درس الميت الأخير

by محمد هشام دلاش

لكن اليوم عندما رأيت جثة صابر ممددة أمامي،
هامدة جامدة لا حياة فيها، شعرث وكأن كلمات
زوجتي تتجسد لي في وضح النهار.. نهايتك
ستكون سوداء وأي نهاية أكثر سوادا من أن تموت
هكذا كحقل تجارب مفتوح؟! إذن أنا محق.. يجب أن
تكون المخاطرة مجزية بقدر ما هي مهينة.. فقسما
بالله، لن يلمسني أي طالب كائنا من كان إلا بعدما
يدفع المعلوم الإضافي.. عشرين.. خمسين.. مئة.. ما
تجود به طريحته.. وليقولوا عني ما يقولون.. فإذا
كان المرض سيسرق مني حياتي وسعادتي، وإذا كان
سيحرمني حتى من سجائري، فلن أتورع أنا أيضا عن
السرقة منه ولو قليلا.. صبرا يا شقة البحر أنا قادم،

144 pages, Paperback

First published January 24, 2025

Reviews

[Amena Elfar · Rating 5 out of 5]

فكرة الرواية عن المرضى اللي بيتقاضوا أجور على شغلهم كحالات في دروس خاصة لطلاب الطب،حاجة موجودة حوالينا ومحدش فكر فيها قبل كدا لا من ناحية قانونية/شرعية/المريض/أهله/الطلبة/الدكتور..الخ
الرواية عجبتني اوي ولفتني فيها كام حاجة
مبنية كويس وتناول الاحداث كان سلس وعجبني فكرة إن مفيش راوي محدد للرواية، الفكرة كمان جديدة ومقرأتهاش قبل كدا
اللغة سلسة وقوية وكنت قادرة أتذوقها واتبسط بيها وبالجمل اللي بقرأها
أثر فيا بعض الابطال وكنت انغمست في حكايتهم وحبيت اعرف عنهم أكتر
و أهم حاجة مسلية ومزهقتش خالص وخلصت في قعدة واحدة

For more reviews: https://www.instagram.com/ubookia?igs...

[Donia Darwish]

📌 أيُّهما أهون: أن تكون مريضًا فحسب؟! أم مريضًا وجائعًا؟!

هو مش كل واحد عنده علم أو موهبة بيستغلها 🤷‍♀️
يعنى الطبيب بيستغل علمه فى معالجة المرضى
المهندس، المدرس، و، و، و …..
ده انت لو بتعرف تشتغل حاجة يدوية كهواية برضه هتستغلها وتعملك مشروع يدخلك عائد مادى فى الاسبوع أو حتى لو بالشهور..
اومال ماسكين فى دكرور ليه 🤔
مين دكرور وشغلته ايه
ده متعهد توريد مرضى وحالات
يدرسوا عليها الطلبة بتوع طب
فى مراكز خاصة بعيد عن الجامعات والمستشفيات
بس ده استغلال للحالات وحاجة وفقر الناس
مش أحسن ما يشحتوا على الأبواب
ويمدوا ايدهم للى مايسواش
اهو على الأقل عنده حاجة يستغلها زيه زى أى إنسان
المرض كمان هنعمل منه شخص ويبقى ليه اوردرات
شوف ازاى
كل حاجة وليها سوقها وزبونها
حتى المرض بقى عرض وطلب
امال هتخرج دكاترة ازاى
لو ماشوفوش حالات مرضية بحق وحقيقى يدرسوها ويكتشفوا العلاج
طيب لو المريض اتعالج هيطلع كده معاش
غالبا الحالات ميؤس منها العلاج بس كله طبعا بأمر الله
ولو ربنا كتب على الحالة الشفاء مش هنعترض وهنراضيه بقرشين ونشوف غيره قوام

مجموعة من الطلاب، فرش شخصياتهم محمد دلاش فى أول الصفحات، وشاركنا حكاياتهم وأسلوب حياتهم والأهم شخصياتهم وعرفنا بهم فى فصول ومكناش فاهمين الاول ايه اللى هيجمعهم فى السطور
لكن بعد كام شخصية بانت الحدوتة اللى جاية
جمعتهم الدراسة على " عم صابر " شخصيات مختلفة المهزوز والمتوتر، والفضولى الصامت الغامض، واللى عايشة فى الأحلام والدراسة مش فى الدماغ وبتـ flirt على زميلها وعمالة ترسم فى حياة لقدام والدكتور نفسه اللى بيخاف يعالج مرضى واكتفى بالتدريس من برا برا
بس اللى تخاف منه ايه … هيطلعلك أكيد
اشرح بقى يا دكتور الحالة وقولنا فيها ايه بس خلى بالك أحسن يفلسع بين ايديك 🤷‍♀️

الرواية فى بدايتها زى ما قولت عرض لشخصيات الأبطال، كانت فيه منها أجزاء فيها وصف كان عندى عليهم شوية استفهامات ليه ليه 🤦🏼‍♀️ كانت هتقفلنى منها لكن اتعودت أكمل لآخر الصفحات وما حكمش من فقرة ضايقتنى وخلاص
ومبسوطة أنى كملت وماندمتش الفكرة عجبتنى وحبيتها، وطريقة سرد الكاتب خليتنى اتأثر بالفكرة، ازاى ممكن المرض يبقى مهنة مجبر عليها
أكيد مش بمزاجك عامل فيها مريض بس الحاجة والفقر ممكن يذلوا الواحد قد ايه
يترمى على سرير ويسيب الناس تقلب فيه هتحس بوجع كل شخص رقد على السرير
هتقولى ما عادى ايه المشكلة ما هو علشان تطلع دكاترة شاطرين لازم يدرسوا على حالات حقيقية مش تمثيل
عارفة اكيد
بس لما تقرى الرواية هتعرف المقصود ايه وقولى وقتها هتزعل عليهم ولا ايه 🤷‍♀️

أول تجربة ليا مع الكاتب وحبيت أسلوبه وفكرته وأتاثرت بها.

📌إن الصحة هي صمت الأعضاء، بينما المرض هو ثورتهم.. ومن الجيد أن أعضائي عندما ثارت وصرخت سمحت لغيري بأن يستفيد منها.

#مكتبة_دنيا
#قراءات_٢٠٢٥