Morðin í Dillonshúsi - Örlagasaga mæðgnanna Sigríðar Ögmundsdóttur og Huldu Karenar Larsen

by Sigríður Dúa Goldsworthy

Örlagasaga mæðgnanna Sigríðar Ögmundsdóttur og Huldu Karenar Larsen

Fyrir 70 árum gerðist hræðilegur harmleikur í Dillonshúsi við Suðurgötu 2 í Reykjavík. Að morgni 26. febrúar 1953 gaf heimilisfaðirinn eiginkonu sinni og þremur ungum börnum þeirra eitur og svipti svo sjálfan sig lífi. Í þessari bók er sögð saga þeirra sem við sögu komu.

Eiginkonan, Hulda Karen Larsen, ólst upp fyrstu árin í Reykjavík á þriðja áratug tuttugustu aldar hjá einstæðri móður sinni, Sigríði Ögmundsdóttur. Ævi Sigríðar er átakanleg saga ástarbrigða, fátæktar og umkomuleysis en líka saga fagurra dyggða og mannlegrar reisnar. Sigríður þurfti að láta frá sér tvö börn í einstæðingsskap sínum en fann loks hamingjuna með góðum manni og stórum barnahópi uns harmleikurinn skall á og mótaði fyrir lífstíð alla þá sem honum tengdust.

Höfundurinn, Sigríður Dúa Goldsworthy, er systurdóttir Huldu Karenar og ömmubarn Sigríðar. Aðalheimildir bókar hennar eru persónulegar frásagnir og bréf fjölskyldumeðlima. Sigríðar Dúa skrifar af innsæi og nærfærni um ótrúlega ævi ömmu sinnar og hörmuleg örlög frænku hennar og litlu barnanna þriggja.

Þetta er bók sem lætur engan ósnortinn.

Genres: Audiobook

308 pages, Hardcover

Published January 1, 2023

Reviews

[Magnús · Rating 5 out of 5]

Þetta er alveg svakalega fín bók og allt önnur en halda mætti út frá titlinum að hér sé einhver ægileg glæpasaga: Morðin í Dillonshúsi. Þannig lagað kemur hún skemmtilega og mjög þægilega á óvart. Þetta er í raun saga íslenskrar alþýðufjölskyldu á fyrri hluta og um miðbik 20. aldar. Það eru umbrotatímar í samfélaginu, það er skortur og ýmsir erfiðleikar en fólk kemst af með dugnaði þrátt fyrir ýmislegt basl. Það er svo ekki fyrr en undir lokin að harmleikurinn ægilegi byrjar að teiknast upp. Aðdragandunum er lýst þar sem ungur maður verður geðveiki að bráð, það er ekki gripið í taumana eins og hefði átt að gera og þetta endar með skelfingu. Öllu er lýst af nærgætni, engir dómar felldir, ekkert ofsagt heldur akkúrat nóg. Mjög vel skrifað eins og reyndar bókin öll. Þegar upp er staðið að bók lokinni þá held ég að enginn standi upp án þess að vera djúpt snortinn og hugsi. Þessa bók ættu allir að lesa.

[Ronja Rafnsdóttir · Rating 4 out of 5]

4.5* Yndisleg bók, ofboðslega falleg en sorgleg. Það var svo gaman að lifa sig inn í Reykjavík á fyrri hluta 20. aldar.

[Kristín Hulda · Rating 5 out of 5]

Mögnuð bók og hreyfði mikið við mér. Meistaralega vel fléttuð blanda af skáldskap og raunveruleika. Fletti höfundinum strax upp eftir lestur og trúi varla að hún hafi ekki skrifað fleiri bækur en raun ber vitni. Fyrstu hlutar bókarinnar gefa mikla innsýn í líf fátæks fólks í Reykjavík á árum áður og aðstæður eru svo vel skrifaðar að þær verða ljóslifandi. Þvílíkur dugnaður og harka. Sagan öll er svo auðvitað bara stórmerkileg og skilur mikið eftir sig, hugleiðingar um fjölskylduást, geðveiki, sorg og margt fleira. Mæli með.

[Arndis · Rating 5 out of 5]

Virkilega vel skrifuð bók.

