Egyptians Good Readers discussion
مجتمع الجود ريدرز
>
كلمنا عن : مكتبتك
الصورة الي انت حاططها رائعة :)مكتبتي في دولاب الهدوم , لقيت ان الافضل طرد الهدوم من الدولاب و رص الكتب مكانها, الكتب متنوعة لكن اغلبها مجموعات قصصية او روايات , بقالي فترة عاوزة انزلهم واعمل بيهم قائمة عالكمبيوتر بس الكسل وحش
جمعت الكتب الي انا قرأتها فوق بعضها على جمب في الرف جوة وقدام الكتب الي انا عاوزة اقرأها مش مهتمة بترتيبها ف دور القراءة لاني ممكن اغير رغبتي في لحظة لو حد اقترح عليا اقرأ كتاب مختلف وممكن اشتري كتاب يخليني ابعد خالص عن الكتب كلها
بحاول اخلي بالي ان الكتب متقفش وتبقة مرصوصة فوق بعضها لان الكتاب لو واقف الورق بتاعه بيبوظ وكمان علشان درفة الدولاب تحتمل معرفش ازاي اضيف صور ف الكومنتات بس انا تقريبا واخدة درفة واحدة
في سلسلة الجوايز مش كاملة لكن بعض منها
وكتب الهيئة العامة
كتب الهلال من النبي دانيال
روايات "المنسي قنديل" "رضوى عاشور" "ابراهيم عبدالمجيد" "احسان عبدالقدوس" "انيس منصور" "ابراهيم عيسى" "هاروكي موراكي" "ماركيز" "يوسف ادريس" "طارق امام" يحيى الطاهر عبدالله" "عزالدين شكري فشير" وبعض اعمال الاصدقاء الكتاب الشباب "الشيماء حامد" "مصطفى ذكي" "جيلان الشمسي" "محمد ابو عوف" " محمد ذهني " ان شاء الله اعمل قائمة وانزلها :)
الفكرة حلوة والموضوع حلو
عبارة عن مجموعة كراتين كتب كل كاتب مرصوصة فوق بعض مع كل اضافة اعيد ترتيبها لحد ما ربنا يسهل و اعمل واحدة خاصة بيا
أنا بقى مكتبتى مقسومة نصّين نصّ فى بيتنا والنصّ التانى فى بيت تيتة .....اللى فى بيتنا عبارة عن مكتبة بسّ على صغير فى أوضتى وعن تصنيف الكتب فأنا مصنفاهم على حسب الاكثر قراءة بالنسبة لى فى كتب كده معينة اما بكون متضايقة أحب اقراها مرة واتنين وتلاتة ومحتفظة عن معظم الكتب اللى عندى بنسخ الكترونية على اللاب بتاعى عشان يكونوا يعنى على قد ما اقدر معايا .... وعن معظم المواضيع اللى فيها فمعظم الموجود عندى بيتراوح بين موسوعات كاملة فى مواضيع مختلفة من موسوعة مثلا سليم حسن لحد القصص اللى كانت عندى من وأنا لسه فى ابتدائى وماما كانت جايباهالى :) ولحد الروايات بقى روايات مصرية وعربية أو مترجم لناس كتيييييييييير بقى من اروع الادباء وأغلاهم على قلبى .... طريقة رصّهم بقى بحطّهم فوق بعض كده على حسب التصنيف بقى اللى كنت بقوله ده" الاكثر قراااءة والمفضّل " واللى منهم برضو كتب قصص مصورة وميكى برضو لسه أحب أقرأها احم احم ا ^_^ المكتبة المنزلية هى اللى بيجتمع فيها كتب لكبار الكتّاب والادباء جنبا الى جنب مع روايات براعم الطفولة والمغامرون الخمسة ....اصلا المكتبة مش مجرد مكان بتجمّع فيه كتب - لا دى مكان وانت بتشوفه كده بتشوف فيه نفسك وانت بتكبر معاها واختلاف اهتماماتك وقرائاتك ومستوياتها بتلاقى نفسك من وانت طفل وبتشوف قصص الانبياء ومغامرات أرنوب لحد ثلاثية غرناطة مثلا ورياض الصالحين ...... يااااه فكّرتونى والله بأحلى أيااااااام ^_^ <3 " ا
