوث مثل تلك الحرب بين ايران و امريكا
وتتوقع حاجة زي ان اسرائيل ممكن تحتل مصر ؟
- حرب بين امريكا وايران مش مستبعد جائز جدا
انما اسرائيل تختل مصر حسيتها صعبه .
7-ممكن لحد سلبي طول عمره فجأة يتحول 180درجة و يقرر انه ياخد قرار ممكن يحول مصير دولة بالكامل
- اكيد طبعا لو اخد صدمه قويه تقدر انها تفوقه ويعمل شئ ايجابي .
8- ايه اللي استفدته من الرواية دي
ويا تري الروايه دي فرقت معاك ف حاجة معينة او غيرت فكرك تجاه موضوع معين؟
- احبطتني بصراحه هيا تشع سلبيه غير متوقعه بس غيرت فكري انه مفيش امل :)
بالعكس هي مليئة بالسلبية و لكنها فتحت باب الأمل قرب النهاية و هي دي الرسالة بتاعة الرواية
الروايه استقراء لاحداث كثيرة استغل فيها الكاتب قربه من دوائر الحكم من قبل ولكن اروع ما فى الروايه هو استقرائه لنفسيه كل الاطراف فى الصراع الدائر وما يحدث من تقلبات بين اليوم والليله فى بلد تتنازعها الكثير من النخب النيئه
الرواية عجبتني جدا مع انها مليانة بالتفاصيل وخصوصا ف وصف اي شئ الرواية دي عيشتني حالة الثورة من جديد وسلبية البطل زي سلبية ناس كتير قبل الثورة
اكيد دي مش هتكون اخر مرة اقرأ لعز الدين شكري :)
باب الخروج من أجمل الروايات ممكن الواحد يقراها. الكاتب ابدع بكل المعانى.اكتر حاجة عجبتنى فى الرواية ان الكاتب قدر يوصف حال التيارات السياسية فى مصر ووصف تغيرهم الشديد بعد مااى حد فيهم بيمسك السلطة(ليسوا اصحاب مبادئ ولكن اصحاب فرص ) شوفنا الليبرالى (عز الدين ) اللى بينادى بالديموقراطية عمل ايه اول مامسك الحكم كان ديكتاتور باسم الحرية محاكم الثورة وحاجات هو الليبرالى نفسه كان بيرفضها تماما وشوفنا اليسارى (محمود بشير ) اللى بيثور على اى وزارة او اى حكم فى بدايته ومبيرضاش غير بالتغيير الجذرى بعد مامسك الحكم اليساريين أنفسهم ثاروا عليه عشان مقدرش يغير تغيير جذرى ولا يعمل اللى كان بينادى بيه وشوفنا فى الرواية الاخوان المسلمين لعيبة الانتخابات انتخابات رئاسية اتعملت هما كسبوها لانهم قادرين دايما على الفوز بأى انتخابات لكن بعد مامسكوا الرئاسة (الرئيس بيومى ) مش عارفين يديروا البلد لان ببساطة خبرتهم السياسية بتتلخص فى انتخابات النقابات قبل الثورة لكن اى قرارات اوسياسة هما ابعد الناس عنها وبيعملوا ودن من طين وودن من عجين ونفسهم اى قرار يتاخد فى البلد يبقى بالانتخابات عشان دى الحاجة اللى هما بيعرفوا يلعبوها.. وطبعا شفنا الجيش هيفضل ماسك فى السلطة مش هيسيبها حتى لو اخترنا رئيس مدنى مش هيستغنى عنها وهيحكم البلد وان لم يكن فى صدارة المشهد السياسى ... بصراحة الكاتب ابدع فى الرواية ولكن فى احداث حاسس انها بعيدة عن السياسة الواقعية زى موضوع حرب اسرائيل على مصر مش ممكن ابدا ان اسرائيل هتحاول تجمعنا تانى وتخلينا نفكر فى مصلحة الوطن بضربها لسيناء بالعكس احنا خلافتنا وضرب الشعب لبعضه وهدم الاقتصاد بنفسنا ده بالنسبة ليهم احسن من اى استعمار .... اكتر شخصية عجبتنى على المترجم تحس انها بتمثل غالبية الشعب المصرى اللى بيحاول يسايس اموره مع كل التغيرات والتيارات مش نفاق منه بس هو الشعب اتعود على كده وثورته بتكون بعد فوات الاوان بعد مايكون الفساد اتغلغل في جذوره... من الأحداث الغريبة الموجودة فى الرواية واللى محتاجة رئيس ثورى ينفذها هى تكوين جهاز امن مواز للشرطة من الاولتراس وشباب الاحزاب دى هتحل مشكلة الامن فعلا... اعدام عز الدين ومحمود بشير من الاحداث اللى ممكن تحصل على ارض الواقع لان العنف الموجود بين التيارات السياسية بيؤكد كده.. كان نفسى الكاتب يزيد من الادبيات فى الرواية بس الكاتب اسلوبه ممتع ومشوق وبتمنى انى اقرا كل اعماله
1-أسلوب الكاتب جيد جدا في وجهة نظري رغم الإسهاب في السرد الذي قد يضفي بعضا من الملل2-أول مرة أقرأ لعز الدين شكري و لن تكون الأخيرة إن شاء الله
بالنسبة للموضوع :
-----------------------------------
