في جسد آخر

by أحمد السندوبي

تحكي الرواية عن المواهب والقدرات الخاصة التي بقدر ما تكون نعمة ربما تكون نقمة على صاحبها. بطل الرواية
حاول الاستفادة من موهبته التي اكتشفها بالمصادفة, وعندما ظن أنه اكتشف فائدتها وبدأ في استخدامها, فجأة انقلبت حياته بسببها, ففقد عائلته وأصدقاءه ومستقبله, بل وفقد كذلك جسده وذكرياته ووجد نفسه في جسد آخر, وبدأ رحلة البحث عن أصدقائه وذكرياته
رحلة من المعاناة والمعارك الخفية التي تدور في فضاء العقول, يظل وسطها يقاوم ويكافح لكي يثبت فقط أنه هو

221 pages, Paperback

Published January 1, 2019

Reviews

[Ayman Tayara · Rating 5 out of 5]

فكرةٌ فريدةٌ من نوعها طرحها الكاتب بأسلوبٍ ساحر لم يذكّرني سوى بالرواية العبقرية (( العطر – قصة قاتل )) للكاتب الألماني باتريك زوسكيند ، الذي كان لبطلها صفة خارقة مشابهة ،امتزج في أحداثها الماضي و الحاضر بطريقةٍ لا تخلو من الغموض و الغرابة و الإبداع فتشغل الحواس الخمس للقارئ دون كللٍ أو ملل ،استرسل في وصف القهوة و سبل تحضيرها داخل صفحاتها الأولى فأجبرني على التوقف عن القراءة و تحضير كوبٍ منها بعد أن سيطر عبق رائحتها على أنفاسي ،أما اللمسات الأدبية الإبداعيّة التي يشعر بها القارئ المحترف تسري كنسماتٍ باردةٍ تحت جلده عندما تقع أبصاره عليها ، فهي ليست بالقليلة ، لتتجلى على قلب القارئ تارةً بمتعةٍ جارفةٍ كتدفّق ذكريات البطل على صفحات النيل ، و تهدر تارةً أخرى كانسياب نهر حياته في في كلية الآداب مثلاً ،و إذا انتقلنا إلى الوصف الدقيق للأماكن فيجعلك تشعر بوجودك داخلها في تلك اللحظات التي يعيشها البطل و كأنك أنت الذي تراقبه من بعيد ،نهاية الرواية كانت قوّية و سلسة في آنٍ واحد ، خاصة عندما نجح الكاتب بعبقريته في اختراق عقل القارئ و إقناعه دون عناءٍ أو تكلّف بشخصيّة ياسر الحقيقيّة ،الرواية رائعة بكلّ المقاييس الأدبية و اللغوية و الإبداعيّة ، مع تمنياتي بالتوفيق الدائم و النجاح في إبداعاتٍ أخرى تدخل البهجة على نفوسنا قريباً ...
د.أيمن طيارة ..

[Shaimaa Mahmoud · Rating 5 out of 5]

ما شاء الله جميلة جدا اكتر حاجة شدتنى ليها الكتابة باللغة العربية الفصحى ايلى بنفتقدها فى بعض الكتابات والروايات الحديثة حقيقى رجعتنى لروايات الفانتازيا الجميلة ايلى من فترة طويلة ماقرتهاش وفيها تفاصيل جميلة تقدر من خلالها تتخيل اماكن مازرتهاش وتتعرف عليها .....
حقيقى جميلة جدا وفى انتظار الجزء الثانى لان لازم يكون ليها ثانى اكثر صعوبة للبطل الآخر صاحب الجسد الآخر

[Eman Abdelnasser · Rating 5 out of 5]