انا بئه لحد سنتين فاتوا .. مكنتش اعرف يعنى ايه كتب ولا ان مصطلح مكتبه ولا اهميته .. لحد ما ربنا اراد و فوقت لاقيت عالم تانى .. عالم ياخدك و يوديك الحته اللي انت عايزاها و انت في مكانك .. اكيد انتوا عارفين الكلام ده اكتر منى .. و على الرغم انى زعلانه على العمر اللي فات .. على اد مانا بقول الحمدلله ان الفرصه لسه قدامى ...و على اد انى كل ما اخرج مبرجعش بايدى فاضيه :)اما بالنسبه للمكتبه .. فلسه معنديش مكتبه ثابته .. اهو جزء في المكتب و جزء فوق رف السرير و عملت زى رانيا جبل المقطم في الدولاب ... اما بالنسبه لنوعيه الكتب .. فابتديت معايا دينى و قلبت بسياسي " و خصوصا المسائلة اليهودية " فتاريخ فعلم نفس فاكتشفت ان مفيش فاصل بينهم و ان كل الكتب بينها خط رفيع رابطهم ببعض بيكمل جزء من الصورة اللي مكناش شايفينها .. لا و تضحكوا عليا لما اشطح بخيالى و اتخيل لا قدر الله قامت حريقه في بيتنا ,... هانقذ كتبي ازاى .. حاجه كده زى فيلم المصير و الا الحاجه كيلوباترا يوم حريق مكتبه اسكندريه والله ده انا يجرالي حاجه:))
يله ربنا يزيدنا من علمه و فضله
Ahmed wrote: "كلمنا عن مكتبتك
.. شكلها .. ابعادها .. بترتبها ومقسمها ازاي ؟ ... انواع الكتب اللي فيها .. اهتمامك بيها ...... الخ
خد راحتك
فرصة ندخل مكتبات بعض ونستفيد افكار جديدة :)"
مكتبةعبارة عن دولاب متوسط الحجم امتلئ بالكتب المتنوعة فى اكتر من مجال
كتب اسلامية - تاريخية - روايات ادبيه -روايات انجليزية - كتب تنمية بشرية - قواميس
ونظرا لأمتلائه تحولت حجرتى بكل ركن فيها الى مكان اضع فيه كتبى لحين اشعار اخر
مكتبتى الخشب صغيرة جدا 5 رفوف
عرض متر
طولها 2 متر
الكتب فيها كتتييير جدا
كنت حاشر الكتب فوق بعض وجنب بعض منغير وكان شكلها مش عاجبنى
رحت مجمع الكتب اللى انا قريتها وحطيتها بين الدولاب وبين الحيطه فى مكان ياخد كتاب بالعرض ورصيتهم من الارض لحد السقف
فضل شويه الكتب الللى لسه مقريتهمش رصيتهم علي ال5 رفوف بشكل جميل
انواع الكتب من كل لون ياباتيستا
تاريخ ادب فن فلسفه روايات مقالات موسوعات ملاحم واساطير ودين اسلامى ودين مسيحى ونسخه من العهد القديم والجديد
عربى وانجليزى
وقصة الحضاره ودى طبعا واخده اتنين متر طول لوحدها جنب الدولاب
وتاريخ الاسلام فى الاندلس
طبعا بعت منها كتير لضيق المساحه
وجبت ليها كتيير ومقدرش استغنى عنه
ادمااااااااااااااااااااان
وحاسس انها صغيرة جدا وناقصها كتب كتتير قريتها بس معنديش نسخ منها
او نفسى اقراها بس مش لاقيها
او قريتها وعندى بي دى اف فمش بشتريها
شوفت مره فى فيلم أجنبى كان دكتور فى الجامعه وعلي كل عامود فى بيته حاطط عامود كتب وحاططه عليه فازة
نفسى اعمل كده
بس طبعا مراتى مش هترضى
:(((((
عشان النظافه