1- أكتر حاجة عجبتني هي إن الأحدث قريبة جدا مما نعيشه و حاسة إننا نسير في نفس الطريق للنهاية
2- أفتكر بشكل كبير إننا فعلا عايشين الأحداث دي
2- إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛الرئيس بيومي؟
على القطان هو تجسيد لشخصيات كتيرة عايشين معانا هما ضد الثورة على طول الخط و شايفين إنها تسيب و انفلات لأنهم اتعودوا على النظام مهما كان النظام ده ظالم لكن هما مش بيحبوا يعيشوا غير في المنطقة الآمنة
ندا: شخصية أنانية و بصراحة أنا مش شايفة إن دورها كان منطقى إلا في حالة إنها تكون مابتحبش البطل فماصدقت إن باباها قال لها سافري لكن فعلتها غير منطقية في وجهة نظري كفعل عادي إلا لتوظيف الرواية دراماتيكيا
نور : شخصيتها ماعجبتنيش و ماحسيتش إن هي دي اللى بتعبر عن المرأة في الثورة حتى انفعالاتها كانت أوفر في وجهة نظري
الريس بيومي : هو الريس مرسي في وجهة نظري لدرجة إني مستغربة إزاي الكاتب عرف يستشرف الشخصية ببعض التفاصيل بالشكل ده.
4-أنا شايفة إن عز الدين في الأول كان كويس لكنه اغتر بالمنصب وهو ده اللى خلاه يطغى على خصومه لكن لو قيسنا اللى حصل له باللى احنا عملناه مع مبارك يبقى عز الدين ده عمره ماكان هيحاكم أصلا .. و مش شايفة إن ده ممكن يحصل عندنا مع حاكم على الأقل دلوقتى احنا بنكون معاهم في منتهى الرأفة .
6- متوقعة جدا موضوع إن اسرائيل تستغل اللى احنا فيه و بالتعاون مع أحد المسئولين الغير وطنيين تحاول تستولي على جزء من مصر لكن ده هيكون بالشكل اللى توقعه الكاتب علشان تحقيق مكاسب لطرف على حساب طرف آخر لحكم مصر من خلاله.
7-ممكن لحد سلبي طول عمره فجأة يتحول 180درجة و يقرر انه ياخد قرار ممكن يحول مصير دولة بالكامل؟ مش بتحصل دايما لكن لو الشخص ده سلبي غصب عنه أو بيتعرض للفشل لظروف أقوى منه مش بعيد أبدا إنه يعمل حاجة تغير بلد لأنه بيكون بيعملها بكل خبرة الفشل اللى شافها في حياته.. و كم من المهمشين غيروا العالم .. و هل كان أحد يتوقع أن يطيح الشهيد خالد سعيد بمبارك؟
8- الرواية فعلا أثرت فيه جدا مع إني في أولها كنت حاسة بملل من طريقة السرد لكن مع تصاعد الأحداث حسيت إن السيناريو منطقى جدا و فهمتني حاجات كتير كانت بتحصل حوالية و مش بفهمها لكن بنظرة من بعيد الواحد فهمها فعلا
Aya wrote: "1-أسلوب الكاتب جيد جدا في وجهة نظري رغم الإسهاب في السرد الذي قد يضفي بعضا من الملل2-أول مرة أقرأ لعز الدين شكري و لن تكون الأخيرة إن شاء الله
بالنسبة للموضوع :
-----------------------------------..."
الريس بيومي : هو الريس مرسي في وجهة نظري لدرجة إني مستغربة إزاي الكاتب عرف يستشرف الشخصية ببعض التفاصيل بالشكل ده.
عندك حق مرسي بالظبط
-أنا شايفة إن عز الدين في الأول كان كويس لكنه اغتر بالمنصب وهو ده اللى خلاه يطغى على خصومه
اعتقد أنه مش اغترار دا مؤمن بنظرية الغاية تبرر الوسيلة حتي لو داس ملايين ف طريقه
في روايات بتبقي عاوز تنهيها وخلاص ، باب الخروج شئ مختلف تفاصيلها واسلوب الكتابه . مستمتع بيها وأكيد هقرأ تاني ل عزالدين شكري فشير :)
Mickey wrote: "هقراءها واشارك"مستنيين مشاركتك:-)
انا عندى سؤال: ليه 'على' مقالش الكلام ده كله ليحيى لمارجع وعاش فى مصر طول الفترة اللى قبل موضوع صفقةالقنابل النووية؟؟
Mahmoud wrote: "انا عندى سؤال: ليه 'على' مقالش الكلام ده كله ليحيى لمارجع وعاش فى مصر طول الفترة اللى قبل موضوع صفقةالقنابل النووية؟؟"رأيي ان علي كان سلبي واي حاجة بتحصل حواليه مش هماه بس فجأة اما بقي فإيده مصير البلد شاف انه المفروض يعمل حاجة مفيدة
ومع احتمال انه يموت قرر يحكي حكايته لابنه اكتر واحد حس انه ظلمه وحاسس بتأنيب الضمير من ناحيته
انا حسيت بملل أثناء القراءة و بإحباط فظيع خصوصا لما صاحبه أستاذ الجامعة اللي كله استبشر خير فيه و ان ده مفتاح النجاة اتحول لإنسان دموي و سفاح بالشكل ده ..
