பின்தொடரும் நிழலின் குரல் [Pinthodarum Nizhalin Kural]

by Jeyamohan

“கிறிஸ்தவம் பெரும் சோர்வை உலகமெங்கும் பரப்பிவிட்டது தோழர். உலகியல் மறுப்பையும் சரணாகதியையும் அது கற்பித்தது. தோல்வியைப் புனிதப்படுத்தியது. கிறிஸ்து யார்? தோல்வி அடைந்த ஓர் இலட்சியவாதி. அவரது தோல்வி தவிர்க்க முடியாதது. இருக்கும் விஷயங்களுக்குப் பதிலாக இல்லாத விஷயங்களை முன்வைக்க முயன்ற கனவுஜீவியின் சரிவு அது. அந்தத் தோல்வியை இரண்டாயிரம் வருடங்களாகக் கிறிஸ்தவம் மானுடத்தின் ஆகப் பெரிய இலட்சியமாக முன்னிறுத்தியது. கிறிஸ்துவின் முகம் காட்டுவது என்ன? துக்கம், புறக்கணிப்பு, தனிமை, நிராசை ஆகிய உணர்வுகளல்லவா? நமது வீடுகளில் அனைத்திலும் சிலுவையேறிய ஏசு, என் தேவனே என்னை ஏன் கைவிட்டீர் என்று ஓயாமல் கூவியபடி இருக்கிறார். அதை வழிபட்டவர்கள் சரணாகதியிலும் துக்கத்திலும் தோல்வியிலும் இழப்பிலும் முழுமையையும் ஆனந்தத்தையும் காண்பவர்களாக ஆனார்கள். அவர்கள்மீது திருச்சபை பெரும் அதிகார பீடமாக எழுந்தது. பாதிரிகளை, புனிதத் தந்தைகளை ஊக்கம் கொள்ள வைத்தது பைபிள் அல்ல. சாக்ரடீஸும் பிளேட்டோவும்தான். தங்கள் அபிக்களில் அவர்கள் அதையெல்லாம்தான் படித்தார்கள். அவர்கள் வழிபட்டது போகத்தையும் அதிகாரத்தையும். அவர்களது கடவுள் சாத்தான்தான். அவர்கள் அனைவருமே சாத்தானைப்போல பெரும் பிரசங்கிகள் என்பதை கவனியுங்கள். ஐரோப்பிய வரலாறு என்பது கிறிஸ்துவை மக்களிடையே பரப்பியதன் மூலம் சாத்தான்கொண்ட வெற்றியின் கதைதான்.”