على فكره صوره جامده
I like the picture so much, it's so expressive :)I don't have a library yet :( but isA I will have one very soon :)
مكتبتى صغيرة جدا .. هى دولاب صغير كده فى التسريحة وانا استغليته لكتبى :D .. وكل كتبى عامة هى فى الادب والروايات فمنظماها من حيث حجم الكتب .. معظم الكتب اللى عندى هى مجموعة محمد المنسى قنديل .. ومجموعة جابريل ماركيز .. وكتب لبلال فضل وتوفيق الحكيم واحمد خالد توفيق ونبيل فاروق وطبعا سلسلة رجل المستحيل وفانتازيا .. وكذا حاجة تاني ... انما الكتب التى فى غير مجال الادب فدى مكانها فى غرفة والدى لانى مش لاقيالها مكان عندى حلمى ان يكون عندى مكتبة زى اللى فى الصورة دى
صورة رائعة جدااا
انا السرير فيه مكتبة ..لحد سنتين فاتوا كان فيها مجلات بس Teenstuff و national Geographic
بعد كده بدأت واحدة واحدة يبقى فيها كتب .. و لأنى انا و حوالى 5 اصدقاء بنجيب الكتب مع بعض .. فـ تقريبا مكتبتنا واحدة .. الكتب متوزعة علينا .. المكتبة مش كبيرة فـ مع الوقت بدأت متشيلش الكتب كلها . بقى فيه كتب فوقيها و كتب ع المكتب .. طبعا هواية انك تنزل الكتب و ترتبها تانى دى لن تنتهى
..
اكتر الكتب اللى موجود هى لـ نجيب محفوظ و كلاسيكيات الادب الانجليزى و الباقى روايات متنوعة و كتب مقالات و دراسات
قررت قدام شوية اخد جزء من الحيطة عرضه 2 متر ولا حاجة و بطول الحيطة و اعمله مكتبه . و افضل ازود فيه لحد ما يلف الاودة كلها ...
قبل عيد ميلادي اللي فات ماكنش عندي مكتبة وكتبي كانت متراكمة فوق بعض في الدواليب والادراج لحد ما بطلت اشتري وبقيت في اللي على النت بسبعدها في عيد ميلادي بابا جابلي مكتبة اخيرا في اوضتي بعد زن كتير ههههههه
هي مش كبيرة ومش صغيرة
حطيت فيها كل كتبي وفضيت الادراج وبقيت باشتري كتب جديدة عشان احطها فيها
هي مستطيلة المساحة اللي فيها تصلح لصفين كتب في نفس الرف مش صف واحد زي بقية المكتبات
فباحط الكتب القديمة ورا
والجديدة قدام
وجبت كرسي هزاز جنب المكتبة
عشان اقعد عليه واقرا الكتب
باستجمام
ودي الحاجة الوحيدة اللي بحبها في البيت ولولا المكتبة دي والكرسي كان زمان هجيت من البيت من زمان هههههههههههه
عندى فى البيت 4 مكتبات واحدة فى الصالة و واحدة فى كل اوضة ( كل واحدة 3 رفوف ) .. لكن الكتب اللى انا باقراها !مرمية جنب السرير
مكتبتي في رف في الدولاب فيه الكتب و نوت فيها الجمل اللي تعجبني من الكتب :)
مكتبتي لسه عملاها جديد عبارة عن رفين مرتبة علي حسب الكتاب فيها 3 مجلدات
صحيح البخاري
زاد المعاد
وتفسير الإمام السعدي
وبعدين كتب للشيخ محمد حسان
كتب للشيخ محمود المصري
كتب لابن القيم الجوزية
كتب لدكتور خالد أبو شادي
كتب لدكتور مصطفي محمود
عندي كام كتاب تنمية بشرية لكتاب مختلفين
وعندي كتيبات كتير جدا
وعندي كتاب واحد لدكتور راغب السرجاني وإن شاء الله هاجبله كتب كتير في الخطة اللي جاية
