الحي التاسع

by محمد خيري

ذات صباح، يدقُ باب منزل عالم الآثار المُتقاعد "كمال زيدان" زائرٌ غريب يرغبُ في شراء منزلٍ في الحي التاسع، في نفس الوقت الذي يتقدم فيه الدكتور مروان بأوراق رسالة الدكتوراه والتي يُناقش فيها الأمراض الانتكاسية.
بعد أيام من الزيارات غير المُبررة يكتشف "كمال" حيلة الزائر، ويقرر خوض صراع مجهول من أجل الحفاظ على سرٍّ ما أخفاه هو منذ سنين، في حين يصل "الدكتور مروان" إلي خيوط الحالة المَرَضيَّة، بعد أن يجد عاملاً خطيرًا يسوقه في نهاية الأمر إلى بيتٍ ما في الحي التاسع.

168 pages, Hardcover

First published January 23, 2019

About the author

كاتب مصري من مواليد الإسكندرية عام 1997، صدرت له رواية واحدة بعنوان «الحي التاسع» عام 2019. تجاوزت قناته على يوتيوب «محمد خيري» حاجز النصف مليون مشترك، وحققت أكثر من مائة مليون مشاهدة، مما جعله واحدًا من أبرز صناع المحتوى الأدبي في الوطن العربي

Reviews

[Dalia Fayez · Rating 4 out of 5]

الرواية جميلة جدا و مشوقة اوي و فكرتها جديدة و طريقة السرد جميلة .. بس اتضايقت جدا من زيادة الوصف التفصيلي للمشاهد الخارجة .. بس غير كده فعلا عجبتني جدا وصعبت عليا جليلة جدا و كان نفسي اعرف مروان عمل ايه بعد كده

[Mohammed Sameh · Rating 3 out of 5]

الرواية جميلة وبداية جميلة للكاتب.
عجبني فيها طريقة السرد والوصف بتاع الشخصيات الابطال وطريقة تقديمهم وخصوصا شخصية كمال ومود الروقان الجرامافون والبحر والهدوء والاهتمام بالتفاصيل
وعجبني فيها شرح العبارات الصعبة علي بعض الناس الي ممكن تكون مش مفهومة.
المزج بين العامية والفصحي كان لطيف.
تقريبا كل الي مجال العلوم عمتا مبدعين 😂💙
لاحظت اخطاء املائية بسيطة وقليلة فالجزء الاول من الرواية بس تغلبت عليها عادي وكنت فاهم الكلام.
كنت اتمني يبقي ليها جزء تاني عشان اعرف
دكتور ثروت شاف الاثار او شك في مروان ؟
مروان باع التمساح ولا سابه ؟
رسالة الدكتورة عمل فيها ايه؟
وحياة مروان بعد كده عمتا.

[Mohammed Fahmy · Rating 3 out of 5]

الرواية كانت هايلة جدا بس المشكلة كانت منى انا بحب دايما وانا بقرا اى رواية اختار أحد الأشخاص واتخيل نفسى مكانه عشان احس بالرواية اكتر وللأسف كان اختياري لمحب الجرامافون اللى الحقيقة اتبهدل فى الرواية وكانت نهاية مأساوية جدا فكانت صعبة شوية نفسيا لكن هقول ايه ما وفقتش فى اختيار الشخصية لكنى برده كان أفضل انى ما اخترتش المتطفل
بداية مبشرة

[Nada Ezzat · Rating 4 out of 5]

كنت حاسة بملل في بدايتها يمكن عشان مكنتش فاهمة الاحداث 😂💔 لكن اما بدأت اربطهم ببعض اتضحلي اني كنت ظلماها ❤

[Roaa · Rating 5 out of 5]

الروايه حقيقي مش لاقيالها كلمه توصفها بس تتلخص في تحفه⁦♥️⁩..احداث مشوقه تشدك تخلصها ف كام ساعه بس من كتر حلاوتها⁦♥️⁩..واحداث غير متوقعه بالمره هتتفاجئ مع كل كلمه من كل طرف ف الروايه⁦♥️⁩
الكاتب متقن من الكتابة ولا هتحس انها اول روايه من الاتقان⁦♥️⁩..تفاصيل دقيقة هتفصلك عن أرض الواقع يعني حقيقي من الاخر شابو 👏

[Hassan Ali · Rating 5 out of 5]

