Debora en Seuns

by Helene De Kock

Debora en haar gesin daag een nag uit die bloute op en maak opslae op die dorp. Die dorpenaars begryp hulle nie, want hulle hou hulle eenkant. Maar Debora-hulle is die mense op wie Margot Scott so lank gewag het. Die mense wat haar lewe sal vól maak. Al waarsku haar ma haar dat mense kom en mense gaan. Die Tweede Wêreldoorlog breek uit en Margot leer dat die liefde vol geheime en hartseer kan wees. Tog is dit liefde wat haar dryf om ’n groot sprong te waag die vreemde in. Een wat haar lewe kan kos . . .

430 pages, Paperback

First published March 1, 2015

About the author

Helene se skryfwerk dek ‘n wye spektrum van genres. Sy doen ook joernalistieke werk en skryf resensies vir dagblaaie. Sy skryf al langer as dertig jaar lank en meer as 40 boeke is gepubliseer. Van haar vroeër werke verskyn nou in omnibusse, maar sy skryf steeds nuwe romans asook geestelike werk en kinderboeke. Daar verskyn binnekort nog ‘n omnibus en ook nuwe romans van haar. By CUM verskyn daar ‘n boek oor haar seun se dood met die titel ‘As dood Lewe word’. Sy skryf vir verskeie uitgewers soos Tafelberg Uitgewers, Human & Rousseau, Litera, CUM, Aktuapers en LAPA. Sy het ook ‘n gereelde rubriek naamlik ‘BBP’s’ op www.ekerk.co.za.

Helene skryf graag oor die liefde - maar net so belangrik in haar werk is die klem op die werklike lewe en die eise wat dit aan álle verhoudings stel. Sy verwys na haar romans as verhoudingsverhale. Sy het byvoorbeeld ‘n roman geskryf wat oor ‘n periode van byna ‘n eeu strek. Dit is die liefdesverhale van twee vroue wat nie slegs die trauma van oorlog ken nie, maar ook die pyn van verlange en wantroue. Helene het ‘n Meestersgraad in Afrikaans en Nederlands wat sy cum laude verwerf het. Sy het in 2008 ‘n toekenning gekry vir die beste meestersgraad in Afrikaans en Nederlands aan die Universiteitvan Noordwes. Haar roman ‘Dieper Water’ is juis ‘n uitvloeisel van hierdie studie.

Sy skryf ook kortverhale wat al in bundels opgeneem is. Hierdie bundels is saamgestel deur T.T.Cloete, Jeanette Ferreira en Daniel Hugo.
Helene was verskeie male naaswenner met die ATKV/Sarie pryse vir vervolgverhale en ook die ATKV/rooi rose kortverhaalwedstryd. Al haar vervolgverhale is in boekvorm deur verskeie uitgewers uitgegee en ander romans het weer direk in boekvorm verskyn. Sy gee sporadies lesings oor Skryfkuns aan die Skryfskool van die Noordwes Universiteit asook by die Universiteit van Pretoria.

http://www.helenedekock.com/

Reviews

[Heidi de Goede · Rating 4 out of 5]

4.5 sterre!
My ma is December 2019 oorlede en ek en my pa het nou die dag eers kans gesien vir die een kas. Hierdie juweel het daar uitgepop!
Wonder of vandag se mense die oorlog sou kon hanteer. Maar soos met Covid, pas mens seker aan en bly LEEF!!

[Trisa Hugo · Rating 3 out of 5]

As jy hou van liefdesromans wat afspeel teen 'n geskiedkundige agtergrond, is hierdie boek reg vir jou.

[Madri · Rating 4 out of 5]

Aan die begin van die verhaal gaan Margot Scott en haar ma, Susan, na die Schlagerfeldt-huis om skoon te maak. Margo staan en kyk na 'n foto van Debora en haar drie seuns en wonder wat dit is in die foto wat haar so aantrek. Susan verduidelik dat die foto “punctum” het: “Daardie skaars kwaliteit wat sommige foto’s het. Dit kneus ʼn mens se gemoed. Dis byna of daar ʼn gaatjie in is waardeur mens kan loer. [...] Dis net dat mens weer en nog ʼn keer daarna wil kyk. En sien wat nie gesien kan word nie.” Dieselfde kan van Helene se karakters gesê word; hulle het punctum. Boonop kry Helene de Kock dit reg om die tydsgees van die Tweede Wêreldoorlog besonder goed vas te vang deur o.a. haar gebruik van uitdrukkings en idiomatiese spraak van die tyd. Ek dink nie die Tweede Wêreldoorlog was al ooit vir my so eg soos met die lees van hierdie boek nie. Dit is 'n heerlike liefdesroman wat haar lesers beslis nie sal teleurstel nie.

[Lorraine Mathewson · Rating 4 out of 5]

Indien jy hou van die Tweede wereldoorlog en die menslike dramas, dan is hierdie boek net vir jou. "n Baie goeie leeservaring

[Helena · Rating 4 out of 5]

Die beste in hierdie genre wat ek in 'n lang tyd gelees het. Die karekters is volrond, die storielyn boeiend.