انا عندى مكتبتين المكتبة الأولى ورا السرير بتاعى بالظبط طولها 2 متر وعرضها متر.بدايتها كانت أيام الثانوية بروايات مصرية للجيب ومع الوقت ابتديت أجمع اصدارات مهرجان القراءة للجميع دا غير مججلات زى مجلة الأزهر والكتيبات المجانية اللى بتصدر معاها ومجلة لغة العصر والتشريع دا غير بعض كتب الدكتور مصطفى محمود والداعية الشيخ أحمد ديدات وبعض كتب التراث زى إظهار الحق وغيره من الكتب وعندى كتب فى التاريخ وفى الدين وفى الشعر وروايات من ضمنها بعض روايات الدكتور يوسف زيدان دا غير إن عندى مكتبة تانية على جهاز الكمبيوتر الخاص بيا دلوقتى وصلت مساحتها ل 11جيجا :)
بحاول أعوض بيها أغلب الكتب اللى مش بعرف ألاقيها مطبوعه :)
مكتبتي معلقة ع الحائط تحتوي على أربع رفوف منها رف مقسم لنصفين و رف مقسم لثلاثة لونها أبيض أغير ترتيبها من حين لآخر تحتوي على مكان للكتب المترجمة و كتب الرأي و الروايات و الكتب الدينية و الكتب العلمية و قصص الجيب :)
بصراحة انا معنديش مكتبة و كتبي في الدواليب و الادراج و هم مش كتير لاني من فترة طويلة بطلت اشتري كتب ورقية و معتمدة على الكنب الالكترونية
بصراحة انا معنديش مكتبة و كتبي في الدواليب و الادراج
كنت عاملة مكتبه في الأول في الدولاب ولازقة ورقة كاتبة عليها وراسمه وكده ومقسمهم تقريبا خمس مجاميع 2 على كل جنب وواحدة في الوش دلوقتي نقلتهم في مكان تاني بس فيها كل الكتب القديمه وكتب الكلية وكده بس
الحاجات اللي بقراها بقى كلها على كومودينو وفي الأدراج ,مبقاش فيه مكان فاضي في على كومودينو خلاااااص :'(
شكلي هستفيد من الافكار دي بقى وابدأ اتصرف علشان كده مينفعش :D :D
وعندي مكتبه تانية بقى على التابلت لل PDFs !
المكتبة عندي ضخمة، مقسمة على 4 دواليب متفاوتة الأحجام، ومنها اللي مفصل خصيصا للكتب، لإن كل شوية اكتشف ان الكتب مالهاش مكان.. المشكلة ان البيت كله قراء، فالكتب كتير جدا، ومتنوعة جدا.. من يوم ما وعيت على الدنيا وعندنا مكتبة، كانت صغيرة صحيح لكن لما أطفال الأسرة كبروا كتبهم زودت المجموعة.الدولاب الصغير للمعاجم والقواميس والكتب العلمية، والوسط أغلبها كتب ادبية ودينية، والكبيرة شوية كتب في السياسة، والجغرافية والتاريخ وأدب أجنبي وأعمال فكرية وسير ذاتية والأطالس والخرائط.
المكتبة الكبيرة بقى أغلب اللي فيها مجموعات.. قصة الحضارة، اعمال نجيب محفوظ، موسوعة وصف مصر، اعمال دستوفسكي، وكتب تاريخ وأدب برضه كتير.. الحقيقة المجموعات الأدبية عندنا طلعت كتير قوي! وفيها كمان كتير من كتبنا الدراسية ودي فيها تخصصات كتير ما بين سياسة وقانون وغيره.
الفكرة انها مكتبة مجموعة أفراد مش مكتبة فرد واحد.. لو كل واحد فينا استقل بكتبه هتطلع دولاب صغير كله على بعضه خمس ست رفوف مثلا ..
ماحدش يتخض والنبي :D
غني عن البيان ان الكتب غير المقروءة لها نصيب الأسد في المجموعات دي!