[Vala Run · Rating 4 out of 5]

vá!!!
fannst hun smá lengi að byrja fyrst en áttaði mig svo seinna á hvað ég þekkti sögupersónurnar vel. mögnuð frásögn, ég er lika sökker fyrir sannsögulegum bókum. ótrúlegt að ég hafi aldrei heyrt talað um þetta morð áður, bókin tók mig svo sannarlega afrur til 1917-1963 og gaman að fylgjast með samfélaginu breytast lúmskt í gegnum þennan tíma. fannst líka gaman að lesa svona fallega íslensku

[Asa · Rating 5 out of 5]

Vel skrifuð og áhrifamikil saga sem lætur engan ósnortinn.

[Friðrik Gigja · Rating 5 out of 5]

Gríðalega vel skrifuð bók um viðkvæmt og erfitt mál. Gat ekki slitið mig frá lestrinum, þessi bók snart mig svo sannarlega

[Elísabeth Inga · Rating 5 out of 5]

Þessi bók er alveg stórkostleg en í senn svo sorgleg. Sigríður Dúa fer svo vel með þessa sögu og kemur henni svo vel frá sér. Hvernig maður fékk að kynnast og tengjast persónunum og þykja vænt um þær. Allar lýsingar og frásagnir svo vel settar fram og eftir lifir þannig meira tilfinningin um hvað þetta virðist hafa verið dásamlega vandað og gott fólk, frekar en hver þeirra sorglegu örlög urðu.
Það þarf að vanda til verka til að geta komið svona erfiðri frásögn frá sér á svona fallegan máta og það gerði höfundurinn. Klárlega ein besta bók sem ég hef lesið.

[Elinóra Guðmundsdóttir · Rating 5 out of 5]

Ég gat ómögulega lagt hana frá mér. Ótrúleg saga en jafnframt ofboðslega vel unnin og skrifuð

[Hrafnhildur Ingolfsdottir · Rating 5 out of 5]

Vá vá vá, virkilega falleg og átakanleg saga❤️ lagði hana bara frá mér til þess að sofa. Það féllu mörg tár við lok lesturs.

[Manfred Lemke · Rating 5 out of 5]

Þetta er átakanleg saga um örlög fjölskyldu. Áhugavert finnst mér að hér er það svokölluð heldri fjölskylda sem gengur í gegnum raunir ekki síst vegna þess að hún er "heldri". EN: Rithöfundur og útgefandi: Hvernig dettur ykkur í hug að gefa bókinni þennan titil?? Í netheimum myndi þetta kallast clickbait.
Í tæplega þremur fjórðum af bókinni er ekki einusinni minnst á Dillonshúsið. Þar er fallega skrifuð ævisaga/örlagasaga. Svo nálgast frásögnnin umrætt húsið en bókin nánast endar með morðunum. Við fáum góðar lýsingar á aðdraganda morðsins sem snertir morðingjann en svo er bókin allt í einu búin. Í allri sögunni höfum við fengið góðar lýsingar á mörgum atburðum. Hvernig aðdragandinn var, svo atvikið sjálft, og síðan komu góðar lýsingar á eftirmálunum, sem sagt þeim áhrifum sem atburðurinn hafði á þau sem upplifðu hann. En "Tiltils-atburðurinn" fær enga almennilega úrvinnslu... Ég gef gjarnan fimm stjörnur fyrir allt sem er skrifað fram að morðunum. En það sem kemur á eftir er hálfkarað, uppkast, ekki tilbúið til prentunar - sérstaklega í samanburði við fyrri 80% verksins.

