لأ بطعم الفلامنكو

by محمد طه

فيه مشهد مؤلم جدًّا في فيلم ‏War for the Planet of the Apes، لما أبطال الفيلم قابلوا في ‏رحلتهم قرد كبير في السن، هربان من سجون الجنود الأمريكان، وعايش لوحده في أحد الكهوف من ‏سنين.‏ استنى..‏ المؤلم في المشهد مش إنه كبير في السن أو إنه عايش لوحده فترة طويلة جدًّا في كهف مظلم.‏ ‏ المؤلم إنه لما جه يعرّفهم بنفسه قالهم إن اسمه: باد إيب ‏Bad Ape‏ (قرد سيئ).‏ كان غريب جدًّا إن حد يعرّف نفسه بالاسم ده.. بس بعدها فورًا تقدر تفهم إن ده اللقب اللي كانوا ‏بينادوه بيه الجنود الأمريكان.. كانوا كل ما يشوفوه يقولوا له (باد إيب).. كل ما يندهوا عليه يقولوا ‏له (باد إيب).. كل ما يطاردوه أو يعاقبوه يقولوا له (باد إيب).‏ ‏ طيب إيه برضه المؤلم في ده..‏ المؤلم في ده إنه صدق إن ده اسمه فعلاً.. واقتنع إن دي صفته.. وبدأ يعرّف الناس بيه على إنه (باد ‏إيب).‏ صعب جدًّا.. ومؤلم جدًّا.‏ بس ده البعد الأول فقط من الألم اللي أنا أقصده.‏ البعد التاني من الألم ده هو إن احنا نفسنا ساعات بنعمل كده.. وبنعمل كده مع الناس اللي بنحبهم.. ‏مع أقرب الناس لينا.. مع ولادنا.. مع أزواجنا وزوجاتنا.. مع إخواتنا.. مع زمايلنا في الشغل.. مع ‏أصحابنا.. ‏ وزي ما احنا ساعات بنعمل كده.. إحنا كمان ياما اتعمل فينا ده.‏ يعني الزوجة اللي جوزها طول الوقت يقول لها انتي مقصرة.. إنتي مابتفهميش.. إنتي نكدية.. إنتي ‏جايباني لورا.. إنتي فاشلة.. إنتي أفشلتي حياتي.. هي بعد شوية بتصدق ده عن نفسها، وتتهز ثقتها ‏بيها، وتتكون عندها صورة ذاتية سيئة جدًّا.. وتبدأ تتعامل مع نفسها ومع جوزها ومع كل الناس على ‏إنها فعلاً مقصرة، ومش بتفهم، ونكدية، وفاشلة.. هي بتبدأ ‏ـ‏حرفيًّا‏ـ‏ تشك في نفسها.‏ الولد اللي أهـله بيوصلوا لـه دايمًا إنه وحش.. مش كويس.. سي...