نسيت اقول ان تصنيف الكتب كانت عملية شاقة جدا! لان كتير من الكتب بتتعدد تصنيفاتها. كنت بحاول ارتب كل الكتب دي في قوائم وجداول، ولما واجهتني مأساة التصنيف بطلت، لحد ما اكتشفت جودريدز، فكرة التصينف عن طريق الوسوم أريح ألف مرة من التصنيف عن طريق موضوع واحد. لكن ماعنديش وقت اضيف عليه الكتب كلها للأسف، فباكتفي بإضافة الكتب اللي باجيبها أول بأول، واحط لها تصنيفات دقيقة بقدر الإمكان. وكل ما امسك كتاب من القديم او اتكعبل فيه على جودريز اضيفه.
مأسااااة!
أنا بقا فضيت خزنتين من النيش وحطيت فيهم الكتب، خزنة لكتب الأدب وخزنة للكتب غير الأدبية، ونقلت الحاجات اللى كانوا فيهم ف الخزنة التالتة، هى أي نعم شكل الكاسات والفناجين بشع بعد ما كومتهم على بعض، لكن أكيد شكل الكتب أحلى بكتيير. وطبعا أقنعت والدتى بصعوبة شديدة بالتغيير دا. أما بقا السرير فلازم يكون جنبى الكتب اللى بقراها ومعاها المعجم ونوتة ملاحظات..
لكن فكرة إنى أعمل مكتبة فهى فكرة بعيدة فى الوقت الحالى خصوصا إنى وصيت النجار يعملى كام رف زيادة فى النيش، وهتبقى مكتبة معقولة :)
للأسف معنديش مكتبة هما 3رفوف في الدولاب بس مليانين والترتب رف للمجلدات والكتب العربيه ابجديا و بعدين الادب المترجم ابجديا بعدين الكتب الصغيرة زي ما وراء الطبيعة و سافاري و كتب صغيرة .كتير عن الصحابة دا غير pdf حوالي 5جيجا
دى صورة لمكتبتى كونتها فى اقل من 6 شهور الكتب مكدسة جدا فيها
الرف اللى تحت عبارة عن
أدب وروايات الرف اللى ورا مش باين منه حاجة
والفلسفة الامامى شمال
وتكملة الادب الامامى يمين اللى بردو مش باين منه حاجة
الرف التانى علوم (بيولوجيا وفيزيا والاغلب فيزيا ) وتاريخ ومتنوع ... أعداد عالم المعرفة
اللى فوق سيرة كتابين واحد للصلابى والتانى لابن هشام
المكتبة هى عبارة عن اوضة مخصصة ليها وهى واخدة جدارين كدة داير ميدور وفيها ارفف للكتب وكان والدى الله يرحمه هو اللى عاملها اما نوعية الكتب ففمكن تكون 4 اقسام
اول قسم هى كتب للاطفال قصص كتير زى سندريلا والاقزام السبعة
وسندباد وكل الحواتيت الحلوة دى
اما القسم التانى فهو الشعر وفى دواوين زى مثلا
ديوان ايليا ابو ماضى ورسالة الغفران وكتاب الاغانى والمعلقات
والجزء الثالث عبارة عن كتب دينية زى صحيح البخارى
وفتح البارى واحياء علوم الدين وزاد الميعاد وغيرهم
اما الجزء الرابع ودا اللى خاص بيا شوية بحاول ازوده بحاجات متنوعة
روايات لكتاب جداد زى احمد خالد توفيق او يوسف زيدان بعض الكتاب اللى مش عندى زى سيد قطب ومحمد قطب او الشخ محمد عبده وغيرهم
مفيش مكانالكل في البيت بيشتكي من منظر اوضة البنات اللي عاملة زي المخزن من كتر الكتب اللي متصفطة من الارض لحد ايدي ما تطول (2 متر) كده يعني ورا الباب و جنب دولاب الهدوم و اللي في سلات الفاكهة تحت السرير و تحت المكتب و كل حاجة
فمن اسبوعين كده اتخدت قرار حازم اني حنزل البلد و ابيع كل الكتب اللي عندي و اخلي كده 20 كتاب بس فاهلي عز عليهم اوي يا حرام الكتب تتباع بتراب الفلوس و فرحتي بتجميعهم تروح فقالولي بلاش تبيعيهم