[Stella Maren · Rating 3 out of 5]

Ég verð að hætta að lesa umsagnir og gagnrýni annarra áður en ég hef lestur á íslenskum bókmenntum því ég enda alltaf á að einblína á og sammælast þeim að lokum. Frásögnin er áhrifamikil en vá fjöldinn var of drjúgur undir lokin af nafnaupptalningum, svo mikill var hann að mér fannst ég vera að rekja ættir sem ég á ekkert skylt við og ennþá minni þolinmæði fyrir. Það mótar einnig frásögnina heldur mikið að afkomandi sögupersónanna skrifi hana; t.a.m. hafði enginn innan fjölskyldunnar neitt af sér gert og aldrei fjallað með gagnrýnum tóni um þessa strangtrúuðu 9 barna móður (?) sem allt hringsnerist um. Fannst einnig hafa vantað upp á sjónarhorn utanaðkomandi aðila sem er með öllu óháður og hefði getað bætt upp alla fegrun á umfjöllun eða varpað meira ljósi á hvernig fjölskylduaðstæður fólksins voru álitnar af öðrum í samfélaginu á þessum forvitnilega tíma. Áhrifarík samt sem áður, vildi ekki hafa sleppt því að lesa hana en mun ekki koma til með að taka hana aftur upp.

[Kristín · Rating 4 out of 5]

Fyrri helmingur bókarinnar er alveg frábær og saga Sigríðar svo sannarlega átakanleg. Maður heldur svo innilega með henni. Seinni hlutinn er ekki alveg eins góður því við fáum aldrei að kynnast Huldu Karen eins vel og Sigríði áður og að auki verða bréfin of stór hluti sögunnar. Höfundur er fínasti penni og hefði átt að halda áfram með sömu frásagnartækni og í fyrri hlutanum og búa bara til sögu út frá efni bréfanna - nema þeirra allra fallegustu - þau þurftu að fá að vera óbreytt. Sagan fór eiginlega frá því að vera söguleg skáldsaga í að vera sagnfræði. En frábært samt sem áður að fá þessa sögu.

[Berglind Grímsdóttir · Rating 5 out of 5]

Vá, er orðlaus! Hlustaði á þessa bók á Storytel á meðan ég var að labba fjöll og ég gleymdi mér alveg í að hlusta. Þessi bók er svo frábær vitnisburður um hvernig lífið í Reykjavík og í útgerðarbæjum (hér Siglufjörður) var á á fyrrihluta síðustu aldar: erfitt, sorglegt, gaman, yndislegt, átakanlegt, ástríkt og allt þar á milli.
Þessi bók endar mjög sorglega en ég hafði svo gaman að heyra vitnisburð Sigríðar Ögmundsdóttur um lífið hennar (sem var á við líf 10 manns) og svo var gaman/ erfitt að heyra virnisburð Huldu Karenar. Bókin er ljóslifandi og maður upplifir með persónunum gleðina, sorgina, geðveikina og erfiðleikana.
Ótrúleg frásögn - mæli 100% með! 👏🏽

[Unnur Lárusdóttir · Rating 4 out of 5]

Sem ung kona gekk ég um á upphlut í Dillonshúsi á Árbæjarsafni. Við vissum öll að saga hússins var dapurleg og óneitanlega sat hún í okkur vitneskjan um lyfjafræðinginn sem svipti þar fjölskyldu sína lífi. Þessi bók setur söguna í nýtt samhengi, dýpkar hana og gerir jafnvel enn sorglegri. Bókin er innsýn í lífsbaráttu fyrri hluta 20. aldar og mjög góð sem slík. Myndir gæða hana lífi og merkilegt að fjölskyldan hafi lagt sig svo fram um að varðveita minningarnar og söguna. Mæli eindregið með.

[Hreinn Valgerðar Hreinsson · Rating 5 out of 5]

Þetta er mjög merkileg bók skal ég segja ykkur, ótrúleg saga og sögð af mikilli næmni. Hér er veruleikinn beint í æð og persónurnar alltaf nálægt manni, engu ofaukið og ekkert ofsagt. Hef ekki lesið áhrifaríkari bók lengi enda er stíllinn og frásögnin einhver veginn þannig að manni líður eins maður sé í fjölskyldunni og upplifir tilfinningarnar með henni. Fjölskyldusagan sem enginn vill þurfa að segja en Sigríður Dúa Goldsworthy.hefur hugrekkið.