الرواية رائعة جدا،احداث مشوقة،اللغة المتقنة،السرد،الحبكة،التفاصيل الدقيقة ك(البودرة اللى وضعها كمال على مسامير الغرامافون)،طريقة التفكير (دى بالنسبالى اصعب نقطة ف الرواية كلها طريقة تفكير عالم اثار متقاعد فى مواجهة معيد بيحضر لدكتوراه فى كلية طب) شابوه خيرى بجد 💪💪
#عاش_يابو_رفيق

[Nadia Benmira · Rating 5 out of 5]

الحبكة حلوه و تسلسل الاحداث مظبوط جداً مشاء الله و جميل انك ماشى بتدريج بحيث ميبقاش فى مشاهد سريعه و غيرها بطيئه و ممله، احداثها مشوقه تشدك تخلصها ف كام ساعه بس من كتر حلاوتها حبيتها كثير ناطرة رواياتك الجديدة انشاء الله

[Mustafa · Rating 5 out of 5]

بداية موفقة ورواية جميلة

[Ziad Maged · Rating 5 out of 5]

الرواية حلوة جدا.

[Nouran Bassiony · Rating 5 out of 5]

مبدأياً كده يا خيري قبل ما أقولك رأيي ف الروايه عايزه أقولك إن الtrailer و ال quotes إلى كنت بتنزلها للروايه رفعت سقف توقعاتى للسما و كنت حاسه إني هقرأ عمل أدبي من العيار التقيل و ده خلاني خايفه ف الأول إن ملاقيش توقعاتى ف محلها بس لما جيبتها من المعرض و بدأت فيها لقيت نفسي بتشد جوا الأحداث أكتر و أكتر و بقى عندي ترقب مستمر لكل زياره للحي التاسع و عندي فضول أعرف إلى هيحصل ف الزياره دي و طول الوقت كنت عايزه أقرأ أكتر مش عشان أفهم الأحداث قد ما هو عشان أفهم دوافع الشخصيات.
-عجبني جداً جداً فكرة إن أساس الروايه مخلوقله من الأول أساس قوي و أرضيه صلبه لإن أياً كانت ميول القارئ هيلاقي عمل أدبي مشبع بالنسباله ف الروايه دي.
-تقديم الشخصيات حلو جداً و أفضلهم من وجهة نظري شخصية كمال إلى تطورت بشكل حلو جداً مع الأحداث.
-و السرد و التعليق كانوا باللغه الفصحى و دي حاجه بسطتني جداً و خلتني أقدر أخد شوية quotes  محترمين😂.
-كان فيها شويه أخطاء إملائيه بسيطه لكنها مدايقتنيش و أنا بقرأ و إجمالاً مميزات الروايه كانت قادره بجداره تخليني أتغاضي عن ده.
-النهايه كانت صادمه و غير متوقعه بالنسبالي مع إني كنت مراهنه نفسي من قبل النهايه ب 3 فصول مثلاً إني فاهمه كل حاجه بس طلعت غلطانه الحقيقه😂

حبيت الروايه جداً جداً و إتمنيت إني مكونش قريتها لأخرها عشان أكرر التجربه بنفس الإستمتاع بس أكيد هستني الروايه الجايه و هكون من أول الناس إلى تجيبها إن شاء الله❤️
شابوه بجد يا خيري👏♥️

[Ahmed Hesham · Rating 5 out of 5]

🌸❤

[ياسمين قنديل · Rating 3 out of 5]

#ريفيو
#رواية_الحى_التاسع
الكاتب : محمد خيرى
صادرة عن دار ابداع للترجمة و النشر و التوزيع
التصنيف: إثارة و تشويق ، و هنقول عن الجزء ده ملحوظة ف الاخر
عدد الصفحات : ١٦٨

نبذة:
ذات صباح، يدقُ باب منزل عالم الآثار المُتقاعد "كمال زيدان" زائرٌ غريب يرغبُ في شراء منزلٍ في الحي التاسع، في نفس الوقت الذي يتقدم فيه الدكتور مروان بأوراق رسالة الدكتوراه والتي يُناقش فيها الأمراض الانتكاسية.
بعد أيام من الزيارات غير المُبررة يكتشف "كمال" حيلة الزائر، ويقرر خوض صراع مجهول من أجل الحفاظ على سرٍّ ما أخفاه هو منذ سنين، في حين يصل "الدكتور مروان" إلي خيوط الحالة المَرَضيَّة، بعد أن يجد عاملاً خطيرًا يسوقه في نهاية الأمر إلى بيتٍ ما في الحي التاسع. 