فاضطريت عشان لا كده نافع و لا كده نافع انزل البدروم و افضي مكان جنب الحيطة و صفيتهم حسب الحجم من الارض لحد 2 متر في اربع عمدان كده
ولما اجي ادور ع كتاب تقوم الدنيا و ما بتقعدش و بيقعوا ميت مرة و ارصهم تاني و في الاخر مالاقيش الكتاب اللي بدور عليه
كتبي بتيجي تقريبا 500 كتاب ادبية بالاغلب ثم فلسفة وفكر و قليل من كتب علم النفس
اغلبهم اشتريتهم من اكشاك المستعمل في وسط البلد اللي افضل الف عليهم لحد ما رجلي يحفوا و لساني يطلع عليه شعر من كتر ما بفاصل عشان اشتري كتابين ولا تلاتة زيادة
Wafa wrote: "مفيش مكانالكل في البيت بيشتكي من منظر اوضة البنات اللي عاملة زي المخزن من كتر الكتب اللي متصفطة من الارض لحد ايدي ما تطول (2 متر) كده يعني ورا الباب و جنب دولاب الهدوم و اللي في سلات الفاكهة تحت ا..."
هيــا ما بقتش اوضته بنات اصلا :D
ولازم كل ماحد يدخل يقول ايه الكتب دي مش اوضه بنات واحنا نقولهم محدش يقربلها كتبي منطقه محظورة
وبالنسبه للبيع لو عايزه تبيعي انا ممكن اشتري منك ^_^
انا مش عندي مكتبه :/ بس الاوضه كلها ممكن نعتبرها مكتبه كتب كتير جدا جنب السرير و علي المكتب وفي المكتب .. بس اغلب الكتب بقرأها علي الكيندل امازون
فـ ده يعتبر واخد كميه كتب كتير وموفر مكان
مكتبتي كانت مطبخنا القديم :Dاشترينا واحد جديد وحطيناه فوق بعضه بقا مكتبة كبيرة وجميلة
فيها جزء كبير د.أحمد خالد توفيق
جزء د.نبيل فاروق
روايات عربية
روايات مترجمة
قصص قصيرة
شعر
رومانسي
سير ذاتية
مجلات
هاري بوتر
مش مقسمة بترتيب معين بس الكتب الانجليزي علىرف لوحده و العربي لوحده
الصورة فعلا حلوة واد ايه اتمنيت اكون زى البنت اللى فى الصورة واعيش فى مكتبة زى بتاعت الاميرة والوحش كنت مبهورة بالكتب بس من غير قراءة لحد ما دخلت عالم القراءة الممتع والحمد لله أولا وأخيرا على نعمة القراءة والعقل والبصر فعلا صدق من قاال اقرأ وتحتها خفايا :)
الصورة رائعة جدا :) والتوبيك اكثر من رائع مكتبتى هى بصراحة ليست مكتبتى ولكن مكتبة والدى فهو عاشق للقراءة ومقسمها قسم للكتب الدينية وقسم للادب وقسم للروايات العربية وقسم للروايات الاجنبية وقسم لكتب الاقتصاد والسياحة وقسم للفلسفة وعلم النفس
طبعا انا تخصصت فى قسم الروايات الاجنبية فقط واصبحت من عشاقه فكنت بقرأ الروايات الاجنبية حتى فى الثانوية العامة واخفيها داخل كتبى لأقراها
حقيقى احلى اوقاتى عندما اقضيها فى قراءة كتاب
المكتبة اللى عندنا دى مكتبة تلفزيون من غيرر تلفزيون بس كبيرة ..اغلب الكتب اللى فى المكتبة والدى اللى مشتريها ..ثلث المكتبة تقريبا كتب شعر لامل دنقل و الابنودى و فؤاد نجم و فؤاد حداد و ناس تانية كتير بالاضافة لشوفى و حافظ ابراهيم و المتنبى و عنترة ...اصل والدى غاوى شعر:))فى روايات و كتب دين لابن القيم و ائمة كتير و بالاضافة لسير ذاتية و كتب كتير تانية ملهاش لازمة
محمد wrote: "دى صورة لمكتبتى كونتها فى اقل من 6 شهور الكتب مكدسة جدا فيها
الرف اللى تحت عبارة عن
أدب وروايات الرف اللى ورا مش باين منه حاجة
والفلسفة الامامى شمال
وتكملة الادب الامامى يمين اللى بردو مش باي..."
