Rate this book

خزامى

Name: خزامى
Rating: 4.94 (3 reviews)

د/شاهندة الزيات

Rate this book

هويت عطرك
وروََاحِ الخزامى
وسايب فيك قيراط حزن وملامة
لاقيتك.. قلت أهلًا بيك يا زين
لِقيتك ما رميت حتى ابتسامة
وإيه حالك؟
وإيه حال من وراك؟
وإيه السر لسا ف من يراك؟
وإيه قصة فلان عاشق فلانة
بحجة غيرته من عود الأراك؟
وحجة إنه ليه فيها ابصر ايه
عبيط ناوي يسأل كفيف أبصر ايه
وودتنا الحياة مطرح ما ودت
وودِّت قتلي ف احضانك وفيك
فهل لسا الهموم بتعس فيك
عسيس جيش العزيز عن والديه؟
ومالك؟
فيك رياح ضلمة وغريبة!
خلاص قررت تسأل بعد غيبة
وموال وانكسار عضمك ويا ما!
نسيت لون البنفسج في الخزامى
ولانت ليك طرق ما هْياش طرقنا
وزي الشمس ملت معاها مايل
وزي الأمس غفلنا وسرقنا
وعمل فينا الألم واللوم عمايل
وورتنا الحياة أشكال / عرايس
نصايص فرْح في قالب حزين
ورحت وقال لك الهجران: آمين
وغبت وعَد ليك العمر عدُّه
لقيت الحب معنى الشيء وضده
دفعت لعمرك السابق غرامة
ويا سمرا / يا بيضة وكحيلة
وفيه كام سمرا في البيض الكحايل؟!
فضل فيكِ الأمل لسنين طويلة
يهدد نص ليلة ويوم يحايل
ولا مال من عينيك نظرة بسلامة
عرفنا خلاص بقى لمين القوامة
مع ان قوامة الأيام تكفِّي
فليه كل اما انور لك تطفِّي
وتعزم ع الليالي السود سحابة؟!
هويتك رغم إن البين حِرابة
وحد الحب يتسبِّب بُعادك
وحد الروح تلاقي الروح إجابة
ما تسألش ابن وِحدة عن الرتابة
وميِّل ع الليالي يجوز تدوقها
ما رجعتلكش مرة الريح بشوقها
بتشكي لك وتحكي لك أنينها؟
تقول فيه تجربة هتكون ضامنها
فشمر عن جبينها الروح وعارِب
وقول بكرة الأمل تطرح وعوده
وقول إن الجمال بيبان في عوده
وقول الدنيا عركة وانا المحارب
وباقي تجارب الدنيا.. تجارب
وعديت بك بحور وانا قلبي قارب
ومريت بك بلاد وانا لسا بانده
يا ريح الخير مكانك شرق من دا
ومن ريحك ورق نوار بيندى
ومن ريح اللاوندة بقيت / شاهندة
وقلمي بينتشي عز وكرامة
ولو روحك توليب فأنا الخزامى
ولو عِندك كبير فأنا المعاندة

130 pages, Unknown Binding

Published June 15, 2021