رواية في جسد آخر
الكاتب د أحمد السندوبي
عدد الصفحات ٢٢١
رواية مش طويلة بس مليانه أحداث ممكن تخلص في
قعده من كتر لهفتك علشان تعرف إيه إللي هيحصل
الرواية أحداثها كتيرة جدا بتحس إنك حيران مع البطل وبتجري معاه علشان تدور على إيه إللي حصله وبداية الرواية فكرتني ببداية رواية الجحيم ورواية سنترال بارك وبداية فيلم الشبح وأنا بعشق البدايات إللي زي دي لإنها بتعلي الأدرينالين عندي من أول صفحة
رواية تصنيفها صعب يعني هي فانتازيا وبوليسية فيها تشويق ورومانسية وفيها شوية سياسة من النوع الحميد إللي ما يمنعش نشر الرواية وبيتناول قضايا اجتماعية بطريقة ساخرة نوعا ما
في الرواية البطل بيصحى من النوم يلاقي نفسه في مكان غريب في جسم غريب ومعاه رسالة غريبة مش فاهم منها حاجة فنبدأ مع البطلة رحلة إننا نحاول نوصل لإيه إللي حصله هوا عارف مين إللي عمل فيه كده بس إحنا منعرفش فبيبدأ يحكلنا الموضوع من بداية ما كان مراهق في نفس الوقت إللي بيرجع فيه لأهله ولأصحابه كمحاولة إنه يعرف إيه إللي حصله ويحاول يجمع القطع الناقصة من اللغز ويملا الفجوة في ذاكرته ما بين ما يتذكره والهيئة إللي صحي لقى نفسه عليها
هوا مش بيحكيلنا هو بيتذكر من كلمة أو موقف أو مكان حدث من الماضي إللي إحنا متلهفين جدا إننا نعرفه
أبطال الرواية ياسر الجندي شاب خريج آداب انجليزي
متمرد وشاعر بيحب الأدب ورومانسي بيجري ورا شغفه مش إللي بيطلب منه وشايفاه مثال جيد لمعظم شباب الجيل إللي هيحركه أول ما يتخرج حبه في فترة الجامعة لعلا اللي هيكون عايز يطلبها من أهلها فهيدخل كهف الثعالب علشان يجيب مكسب سريع يأهله إنه يفوز بحبيبته فهو شخص عاطفي في قراراته وأهم حاجة فيه إنه دمه خفيف فبتستمتع بحواراته
هو تاني إخواته التلاته كعادة الأخ الوسط بيبقى متمرد والكبير بيبقى مسئول وشبيه بالأب لو الأب قدوة حقيقية لأولاده وكعادة البنات في العائلات المحافظة بيكونوا مجتهدات لان مفيش حاجة يعملوها غير المذاكرة خصوصا إنها البنت الوحيدة
الأب شخصيته جميلة بس بيحاول طول الوقت يرسم طريق أولاده بحيث يساعدهم على الاستقرار وده طبيعة كل الآباء في المجتمع ده
له ٣ أصحاب طارق اتعرف عليه في إعدادي هندسة مسؤل مجتهد وحيد والدته إللي ربته لوحدها بعد ما باباه مات وده إللي خلاها تخاف عليه بزيادة وتعتبر ياسر صديق سوء ليه لإنه اتفصل من هندسة بسبب سقوطه سنتين في إعدادي لإنه دخلها رغما عنه وخضوعا لإرادة والده إللي كان شايف إنه بيساعد إبنه يختار حياة أفضل بس النتيجة إنه طير سنتين من حياة ابنه
في الناحية التانية فيه محمود وسامح
محمود وياسر أصحاب من قبل الجامعة كانوا بياخدوا دروس سوا وقضوا فترة مراهقتهم بتصرفاتها الصبيانيه مع بعض وهو يعتبر الشخصية الثانوية في العمل والصديق المخلص إللي بيكون في الروايات البوليسية زي طومسون في شارلوك هولمز مثلا
سامح وده صديق السوء بتاعهم
وفيه نيرمين والشيخ صابر ودكتور سامي أدوارهم مهمة بس اتعرف عليهم بنفسك في الرواية
علا بتشترك معاه في شغفه لحب الشعر وبيتبادلوا قصائد وعلاقة رومانسية واقعية جدا وتقريبا دي العلاقة المثالية إللي أي اتنين بيبتدوا علاقة بيكونوا فاكرين نفسهم فيها أو عايزين يوصلولها
أجمل شئ في الرواية برأيي هوا رسم العلاقات الإجتماعية بين ياسر وأخواته وأبوه وأصحابه وحبيبته
وكمان محاولة إدخال معلومات إثرائية للرواية وأنت بتقرأها من غير ما تأثر بالسلب على الأجواء وبأسلوب ذكي جدا وهو تفكير ياسر مع نفسه طول الوقت وإزاي فكرة بتوصل لفكرة أو بتفكر بجملة تفكر بحدث وأسلوب الفلاش باك في سرد الأحداث كان موفق لأنك طول الوقت بتحاول تربط الأحداث بحيث تسبق الكاتب بخطوة وتعرف إيه إللي حصل قبل ما الكاتب يقوله بس متتعبش نفسك لإن كل توقعاتك غلط والنهاية مفاجئة وده إللي خلاني أقرأ الرواية ٣ مرات على فترات متباعدة علشان بعد ما تعرف الحبكة في أول قراءة بتدور في الرواية على الأحداث المخفية إللي أهلت للنهاية وازاي الكاتب كان بيوجه تفكيرنا بالذات في الأحداث إللي كنت بحس فيها إني سابقه الكاتب وعرفت إللي هيحصل
فيه ناس هتقرأ الرواية علشان اللغز إللي فيها وإللي كان طريقة ذكية علشان تحكي القصة البوليسية القائمة على الفانتازيا
وفيه ناس هتحب الجانب الرومانسي في علاقته مع علا وإللي كفيله إننا نفردها وتبقى زي روايات إحسان عبد القدوس
وفيه الجانب الاجتماعي علاقته مع عيلته وأصحابه وده أبدع فيه الكاتب وعبر عن شريحة الطبقة المتوسطة من المجتمع المصري بأفكارها وأحداثها
طول الرواية بتحس إنك بتقرأ لأحمد خالد توفيق حتى فكرة عدم القدرة على الاختراق من قبل قارئي الأفكار ذكرت على استحياء في عدد الجنرال العائد في سلسلة ما وراء الطبيعة بس كمجرد شخصية هامشية في العدد
النهاية عجبتني شخصيا جدا بس نهايات الفانتازيا مش كل الناس بتتفق عليها بس أهم رسالة في الرواية في نهايتها فكانت موفقه
فكرة الرواية معقدة شوية وفيه رسايل كتير بيوصلها الكاتب ما بين السطور واللغة فصحى بسلاسة ومن غير تكلف والأسلوب شيق جدا
أظن إن لو حبيت رواية الجحيم لدان براون وبتحب روايات أحمد خالد توفيق غالبا هتحب الرواية دي وفي بعض الأجزاء الرومانسية هتفكرك بإحسان عبد القدوس وأجزاء تانية من الأحداث بعز الدين شكري فشير
رواية جميلة جدا