Heba wrote: "انا حسيت بملل أثناء القراءة و بإحباط فظيع خصوصا لما صاحبه أستاذ الجامعة اللي كله استبشر خير فيه و ان ده مفتاح النجاة اتحول لإنسان دموي و سفاح بالشكل ده .."اطلاقا دة الطبيعى لتحول الانسان المسالم لما ييأس من التغيير تماما ... ولما يلاقى ان كل الحلول المنطقية لا تؤدى الى اى شئ
السلام عليكم 1- الكاتب ... أول عمل أقرأه ليه .. اسلوبه كويس بس بيطول فى التفاصيل بس هو نوه عن الموضوع دة في الرواية
2- ممكن أقرأ عمل تاني للكاتب بس مش في الوقت الحالي ... بس لو طول فيه ... ماظنش حيبقى في مرة ثالثة
3-المشكلة في التفاصيل و التطويل ... أخذت الرواية وقت طويل معايا لأني كنت بمل منها و أسيبها
بالنسبة للموضوع
1- أكتر حاجة عجبتني كلامه مع ابنه انه مافرضش عليه حاجة أو لزمه انه يتصرف زيه ... حكاله حاجات ممكن اباء كتير ماتحبش ابنائها تعرفها عنهم
مالزمهوش انه يصدقه و اداله فرصة انه يفكر بعقله ... مش حاجة مسلم بيها و خلاص
بعت الرسالة لأبنه مش أي حد تاني ... ندمه انه ماكنش معاه فى حياته
موضوع الرواية نفسه حلو بس للأسف في كتاب كتير كتبوا عن نفس الموضوع
و انه استعان بأمريكا ... كنت أفضل أى بلد تانى بدل من أمريكا .. بس كان محتاج مساعدة خارجية أكيد
2- اه ممكن فعلا جزء يتحقق منها ... او كلها :/
3-القطان : انا و من بعدي الطوفان .. ده مبدأه
ندا : مالهاش قرار .. و معتمدة على تفكير الوالد
نور : حساسة ... و محتاجة احساس بالأمان ...دورت على اللى ممكن تعتمد عليه لما تقع .. و لما مالقتش ده بعدت فترة بس رجعت تاني للراوى
عز الدين : كان جواه حاجات كتير .. و لما جيه وقت التنفيذ اخذ القرارات القاطعة ... على قد مادى حاجة انا مؤيداها بس مانافعتش !!
الرئيس بيومى : ماحستش بوجوده فى الرئاسة او الرواية !
4- ماكنش حد فيهم يستحق الاعدام ... بس عز الدين و قع فى الفخ اللى عمله ... و كل واحد فيهم كان شايف ان اللى بيعمله ده فى مصلحة البلد بس للأسف من وجهة نظره بس
5- مش عارفة بصراحة ... بس ده احتمال كبير لأنه واكب أحداث الثورة نفسها اللى كان بيتكلم عنها
6- اه اتوقع الاثنين
7- اه ممكن فعلا الانسان يتحول 180 درجة .. حسب الظروف اللى بيمر بيها
8- ان بعد ماكان الحاكم قادر يحكم المعارضين و المؤيدين ... بعد الثورة صعب يتجمعوا تاني تحت حكم واحد .. الا بتنازلات من الطرفين
البلد محتاجة وقت كبير علشان تقوم تانى ... و مش حيحصل ده الا لو القوى كلها تجمعت و اشتغلت ... الكلام مش حيحل حاجة
9- مش أوى بصراحة ...
و دى وجهة نظري و اسفة على الاطالة :)
1-تقييم الكاتبالكاتب متمكن جدًا من اللغه العربيه ،وإستمتعن بترتيبه للكلمات والاحداث ومملتش منها بالعكس .
2-دي اول روايه تقراها للكاتب والكتاب دا هيشجعك تقرا له كتب تانية؟
دي أول روايه .بس بالتأكيد مش هتكون اخر مره أقرأله.
3-إيه رأيك ف الأسلوب عموما ؟
الموضوع أتهرس وهيتهرس كتير بس الكاتب خده من بُعد أوسع فدة أدي متعه اكتر للروايه الكاتب ابدع بكل المعانى .
1- ايه اكتر حاجة عجبتك ف الكتاب ولو عندك اقتباس عاجبك اتفضل وقول رأيك؟
الشخصيات عمومًا وتغيراتهم وترتيب الاحداث مع اني ما لقتهاش واقعية ان دوله تفضل 9سنين ف فوضي وانقلابات.