رفعت الصورة دى على الموقع ازاى ؟؟
Menna wrote: "Wafa wrote: "مفيش مكانالكل في البيت بيشتكي من منظر اوضة البنات اللي عاملة زي المخزن من كتر الكتب اللي متصفطة من الارض لحد ايدي ما تطول (2 متر) كده يعني ورا الباب و جنب دولاب الهدوم و اللي في سلات ..."
كلامك مزبوط اوي ع اللي بيدخلوا الاوضة و يفضلوا يعلقوا لحد الصبح
يا ريتني في مصر دي الوقتي كنت بجد اديتهملك هدية عزيزتي منة
والازبكية و الارصفة وحشوني اوي
محمود wrote: "محمد wrote: "دى صورة لمكتبتى كونتها فى اقل من 6 شهور الكتب مكدسة جدا فيها
الرف اللى تحت عبارة عن
أدب وروايات الرف اللى ورا مش باين منه حاجة
والفلسفة الامامى شمال
وتكملة الادب الامامى يمين ال..."
محمود
الفيديو ده يوضحلك ازاي ترفع الصور على الموقع
http://www.goodreads.com/videos/32240
محمد wrote: "دى صورة لمكتبتى كونتها فى اقل من 6 شهور الكتب مكدسة جدا فيها
الرف اللى تحت عبارة عن
أدب وروايات الرف اللى ورا مش باين منه حاجة
والفلسفة الامامى شمال
وتكملة الادب الامامى يمين اللى بردو مش باي..."
مكتبتك مرتبة جدا
عقبالي يا رب
انا الكتب اللى عندى ممكن تكون مرتبة اكتر من هدومى فى الدولاب ..الكتب اللى بتبقى بتاعتى بعتز بيها اوووى وبحب اشيلها فى مكتبى او دولابى مفيش مشكلة مش بحاول احط كتير فى المكتبة بتاعة بيتنا ..عادى ممكن جدا تلاقى صف كتب جنب السرير وكتاب تحت المخدة بتبسط اوووى من منظر الكتب حوليا طبعا مش كتب الدراسة ..طبعا لما اجى ارتب الكتب بحب ارتبها من الكبير للصغير والكتب اللى فى حجم بعضها برتبها الاحلى فى الاحلى ..ممكن تلاقى صف كبيراووووى اساميه عجيبة كله ادب ساخر..وبعد كدا للشمال شوية هتلاقى مجموعة لطيفة لعبد الوهاب مطاوع ..بعد كدا كام كتاب شعر ..وبعد كدا ادخل على الروايات وهى اللى اخدة مساحة كبيرة اووووى ..اما بقى على السرير هتلاقى كتاب ادب ساخر اسمه (كيف تعرف انك حمار ) مبزهأش منه ..فيه حاجات كتير كل ما اقراها بضحك كانى بضحك اول مرة اقراها ..وهتلاقى رواية احلام مستغنمانى الاسود يليق بك ودى لسة حاطاها امبارح بليل وهبدأ فيها النهاردة قبل ما انام ..الكتاب حلو مفيش كلام بس ابعده عن الدراسة :d
My Library is in the Kindle, I'm strongly interested in Science and Science Fiction which enrich my Imagination.
