Reham > Reham's Quotes

“قتلوه من التعذيب وقالوا انتحر..
فكرت لحظة وقلت: آه يا غجر!..
لو جنسكم سبناه يعيش في الحياة..
اللي انتحر راح يبقى جنس البشر!”
― صلاح جاهين, رباعيات صلاح جاهين

“دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت

عجبي !!”
― صلاح جاهين, رباعيات صلاح جاهين

“إنسان .. أيا انسان ما أجهلك
ما أتفهك فى الكون وما أضألك
شمس وقمر وسدوم وملايين نجوم
وفاكرها يا موهوم مخلوقة لك؟
عجبى”
― صلاح جاهين, رباعيات صلاح جاهين

“أنا مش تبع مخلوق يا سيدنا البيه
أنا حُر في إللي يقول ضميري عليه
وإن كنت تُحكم جوا ملكوتك
الشارع الواسع فاتح لي إيديه”
― صلاح جاهين, رباعيات صلاح جاهين

“أعرف عيون هي الجمال والحسن
وأعرف عيون تاخد القلوب بالحضن
وعيون مخيفة وقاسية، وعيون كتير
وبنحس فيهم كلهم بالحزن
عجبي”
― صلاح جاهين, رباعيات صلاح جاهين

“غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع

عجبي !!”
― صلاح جاهين, رباعيات صلاح جاهين

“عبثا باقول واقرا في سورة عبس / ماتلومش حد إن ابتسم أو عبس / فيه ناس تقول الهزل يطلع جــــد / و ناس تقول الجد يطلع عبـــــث”
― صلاح جاهين, رباعيات صلاح جاهين

“ليل بعد ليل .. و نجم ورا نجم اتحدف ..
و انا باغني ... لكن لوحدي للأسف ..
لحني الجميل مش لاقي إنسان يسمعه
يا ريته ما اتغنى .. يا ريته ما اتعزف”
― صلاح جاهين, رباعيات صلاح جاهين

“زحام و أبواق سيارات مزعجـــــة
للي يطول له رصيف.. يبقي نجـــا
لو كنت جنبي يا حبيبي أنــــــــــــا
مش كنت أشوف إن الحياة مبهجة
عجبي!!
 
إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي !!
 
يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي !!
 
مرحب ربيع مرحب ربيع مرحبــــــــــه
يا طفل يا للي ف دمي ناغا  وحبــــــــا
علشان عيونك يا صغنن هويــــــــــــت
حتي ديدان الأرض و الأغربــــــــــــــة
عجبي !!!
 
فتحت شباكي لشمس الصبـــــــــــــــــاح
ما دخلش منه غيــــــــــر عويل الريـــاح
و فتحت قلبي عشان ابوح بالألـــــــــــــم
ما خرجش منه غير محبه و سمــــــــاح
عجبي !!!!
 
غمست سنك في السواد يا قلـــــــــــــــم
عشان ما تكتب شعر يقطر ألــــــــــــــــم
مالك جرالك إيه يا مجنون ... و ليــــــــه
رسمت ورده وبيت و قلب و علـــــــــــم
عجبي !!!”
― صلاح جاهين, رباعيات صلاح جاهين

“مع ان كل الخلق من اصل طين
وكلهم بينزلوا مغمضين
بعد الدقايق والشهور والسنين
تلاقي ناس اشرار وناس طيبين”
― صلاح جاهين, رباعيات صلاح جاهين

“ياللي بتبحث عن إله تعـبده
بحث الغريق عن أي شيء ينجده
الله جميل وعليم ورحمن رحــيم
أحمل صفاته .. وانت راح توجده
عجبي

يأسك و صبرك بین إيديك و انت حر
تیأس ما تیأس الحیاه راح تمر
أنا دقت مندا ومندا عجبي لقیت
الصبر مر و برضك الیأس مر
عجبي


أنا قلبي كان شخشيخة أصبح جَرس ....
جلجلت به صحيوا الخدم والحرس...
أنا المهرج .. قمتو ليه خفتو ليه
لا فْ إيدي سيف ولا تحت منى فرس
عجبي !!

سمعت نقطة ميه جوه المحيــط.
بتقول لنقطه ما تنزليش في الغويط.
أخاف عليكي م الغرق .. قلـــــت أنا
ده اللي يخاف م الوعد يبقي عبيط.
عجبي !”
― صلاح جاهين, رباعيات صلاح جاهين

“يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي !!”
― صلاح جاهين, رباعيات صلاح جاهين

“إيديا في جيوبي وقلبي طــــــــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقـــــترب
عجبي !!”
― صلاح جاهين, رباعيات صلاح جاهين

“أحسـن مـا فيهـا العشـق والمعشـقة وشـويتين الضـحــك والتـريقـة”
― صلاح جاهين, رباعيات صلاح جاهين

“إنشد ياقلبى غنوتك للجمال
وارقص فى صدرى من اليمين للشمال
ما هوش بعيد تفضل لبكره سعيد
ده كل يوم فيه ألف ألف احتمال

عجبى”
― صلاح جاهين, رباعيات صلاح جاهين