الاقتباسات : “لا مفر أمامك من دفع الظلم حين يأتيك، إن أردتَ البقاء إنسانا”
2- تفتكر ان نسبة من الرواية دي ممكن يتحقق فعلا علي أرض الواقع؟
ما اعتقدش ،هيبقي صعب ان دوله تفضل 9سنين كدهمن غير احتلال ،مع انه جه في الاخر .
. 3- إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛الرئيس بيومي؟
علي (انسان سلبي لكن سلبيته دي هو مش سبب فيها سلبيته جت من انه عارف لو اتكلم محدش هيسمعه عشان كده سكت )
القطان (إنسان مغرور ميهموش غير نفسه والدايرة اللي حواليه)
ندا (معتمده علي القطان بس وما بتثقش ف حد غيرة شخصيه متخلفه )
محمود بشير (مُتسرع ،بعيدًا عن المنصب كان بيسعي لاسقاط اي حكومه ، واعتقد سبب غضبه من عزالدين انه حس انه اخد مكانه ، زعلت لنهايته )
عزالدين ( أكتر شخصيه عجبتني الكاتب اشتغل عليها صح عز الدين كان طموح وعارف ومخطط للي هو عاوزة صدر محمود بشير وخطط امتي هيسقطه الشخصيه دي موجودة في اللي بيحكموا مصر حالياً)
بيومي (هو مُرسي بالضبط غير أن بيومي بيختلف عنه انه كان عاوز يعمل حاجه ،لكنه شخصيه واحدة تافهه وساذجه)
4-ايه رايك ف اعدام عز الدين فكري و محمود بشير و هما كانوا يستحقوا كدا ؟وازاي كل واحد فيهم بيحاول يخدم البلد بالطريقة اللي يلاقيها صح؟
محمود بشير مكنش يستحق ، لكن عزالدين يستحق بالطبع عزالدين رغم اللي عمله ظن انه بيعمله لهدف نبيل.
5-الكاتب مقتبس من حياته الشخصية بعض معلومات ف الرواية
اكيد .الروايه بتبقي شخصياتها معظمهاعن ناس انته قابلتهم.
6- هل تتوقع فعلا حدوث مثل تلك الحرب بين ايران و امريكا وتتوقع حاجة زي ان اسرائيل ممكن تحتل مصر ؟
بالتأكيد .بس الغريب ان اسرائيل ما استغلتش فرصة الفوضي دي فبل الاحتلال في الثورة التانيه .
7-ممكن لحد سلبي طول عمره فجأة يتحول 180درجة و يقرر انه ياخد قرار ممكن يحول مصير دولة بالكامل
اها ..لما يحس ان عمره تقريبا ماخد قرار .ولما فهم ان مصير الناس دي في ايد متخلفين هيأذوهم لو هو ما انقذهمش . التحول جه من شعورة بالمسؤلية .حتي المسؤليه تجاة ابنه اللي كتب الرساله عشانه .
=)
كنت عارفة من قبل ما اقرأها انها على الاغلب هتعجبني زي باقي كتابات عزالدين شكري..بس اللى مكنتش اعرفه اني لما هخلصها هبقى منبهرة كده، الكاتب عنده طريقة رائعة لتحليل نفسية كل من الأطراف السياسية الموجودة على الساحة دلوقتي و تحويلهم ال أشخاص في روايته "محمود بشير،عزالدين فكري، و الريس بيومي" و محاولة التنبؤ بنتيجة افعالهم و تصرفاتهم...و اعتقد ان علي شكري ممكن يكون اي حد فينا او من اهلنا اللى بيشوفوا الغلط و يسكتوا و يقنعوا نفسهم بحاجات مختلفة زي انهم بيعملوا اللى عليهم و بيشتغلوا باخلاص و ان طالما من جواهم هما مش موافقين على الغلط فبيعتقدوا انهم كده مش مشاركين فيه مع ان السكوت على الغلط مشاركة صريحة فيه...الكاتب فعلا ادانا باب للخروج و بهجة غير متوقعة و نهاية للرواية اكثر من رائعة
الكاتب مميز فعﻻ وعقلية تحترم رؤيته السياسية طبعا دقيقة بحكم تخصصه واﻷسلوب جميل وإن كان هناك بعض التطويل فى أجزاء لكنى لم أمل أعتقد إن فى أحداث فى الرواية واردة الحدوث او بالفعل حدث ما يشبهها والملفت إن الكاتب شايف التيارات المختلفة فى مصر بوضوح شديد ولذلك توقعاته لردود افعالهم بيعكس الحال فى مصر بجد يعنى رؤيته للجيش واﻹخوان والسلفيين والشباب تقريبا هو واقعهم بالظبط
رسم الشخصيات رائع
هى كانت اول عمل اقراه للكاتب بس قريت بعدها غرفة العناية المركزة وعجبتنى جدا هى اسلوبها اﻷدبى اقوى كمان من باب الخروج
تقييم الكاتب****
-----------------------------------
انا سمعتله قبل قرايتى حوار على اون تى فى وكان بيتكلم بمنطقية وعقلانية وتحليله بيصيب بس مكنتش اعرف انه روائى وبالصدفة واحد صاحبى اشار عليها برواية باب الخروج وحكالى عنها
----------------------------------
دي اول روايه تقراها للكاتب والكتاب دا هيشجعك تقرا
له كتب تانية ؟
ايوه ديه اول رواية وحاليا بقرأ غرفة العناية المركزة وناوى اشترى عناق عند جسر بروكلين
----------------------------------