Wafa wrote: "محمود wrote: "محمد wrote: "دى صورة لمكتبتى كونتها فى اقل من 6 شهور الكتب مكدسة جدا فيها
الرف اللى تحت عبارة عن
أدب وروايات الرف اللى ورا مش باين منه حاجة
والفلسفة الامامى شمال
وتكملة الادب ا..."
شكرا جزيلا
ان مكتبتى عبارة عن دولاب صغير يشبه الكومود عبارة عن 4 رفوف كتب مترتبة على حسب اللى انا قريته الكتب اغلبها روايات لنجيب محفوظ و توفيق الحكيم و رضوى عاشور و جمال الغيطانى و احسان عبد القدوس و يوسف زيدان و فيه ثروت اباظة و فى هيكل و فى المكتبة بقى اول رواية قريتها فى حياتى و هى زينب و هى من حلى الروايات اللى قريتها وليها معزة خاصة و بالنسبة بقى للمكتبة عشان هى صغيرة فانا صممت مكتبة تانية كبيرة على شكل مفتاح الصول عشان انا بحب الموسيقى بس لسسه منفذتهاش عشان هتتكلف كتير و شكرا على الموضوع الحلو ده
مكتبتي ؟؟ الأوضة كلها مكتبة....كتب في الدولاب...في الكومودينو...في درج التسريحة...علي المكتب....في أدراج المكتب...أنا رميت جزمي برة الأوضه وقلبت الجزامة مكتبة عشان متقسمة !! أمي بتقوللي هاندخل أوضتك مرة نلاقيكي غرقانة في الورق :D
Amany wrote: "مكتبتي ؟؟ الأوضة كلها مكتبة....كتب في الدولاب...في الكومودينو...في درج التسريحة...علي المكتب....في أدراج المكتب...أنا رميت جزمي برة الأوضه وقلبت الجزامة مكتبة عشان متقسمة !! أمي بتقوللي هاندخل أوضت..."عجبي ع بتوع القراية
ههههههههههههه
فى ارضية الدولاب تحت الهدوم فى اكياس او كراتين عادى ميضرش وشوية فى المكتب لحين اشعار اخر فيها كتب بوليسية وروايات ربنا يسهل بقه واعمل مكتبة احلامى
انا بقى عامل غرفه كامله مكتبه وفيها مكتب وسرير فقط يعني خاصة بالقراءة
انا مكتبتي صغيرة الى حد ما .. ربنا يزيد ويبارك فيها .. بحب اشتري الكتب عشان اكبرها ودي صورتها :
علاقتي بيها زي كده الام وعيالها .. بحب ادلعها وانضفها وارص الكتب اللي فيها كل شويه واغير نظامها ..
(الرف الاول كله من الجزئين خاص بكتب الكليه (علم نفس
والرف التاني - اللي في النص - فيه كتب دينيه على اليمين والروايات والادب والتاريخ والقصص الانجليزيه على الشمال ، او الكتب اللي بشتريها برصها في النص الشمال
اما بقى الرف الاخير .. الناحيه الشمال فيها كتب اختي ولوحها - بتدرس هندسه - والناحية الشمال فيها الكتب اللي مش بحبها اوي بس مش قادرة ارميها .. مخلياها تزودلي كتبي شويه ..
عندي مكتبه تانيه اصغر جمب سريري .. حطه فيها الفلاشات والروايات الجيب .. والاذكار والمصحف بتاعي
وبقالي مده بتحايل على بابا عشان يعملي مكتبه جديده .. هو بصراحه اللي عملي المكتبات دي على ايده .. بيحب يعملنا حاجتنا بايده كهوايه يعني ..
وفالي انه ان شاء الله ناوي يعملي مكتبه كبيره ليا مخصوص :)
وبالتصميم اللي اختاره :)
كلمنا عن مكتبتك
.. شكلها .. ابعادها .. بترتبها ومقسمها ازاي ؟ ... انواع الكتب اللي فيها .. اهتمامك بيها ...... الخ
ويا سلام لو تصورها وتوريهالنا :)
خد راحتك
فرصة ندخل مكتبات بعض ونستفيد افكار جديدة :)