[Vala Hunboga · Rating 5 out of 5]

Virkilega áhugaverðar lýsingar á mannlífi í Reykjavík og Siglufirði. Sérstaklega frá árunum 1930-1950 á Siglufirði. Það gefur auka vídd að lesa þessa bók á sama tíma og verið er að sýna þættina um Vigdísi í sjónvarpinu sem gerast um svipað leyti. Æsa og Vigdís hafa líklega verið í MR á sama tíma og báðar flust til Svíþjóðar. Það er áhugavert að bera þessar tvær frásagnir saman sem byggðar eru á sönnum atburðum. Ég vona að Sigríður Dúa skriði fleiri bækur í framtíðinni.

[Sandra Sif · Rating 4 out of 5]

Takk fyrir að skrifa þessa bók Sigga Dúa. Amma hefur í gegnum árin sagt mér sögur af Huldu Karen og fjölskyldu hennar. Það er átakanlegt að fá innsýn inn í veikindi Sigurðar og áhrif þeirra á fjölskylduna en á sama tíma nærðu að segja fallega frá þeirra sambandi.
Á mánudaginn eru liðin 51 ár og við að undirbúa ættarmót Ögmunds-fjölskyldunnar. Takk fyrir að varðveita söguna.

[Katrín Möller Magnúsdóttir · Rating 5 out of 5]

Kom svo á óvart, hélt að þetta væri glæpasaga en þetta er í raun virkilega falleg fjölskyldusaga með mjög sorglegan enda.
Samskipti fólksins svo einlæg og mér þótti sérstaklega gaman þegar lífinu á Siglufirði var líst.
Umfjöllun um andleg veikindi eru einstaklega vel framsett og af mikilli virðingu „Sigurður var góður maður, en hann var veikur”.

[Már Másson · Rating 3 out of 5]

Bókin er mikið frekar saga Sigríðar Ögmundsdóttur.
Fimlega gert að setja morðin í algert aukahlutverk og taka þau bara fyrir í blálokin.
Átakanleg, raunsönn saga af lífinu á Íslandi á fyrri hluta síðustu aldar, fátæktinni og strögglinu.

[Jóhannes Kári · Rating 5 out of 5]

Kemur svo sannarlega á óvart. Magnaður aldarspegill, ekki síst hvað varðar stéttaskiptingu íslensks þjóðfélags og réttindi og kjör kvenna. Sorgleg viðhorf til geðsjúkdóma og vanmáttur læknisfræðinnar til að taka á þeim kemur vel fram. Einstök bók, hvet alla til að lesa hana.

[Heida Hilmisdottir · Rating 5 out of 5]

Var ekki svo spennt að lesa þessa bók en ákvað að drífa í því og endaði á að lesa í einum rikk. Hún kom á óvart, látlaus og fallega skrifuð segir hún sögu þessara mæðgna og samferðafólks þeirra og fjölskyldu.

[Inga Maria · Rating 3 out of 5]

Mér finnst titillinn rangnefni. Bókin er að mestu leyti ævisaga Sigríðar Ögmundsdóttur þó fjölskyldan í Dillonshúsi fái alveg sitt pláss. Það sem mér finnst áhugaverðast, og mætti skrifa meira um, er hvernig læknar og yfirvöld tóku á veikindum Sigga.

[Guðrún Ágústsdóttir · Rating 5 out of 5]

Well written book that touch es your heart ❤️

[Brynja Grétarsdóttir · Rating 5 out of 5]

Mjög vel skrifuð bók sem lætur engan ósnortinn

[Katla Lárusdóttir · Rating 3 out of 5]

Mikil saga.

[Berglind Gunnarsdottir · Rating 3 out of 5]

Èg hefði viljað lesa meira um Huldu karen og hennar fjölskyldu. Vel skrifuð bók og gaman að lesa um fjölskylduna alla og hvernig líf frú Sigríðar var.

[Drifa Alfredsdottir · Rating 5 out of 5]

Falleg bók, þrátt fyrir hörmungarnar… og vel skrifuð,

[Gerða · Rating 5 out of 5]

Virkilega falleg og vel skrifuð bók, það féllu tár í lok bókar.

[Íris Arnardóttir · Rating 4 out of 5]

Gæsahúð, elsku fólkið. Sagan fjallar aðallega um hana Sigríði og hennar hörku en endar á morði dóttir hennar og barnabörnum. Virkilega áhugaverð og dapurleg bók!