ولو قريت الرواية دي أحسن رواياته و لا ليك راي تاني؟
إيه رأيك ف الأسلوب عموما ؟
انا وانا بقرأ العناية المركزة بعقد مقارنة بين اسلوبه فيها واسلوبه فى باب الخروج باعتبار انى بقرأ كده بترتيب عكسى وشايف ان اسلوبه انضج فى باب الخروج واسلوبه اختلف وان اسلوبه فى الروايات اللى واخدة خط سياسى صرف افضل بمراحل من اللى بيبقى فيها جانب انسانى على اجتماعى على سياسى كوكتيل يعنى .... وبيهتم بالتفاصيل بدرجة مستفزة
^^ فى باب الخروج عنها فى العناية المركزة واللى كان اجدر يكثف وصف الشخصيات واللى ياخد العلامة الكاملة لحد دلوقتى فى وصف شخصية اشرف فهمى اما الباقى فا كان فيه تفاصيل اغفلها
-----------------------------------
بالنسبة للموضوع :
-----------------------------------
ايه اكتر حاجة عجبتك ف الكتاب ولو عندك اقتباس عاجبك اتفضل وقول رأيك؟
"لم أكذب عليها ولا على نفسي هذه المرة. كنت قد فهمت أن فرارها مني حب، وغضبها علي رغبة، وسخريتها اللاذعة مني ومن الحياة أمل ممعن في التنكر. هذه المرأة ليست يائسة بل تدعي اليأس على أمل ان أريها طريقا آخر."
"هكذا الرجال مضحكون يا بنى, يتصورون جميعا استحالة تعرُّضهم للخديعة من نسائهم، مع أنهم لا يكفون عن إغواء السيدات. هل يسألون أنفسهم كيف يمكن -حسابيا- أن تقع كل هذه الخيانات ويظلوا هم بمنأى عنها؟"
"قد أكون موسى, الغرَ,المتعجل,لكن سيدنا الخضر مات,ولا أنبياء بيننا ليخبرونا عن عواقب أفعالنا البعيده: إن رأيت رجلا يقتل غلاما فامنعه,وإن رأيت أحدا يخرق سفينه فقفه,وإن رأيت ظالما يبنى سورا فلا تساعده.
لا احد غير الله يرى النعم المتنكره فى صورة نقمات ,فامنع النقمه,ودع البقيه للخالق."
اكتر حاجة عجبتنى الرؤية بتاعته بحسه تنبأ باللى بيحصل حاليا حتى موضوع المساعدات الايرانية ... طبعا لو اغفلنا بعض الجوانب اللى مصحتش واللى اظنه اضافها من عنده مش رؤية .... واللى ممكن جزء منها يحصل الله اعلم او تحصل بشكل مختلف فى المظهر بس المضمون واحد
----------------------------------
تفتكر ان نسبة من الرواية دي ممكن يتحقق فعلا علي أرض الواقع؟
لسه قايل فوق ان منها اللى اتحقق ومنها اللى هو نفسه قاله وعارف انه مش هيتحقق جزء من حبكة الرواية ومنها اللى لو متحققش بنفس الشكل اللى اورده يبقى مفيش عليه حرج
----------------------------------
إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛الرئيس بيومي؟
على شخصية فى اغلب حياتها مغلوبة على امرها من اول تسليمه بفشل قصة حبه مع الصينية لحد فقدانه لنور ... وموت اخته صفية وهروب ابنه وزوجته بس ده يحليك على العكس فى بعض الاحيان تتعاطف معاه لانك ممكن توضع فى نفس المواقف بحذافيرها .... بس ده كله فى كفة وخطته فى كفة اللى محت التردد اللى قبلها
القطان
شخصية مستفزة متبجحة بيتمثل فيه الغطرسة العسكرية وفكرة ان المجتمع المدنى هيفشل فى اى حاجة مقارنة بالمؤسسات العسكرية والشخصيات المتدة بنفسها ديه متستفزة لحد الجنون اللى بينتهى بيها المطاف مصابة بجنون العظمة والعزاء الوحيد ان نهايتهم بتبقى مأساوية
ندا
نمط جعلوه فانجعل واللى تحسها شخصية مغلفة بطبقة من الزجاج بتمنع اى حد فى محاولة انه يشوف جمال روحها ودول اللى بيسموهم اغبياء الروح اللى مهما حاولت مش هتعرف تحبهم لانها فى النهاية صنيعة القطان واى حد بيربط حياته بشخص يبقى شخصية مهزوزة ومتستحقش ان الواحد يحلل شخصيتها وبصارحة من غلطات البطل ان اتجوزها
نور
شخصية مثالية بشكل مبالغ فيه وبتشوف الامور من منظور مختلف مش مناسب للعصر اللى عايشين فيه بس برده نجاحها فى تغيير البطل فى الجزء الاخير من الروايية يثبت انها على حق فى بعض الحاجات
محمود بشير
التهور والحمق ماشى على قدمين بيفكرنى بزعماء المعارضة اللى موجودين اليومين دول وعلاقته بسالى اللى كررت هجرها ليه اكتر من مرة بيضع نفطة استفهام حوالين شخصيته
بس فى النهاية مكنش يستحق اعدامه
عز الدين فكرى
