வெட்டாட்டம் [Vettaattam]

by Shan Karuppusamy

ராமசாமி பெரிய அரசியல் புள்ளி அல்ல. அவர் அரசாங்கத்தின் எந்தப் பதவியிலும் இல்லை. அவருக்கு இருந்த ஒரே தகுதி அவர் முன்னாள் முதலமைச்சரின் ஒன்று விட்ட மச்சான் என்பதுதான். இப்போதைய முதலமைச்சர் வருணின் மாமா. கவுசல்யாவின் சித்தப்பா மகன். இதற்கு முன்பாக ஊரில் புண்ணாக்கு மண்டி வைத்திருந்தவருக்கு இப்போது நாற்பத்தெட்டு வயதில் சொந்தமாக மூன்று மது தயாரிக்கும் தொழிற்சாலைகள் இருந்தன. ஒரு சிமெண்ட் கம்பெனியில் பெரும்பான்மை பங்குகளை வைத்திருந்தார். ஒரு கபாடி லீக் அணியையும் ஹாக்கி லீக் அணியையும் வைத்திருந்தார். ஆண்டுக்கு ஒருமுறை பாங்காக், மக்காவ், லாஸ் வேகாஸ் என்று பறந்து பல முக்கியமான ‘தொழில்’ முறை சந்திப்புகளை நிகழ்த்துவார். மக்களாட்சியின் ஊழல் பொருளாதாரக் கட்டமைப்பில் முகம் தெரியாத இது போன்றவர்கள்தான் மிகவும் முக்கியமானவர்கள். பலம் பொருந்தியவர்கள். இவர்கள் இந்த உலகில் இருப்பது பொதுமக்களில் பலருக்குத் தெரியவே தெரியாது. கட்சியிலோ அரசியலிலோ இவர்கள் நேரடியாகவும் பங்கு பெற மாட்டார்கள். விழாக்களிலோ புகைப்படங்களிலோ தென்படமாட்டார்கள். ஆனால் இவர்களைத் தாண்டியோ தொடாமலோ நீங்கள் முக்கிய அதிகார வட்டத்தை நெருங்கி விட முடியாது. பதவியில் இருப்பவர்களின் ஊழல் பணத்தை உலகத்தின் பார்வையிலிருந்து மறைக்க இந்த அடுக்கு தேவைப்படுகிறது. அசிங்கமான காரியங்களை முடித்துக் கொடுக்கவும், தேவை ஏற்பட்டால் குற்றத்தை ஏற்கவும் இவர்கள் எப்போதும் தயாராக இருந்தார்கள். அதற்கு விலையாகவே ஒரு திடீர் செல்வந்தராக வாழும் வாய்ப்பைப் பெற்றிருந்தார்கள். எங்கு வேண்டுமானாலும் நுழைந்து வெளியேறும் திறமை அவர்களுக்கு இருந்தது.