Power Of Positive Thinking (Gujarati)

by Norman Vincent Peale

મારો એક મિત્ર પ્રસિદ્ધ બિઝનેસમૅન છે. એ ઘણી મહત્ત્વની બાબતો સંભાળે છે. અનેક વિષયોમાં રસરુચિ ધરાવે છે. એ હંમેશાં સ્વાભાવિક જ દેખાય છે. એ દરેક કામ કુશળતાથી અને ત્વરિત પતાવે છે, પરંતુ એ ઉતાવળ કરતો નથી. પોતાના સમયને કે કામને સંભાળી શકતા ન હોય એવા લોકોના મોઢા પર જોવા મળે એવું ટેન્શન ક્યારેય એના મોઢા પર દેખાતું નથી. એક વાર મેં એની એવી સ્વાભાવિક શક્તિ પાછળના રહસ્ય વિશે પૂછ્યું. એ હસ્યો અને પછી જવાબ આપ્યો: “એમાં રહસ્ય જેવી કોઈ વાત જ નથી. હું તો ફક્ત મને ઈશ્વરના લય સાથે ગોઠવવાની કોશિશ કરું છું. બસ, એટલું જ. દરરોજ સવારે નાસ્તો કર્યા પછી હું અને મારી પત્ની થોડો સમય શાંતિથી બેસવા માટે લિવિંગ રૂમમાં જઈએ છીએ. બેમાંથી એક જણ કોઈ પ્રેરણાદાયક લખાણનું મોટેથી વાંચન કરીએ, જેથી અમે ધ્યાનના મૂડમાં આવી જઈએ. એ કોઈ કવિતા હોય અથવા કોઈ પુસ્તકમાંથી એકાદ પેરેગ્રાફ પણ હોય. ત્યાર પછી અમે શાંતિથી બેસીએ, જેનો જેવો મૂડ હોય એ પ્રકારે પ્રાર્થના કરે અથવા ધ્યાનમાં બેસે. ત્યાર પછી અમે બંને સાથે મળીને ઈશ્વર અમારામાં તાકાત અને શાંતિપૂર્ણ શાંતિ ભરી રહ્યો છે એવા વિચારો કરીએ છીએ. આ બધું કરતાં પંદરેક મિનિટ લાગે છે અને એ અમે ક્યારેય ચૂકતાં નથી. અમને એના વિના ચાલી શકે તેમ જ નથી. અમે એવું ન કરીએ તો વેરવિખેર થઈ જઈએ. આ વિધિને લીધે મને હંમેશાં લાગે છે કે મારામાં જરૂર કરતાં વધારે શક્તિ છે અને વધારે તાકાત છે.”