من اكتر الشخصيات اللى اعجبت بيها فى الرواية واللى فعلا لو عاوزين نشوف تغيير حقيقى لازم يكون عندها من العقلية ديه مع اختلاف طرق التنفيذ وانها تكون اقل حدة بس فى النهاية مينفعش مع شعبنا الا الحلول الجذرية لان الرقص على السلم والحلول اللى بترضى كل الاطراف ديه شىء اسطورى زى العنقاء وزعلت على موته رغم اللى عمله
حركة الالتراس
نفس الصفات اللى بيتصفوا بيها فى ارض الواقع
حركة معا
شىء خيالى يستحيل يتحقق عشان الاخوان عمرهم ما هيتغيروا من شب على شىء شاب عليه وخصوصا لو فترة الشباب استغرقت 80 سنة
الرئيس بيومى=الرئيس مرسى
----------------------------------
ايه رايك ف اعدام عز الدين فكري و محمود بشير و هما كانوا يستحقوا كدا ؟وازاي كل واحد فيهم بيحاول يخدم البلد بالطريقة اللي يلاقيها صح؟
الاتنين ميستحقوش الاعدام خصوصا عز الدين فكرى لان فكره الاصلح للتنفيذ لان مجتمعنا على مدى ال30 سنة اللى فاتت اترسخت فيه صفات مينفعش معاها غير الحلول اللى انتجها عز الدين فكرى اما محمود فا كونه اهوج ميبررش ابدا اعدامه ممكن كان يبقى رهين الاقامة الجبرية او ينحى عن الاضواء مع انى اشك انه هيستكين
عز الدين الفكر الاصلح اما محمود فكر العشوائية والتحبط والتفكير لمجرد انك تعمل توازنات قوى عشان تجبر خصومك يوافقوك الرأى فا ده فكر العجزة يعنى انت مسخر كل تفكيرك فى ازاى تفضل فى المكان اللى انت فيه بغض النظر انت انجزت ايه
----------------------------------
الكاتب مقتبس من حياته الشخصية بعض معلومات ف الرواية
اظن الصداقة بين عز الدين وعلى والمنصورة وذكرياتها باختلاف المدينة لانى معرفش مولده كان فين
الخط ده كله اظنه مقتبس منه كتير واكيد تحليلاته الشخصية
----------------------------------
هل تتوقع فعلا حدوث مثل تلك الحرب بين ايران و امريكا
وتتوقع حاجة زي ان اسرائيل ممكن تحتل مصر ؟
حاجة صعبة بس مش مستبعدة
----------------------------------
ممكن لحد سلبي طول عمره فجأة يتحول 180درجة و يقرر انه
ياخد قرار ممكن يحول مصير دولة بالكامل
ايوه وبشدة
----------------------------------
ايه اللي استفدته من الرواية دي
ويا تري الروايه دي فرقت معاك ف حاجة معينة او غيرت فكرك
تجاه موضوع معين؟
اكيد التحليلات السياسية والتفاصيل المرهقة عن تحليل المشهد السياسى كلها مستقرة فى ذهنى ومش مستبعد حدوث اى سيناريو فيهم
غيرت فكرى انى بقيت متعادل كأى محلول ملحى يحترم نفسه \وفكرة التعصب لفكرة او شخصية وانى افضل احرق فى دمة فى الدفاع عنها على طول الخط وفى النهاية تخذلنى بافعالها ده بقا ماضى ومن وقتها وانا ابتديت انتهج منطق
ان احسن وان اساء يعنى احاسبه بالمواقف مش بشكل كلى على بعضه كده
-------------------------------
--------------------1-تقييم الكاتب
أكثر من رائع .. هرم من أهرام الأدب المصري الحديث
2-دي اول روايه تقراها للكاتب والكتاب دا هيشجعك تقرا له
كتب تانية؟
ولو قريت الرواية دي أحسن رواياته و لا ليك راي تاني؟
كانت أول رواية أقرأها.. قرأتها نسخة بي دي أف .. وجعتني عيوني كتير بس ما قمت عنها الا لما خلصت :) وكون النسخة المطبوعة غير موجودة بسورية قمت بطباعة النسخة الاكترونية للاحتفاظ بها ورقيا واشرت بها إلى الكثير من الأصدقاء :) .. قرأت بعدها غرفة العناية المركزة والآن أقرأ مقتل فخر الدين .. وكل كتاباته رائعة بالرغم من السلبية والقتامة المبالغ فيها احيانا
3-إيه رأيك ف الأسلوب عموما ؟
اسلوب ممتاز .. جمع بين وصف الواقع العبثي وطريقة وصفه المنسقة والمرتبة إلى اقصى الحدود ..بالمختصر فهّمنا الوضع وحدة وحدة
بالنسبة للموضوع :
-----------------------------------
1- ايه اكتر حاجة عجبتك ف الكتاب ولو عندك اقتباس عاجبك اتفضل وقول رأيك؟
أكتر شي أعجبني النماذج البشريةالمقدمة والجوانب النفسية الدقيقة والمفصلة بأسلوب لغوي بارع وقوي
اقتباس اعجبني :
لم أكذب عليها ولا على نفسى هذه المرة. كنت قد فهمت أن فرارها منى حب، وغضبها على رغبة،
وسخريتها اللاذعة منى ومن الحياة أمل ممعن فى التنكر . هذه المرأة ليست يائسة، بل تدَّعى اليأس على أمل
أن أُرِيَها طريقا آخر .
