Maalam | മാളം

by K.S. Ratheesh

കഥയ്ക്കും ജീവിതത്തിനുമിടയിൽ അത്ര സുതാര്യമല്ലാത്ത ഒരിടത്താണ് കെ.എസ്. രതീഷ് ഒളിച്ചിരിക്കുന്നത്. ചുറ്റുമുള്ള ജീവിതങ്ങളിൽനിന്നും മറ്റാരും കാണാത്ത ഒരു കരച്ചിൽ വീണുകിട്ടിയാൽ ആദ്യം അതിലേക്ക് തന്റെ ശബ്ദം ഡബ്ബ് ചെയ്യും. പിന്നാലെ അതിലേക്ക് മറിഞ്ഞുവീണ് ആ കണ്ണീരിനെ സ്വന്തമാക്കി തിളക്കമുള്ള കഥയായി പരിണമിപ്പിക്കും. അതുകൊണ്ടാണ് ഓരോ കഥയിലൂടെയും കടന്നുപോകുമ്പോൾ ഇതെന്റെ കണ്ണീരാണെന്ന് ഞാനും നിങ്ങളും കഥാകൃത്തിനോട് തർക്കിക്കേണ്ടിവരുന്നത്. പഠനം: ഡോ. നിബുലാൽ വെട്ടൂർ കെ.എസ്. രതീഷിന്റെ ഏറ്റവും പുതിയ ചെറുകഥാസമാഹാരം.

144 pages, Paperback

First published May 31, 2024

Reviews

[Lijozzz Bookzz]

നാട്ടിൻപുറങ്ങളുടെ പശ്ചാത്തലത്തിൽ എഴുതപ്പെട്ട കഥകളാണ് കെ. എസ്. രതീഷിന്റെ “മാളം” എന്ന ചെറുകഥാസമാഹാരം. നാട്ടിൻപുറങ്ങൾ പശ്ചാത്തലമായതിനാലാവാം ആ കഥകളിൽ എല്ലാം തന്നെ പച്ചജീവിതങ്ങളുടെ അടയാളപ്പെടുത്തലുണ്ട്. കെ. എസ്. രതീഷിന്റെ അടുത്തകാലത്ത് ഡിസി ബുക്സ് പ്രസിദ്ധീകരിച്ച ഗ്രന്ഥമാണ് “മാളം.” പത്ത് കഥകളാണ് ഈ സമാഹാരത്തിലെ ഉള്ളടക്കം. ഇതിലെ പത്ത് കഥകളും സംവേദനം ചെയ്യുന്നത് വ്യത്യസ്ത പ്രമേയങ്ങളാണെങ്കിലും നാട്ടിൻപുറങ്ങളിലെ പച്ചപ്പ് എല്ലാ കഥകളിലുമുണ്ട്. താൻ ചെയ്തുപോയ തെറ്റുകളിൽ ശിക്ഷികപ്പെട്ടു ട്രാൻസ്ഫർ ആകുന്ന ഒരു അധ്യാപകൻ എത്തുന്നത് സമാനാനുഭവത്തിൽ ജീവിക്കുന്ന മറ്റൊരു അധ്യാപകന്റെ അടുത്താണ്. അവരുടെ ജീവിതം ചൂഷണം ചെയ്യുന്ന ലാസർ എന്ന ഒരുവൻ. അവരുടെ കഥയാണ് “മാളം.” ഉള്ളിലുള്ളതിനെ ഭയക്കുന്ന വെറും മാളങ്ങളാണ് മനുഷ്യർ. പിടിക്കപ്പെടുവോളം അവൻ മാന്യതയെന്ന മുഖംമൂടിയിലാണ്. മാന്യതയുടെ മാളത്തിൽ ആരും സുരക്ഷിതരല്ല എന്ന ആശയം ആണ് ഈ കഥ സംവദിക്കുന്നത്. പ്രിയപ്പെട്ടവരുടെ മരണത്തിൽ മനംനൊന്തിരിക്കുന്ന ഒരു മനുഷ്യന്റെ മുന്നിൽ വന്നുപെടുന്ന ലൈംഗികത്തൊഴിലാളിയും അവളുടെ മകന്റെയും കഥയാണ് “ബദറുത്തായ.” പ്രതീക്ഷയുടെ തിരയിളക്കങ്ങളാണ് ഈ കഥയിൽ മിന്നി മറയുന്നത്. മനുഷ്യബന്ധങ്ങളിലെ പൊള്ളത്തരം അനാവരണം ചെയ്യുന്നവയാണ് “പാലവും”, “ഇനിപ്പും”, “മാരുതീയം” എന്ന കഥകൾ. ബന്ധങ്ങളുടെ ഊഷ്മളതയാണ് “ഇലത്താളം”, “ചിരിക്കണ പേരയില് പാടന്നൊരു കട്ടില്” എന്ന കഥകൾ. സാമൂഹ്യത വളർത്തേണ്ട കലാലയങ്ങളിലെ വർണവിവേചനത്തിന്റെ കഥയാണ് “നിറം.” തിരശീലയ്ക്ക് പിന്നിൽ തളർന്നുപോകുന്ന നടകകലാകാരൻമാരുടെ പച്ചയായ ജീവിതമാണ് “നാട്യശാസ്ത്രം” എന്ന കഥ. മാളം എന്ന കഥാസമാഹാരത്തിലെ കഥകൾ എല്ലാം തന്നെ ഒന്നൊന്നിനോട് കിടപിടിക്കുന്നവയാണ്. പ്രിയ സുഹൃത്ത് കെ. എസ്. രതീഷിന് എല്ലാവിധ ആശംസകളും.

[Anuroop Kuniyil]

നമുക്ക് ചുറ്റും നടക്കുന്ന സംഭവങ്ങളെ  വിഷയമാക്കി രചിച്ച പത്ത് കഥകളാണ് ഈ സമാഹാരത്തിൽ ഉള്ളത്. കഥാകൃത്ത് തന്നെ ആഖ്യതാവുന്ന രീതിയിൽ ആണ് രചന. കഥാകൃത്ത് ഒരു അധ്യാപകൻ ആയതുകൊണ്ടാണോ എന്നറിയില്ല മിക്ക കഥകളിലും സ്കൂളും അധ്യാപകരും  കഥാപാത്രങ്ങളും കഥാ പശ്ചാത്തലവും 
ആയി ചിത്രീകരിപ്പീട്ടിരിക്കുന്നു. ഇഷ്ടപ്പെട്ട കഥകൾ മാളം, നിറം, നാട്യശാസ്ത്രം.

[Ajith Sarma]

A collection of short stories built around marginalised lot in the society. The story with title name is great else all ok

[Umesh]

കെ എസ് രതീഷിന്റെ മാളം
മികച്ച കഥകൾ ഉൾക്കൊള്ളിച്ചൊരു സമാഹാരം നമുക്ക് ചുറ്റുമുള്ള ചിലരെയെങ്കിലും കഥാപാത്രങ്ങളോട് ചേർത്ത് വെക്കാൻ പാകത്തിൽ ലഭ്യമായതിനാൽ വായന രസകരമായി