وهذا الاقتباس:
قد أكون موسى، الغرّ، المتعجّل، لكن سيدنا الخضر مات، ولا أنبياء بيننا ليخبرونا عن عواقب أفعالنا البعيدة:
إن رأيت رجلا يقتل غلاما فامنعه، وإن رأيت أحدا يخرق سفينة فقِفْهُ، وإن رأيت ظالما يبنى سورا فلا
تساعده. لا أحد غير الله يرى النعم المتنكرة فى صورة نقمات، فامنع النقمة، ودع البقية للخالق
2- تفتكر ان نسبة من الرواية دي ممكن يتحقق فعلا علي أرض الواقع؟
نسبة منها تحققت واخرى تحقق كل يوم .. ونسبة أخيرة ستتحقق لاحقا .. وكلها ليست بحذافيرها فالكاتب ليس منجماً لكن منطقه في فهم الأمور قريب من الأمور بشكل كبير ..
3- إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛
الرئيس بيومي؟
أعجبني تحليل AhMed لهذه الشخصيات وأؤيده تماما برأيه في كل منها
4-ايه رايك ف اعدام عز الدين فكري و محمود بشير و هما كانوا يستحقوا كدا ؟وازاي كل واحد فيهم بيحاول يخدم
البلد بالطريقة اللي يلاقيها صح؟
كانا يستحقان نهايتهما .. لكنها كانت مؤلمة وكان من الممكن تداركها لو ازدادت نسبة المرونة في الشخصيتين لو أنهما على أرض الواقع ..
5-الكاتب مقتبس من حياته الشخصية بعض معلومات ف الرواية
أعتقد ذلك في الكثير من التفاصيل .. قال في أحد مقابلاته أن شخصية السفاح هي نفسها تطور لخيال الكاتب عن شخصية عز الدين شكري فشير الحقيقية .. وهذه نقطة تحسب لخياله المبدع
6- هل تتوقع فعلا حدوث مثل تلك الحرب بين ايران و امريكا وتتوقع حاجة زي ان اسرائيل ممكن تحتل مصر ؟
لا أتوقع . لكن كل شيء ممكن ..
7-ممكن لحد سلبي طول عمره فجأة يتحول 180درجة و يقرر انه ياخد قرار ممكن يحول مصير دولة بالكامل
أعتقد ذلك .. لأنه يحمل بداخله صمت سنين يهيئ له كل الحوافز لاتخاذ مثل ذلك القرار
8- ايه اللي استفدته من الرواية دي
ويا تري الروايه دي فرقت معاك ف حاجة معينة او غيرت فكرك تجاه موضوع معين؟
كوني سورية أفادني ذلك في فهم المحيط والواقع بتفاصيله المشابهة لمحيطي هنا ..
أعطتني أمل في باب خروج من كل هذه المستنقعات التي وقعنا بها وحولتنا إلى شخصيات مشابهة لشخصية علي بسلبيتها وتشاؤمها .. وفي أمل سيجيء على أيدي الشباب الذي ستتراكم خبرات السنين والوعي لديه بالرغم من كل الأسى الذي سنعيشه قبل الوصول الى ذلك الباب المنتظر ..
1- باب الخروج من اعظم الروايات الى قرياعل على الاطلاق 2- كانت اول روايه لعز الدين وبعدين ادمنت اسلوبه وقريت له عناق عند جسر بروكلين .. وان شاء الله هقرا غرفة العناية المركزة واسفار الفراعين وابو عمار المصرى
3- اسلوبه راقى جدا وغير مبتذل
بالنسبة للموضوع
1-اكتر حاجة عجبتنى وصهه للاحداث بحيادية .. خلانى اشوف الموضوع كانى بشوفه من بره علشان اقدر احكم صح
2- جزءكبير منها اتحقق فعلا
3-انا اكتر شخصية ابهرتنى شخصية على طبعا وعز الدين فكرى .. وكان ليا ملاحظة ازاى على الراوى يوصف صديقة بالسفاح مع العلم انه اللى عمله عز الدين ده كان حل امثل .. وياريت احنا عندنا عز الدين فكرى فى الحياة مصر محتاجة دلوقتى لواحد زيه ووانا اؤيده تماما فى اللى عمله حتى لو كان فيه بعض القسوة .. من رأبى ان وصف غير لائق من صديق زى على لعز الدين قكرى .. اما باقى الشخصيات كانت شخصيات واقعية
4- انا زى ما قولت قبل كده انا اؤيد موقف عز الدين فكرى تماما وطبعا اعدامه كان فيه بعض القسوة واعدامه لمحمود بشير كان قرار عنفوانى وبردو كان فيه بعض القسوة وكان قرار خاطئ جدااا
5- ده شئ اعتقد انه واضح جدا انا لبعض الوقت حسيت انه ان ظروف على اللى اتربى فبها اقرب ما تكون للكاتب وليست شحصية على
6- موضوع ايرات وامريكا اتوقعه جداا بس موضوع اسرائيل ده لوحصل مش هيبقى بالطريقة دى انا حستها طريقة غير منطقية شوية لان الاخوان مش بالسذاجة اللى تخلى القيادات العسكرية تستدررجها للخطأ ده ولا القيادان العسكرية ممكن تلجأ لحل زى ده علشان تبعد الاخوان عن الحكم
7-ده شئ وارد جدااا بس اعتقد اللى على عمله مكانش حل امثل للازمة دى
8-الروايه دى خلتنى ابقى غير مساندة لاى فكر سياسى .. نزعت ثقتى فى كل الاطراف .. ولكن اكسبتنى المقدرة على التحليل الصحيح للاحداث الجارية واكسبتنى اليأس لمستقبل هذا البلد
Mod
This topic has been frozen by the moderator. No new comments can be posted.
د. عزالدين شكري فشير مواليد المنصوره 1966 و حاليا أستاذ العلوم السياسية بالجامعة الامريكية بالقاهرة ليه خمس روايات غير باب الخروج اشهرهم غرفة العناية المركزة و عناق فوق جسر بروكلين ودول اترشحوا لجايزة البوكر العربي ودا رابط الكاتب عالجود ريدز
http://www.goodreads.com/author/show/...
رواية باب الخروج سياسية بالمقام الأول وهي رسالة من علي لابنه يحي؛علي اللي هو مجرد مترجم تفضل حياته تاخد منحنيات مختلفة لحد ما يبقي فإيده مصير دولة بأكملها،الرسالة دي بتوصف حال مصر من ايام مبارك لغاية أحداث متخيلة من اول الثورة لعام2020والرواية دي كانت مكتوبة علي شكل حلقات في أحد الجرائد
مناقشة للكتاب و الكاتب :
----------------------------------
1-تقييم الكاتب
2-دي اول روايه تقراها للكاتب والكتاب دا هيشجعك تقرا له كتب تانية؟
ولو قريت الرواية دي أحسن رواياته و لا ليك راي تاني؟
3-إيه رأيك ف الأسلوب عموما ؟
بالنسبة للموضوع :
-----------------------------------
1- ايه اكتر حاجة عجبتك ف الكتاب ولو عندك اقتباس عاجبك اتفضل وقول رأيك؟
2- تفتكر ان نسبة من الرواية دي ممكن يتحقق فعلا علي أرض الواقع؟
3- إيه رأيك في الشخصيات الرئيسية " علي.القطان؛ندا؛نور؛محمود بشير ؛عز الدين فكري؛ حركة الالتراس ؛ وحركة معا ؛الرئيس بيومي؟
4-ايه رايك ف اعدام عز الدين فكري و محمود بشير و هما كانوا يستحقوا كدا ؟وازاي كل واحد فيهم بيحاول يخدم البلد بالطريقة اللي يلاقيها صح؟
5-الكاتب مقتبس من حياته الشخصية بعض معلومات ف الرواية
6- هل تتوقع فعلا حدوث مثل تلك الحرب بين ايران و امريكا وتتوقع حاجة زي ان اسرائيل ممكن تحتل مصر ؟
7-ممكن لحد سلبي طول عمره فجأة يتحول 180درجة و يقرر انه ياخد قرار ممكن يحول مصير دولة بالكامل
8- ايه اللي استفدته من الرواية دي
ويا تري الروايه دي فرقت معاك ف حاجة معينة او غيرت فكرك تجاه موضوع معين؟
----------------------------------
اخيرا المناقشة دي معمولة عشان نستفيد يعني كل واحد يعرف طريقة تفكير التاني و اراؤه ودا هيزود حصيله الاستفادة من الكتاب
و كل واحد ياريت يقرا تعليقات الناس التانيين
عشان يكتسب وجهات نظر مختلفة و رؤيته للكتاب متبقاش من منظور واحد بس
شكرا مقدما علي مشاركتكو :-)