نيجى بقا للايجابيات :

١- رسم الشخصيات كان هايل و خاصة كمال زيدان رجل الآثار الغامض الرزين و دماغه العالية و الدكتور مروان الشخصية الفضولية .. هنا الكاتب درس كويس ظروف المرض اللى المفروض بيكون موضوع رسالة الدكتور مروان و دمجه بشكل ممتاز فى الحبكة بحيث فهّم القارىء ملابسات المرض حتى لو اول مرة تسمع عنه❤❤

٢- الاسلوب كان سهل و راقى فى نفس الوقت و بيرغمك انك تكمل و ماتسيبش الرواية ، كان التشويق من بداية الرواية عالى انك مش عارف ايه اللى ممكن يربط عالم آثار بدكتور زى مروان بيعمل دكتوراة فى مرض باركنسون و ايه سر تردد مروان على بيت كمال فى الحى التاسع.🤔

و استخدام أسلوب الراوى المتعدد بين كمال و مروان مافيهوش أى لغبطة بالعكس كان ممتع جدا.👌

٣- اللغة:
السرد : كان فصحى هايل و الكاتب كان موفق فى انتقاء جمل تعبيرية ممتازة 👌 يخليك مستمتع بالعمل اللى بتقرأه 🤗

الحوار : كان عامية و كنت مبسوطة بيه جدا حوار فى منتهى الذكاء بين اتنين بيشملهم الغموض و الدهاء، لك أن تتخيل . 😌
التناغم بين السرد الفصحى و الحوار العامى كان جميل جدا و و بيجسد المشهد كأنه واقعى بجد. 😍

٤- وصف الاماكن و التفاصيل الصغيرة كان بيضيف لمسة خاصة الرواية بتعيشك ف مود مختلف .👏

نيجى بقا للسلبيات :

١- و دى ضايقتنى جداااا ، الرواية مشوقة جداااا من البداية ، ليه بقا النهاية تتكروت بالشكل ده😬 و تبقى بالسذاجة دى يعنى كنا متخيلين حاجة أكبر بكتير من كده . 🙄

٢- إسهاب الكاتب فى وصف المشاهد الخارجة و جسد المرأة كان مش حاجة حلوة و مالوش ضرورة درامية😳😳

آخر حاجة بقا ان الرواية دى كانت فايزة بمسابقة دار ابداع للرعب والفانتازيا ، الرواية اصلا مالهاش علاقة بالرعب زى ما قولت فوق اثارة و تشويق .

حاجة كمان جديرة بالذكر ، تصميم الغلاف عجبنى جداااا و كان بيمثل حالة الرواية بالظبط و كان من أكتر الحاجات اللى جذبتنى انى اشترى الرواية ، شكر خاص للمصمم أحمد فهمى .

#ياسمين_قنديل

[Abdulrahman Raslan · Rating 2 out of 5]

الحقيقة ان الرواية خيبت توقعاتي، خيبت توقعاتي جدا كمان، البداية كانت بتبشر لرواية مثيرة لكن تدريجيا التشويق و الإثارة اختفوا، النهاية اتحرقت من نص الرواية تقريبا، أنا بصراحة كنت رايح معرض الكتاب و الرواية دي كانت أول حاجه بدور عليها، الرواية أقل بكتير من القصص اللي كتبتها و نزلتها على الفيسبوك، النهاية مستفزة بالنسبالي، يعني أقعد أقرأ كل ده عشان النهاية دي؟ الجميل إن هي أول عمل ليك و اللغة كويسة و جميلة، في بعض الأخطاء بس قليلة، إن شاء الله في معرض الكتاب الجاي هتكون روايتك أقوى.

[Dareen Ahmed · Rating 5 out of 5]

كاتب من الكتاب المبدعين بجد

[Khaled Mohamed · Rating 3 out of 5]

الفكرة لطيفة وجديدة
مناقشة مرض باركنسون
الاسلوب حلو وسهل
بس في سطحية فالاحداث واغلبها او كلها متوقعة جدا
رغم بدايتها كانت حلوة وجميلة بس مع الوقت كانت ساذجة
مفهمتش هل الدكتور كان دارس للحالة ولة نصاب 🤔
وكذلك اللغة ودة اعيب فيها عالمدقق اللغوي اخطاء كارثية
غير باة دار النشر اللي الحقيقة نرفزتني جدا بصفحتين لئيتهم ابيض مفهمش غير حرفين بالعدد من اول كل سطر وبقيته مفيش
طاب راجعو ياجماعة الطباعات واللغة
كأول رواية لخيري حلوة وخصوصا اني متابعه عاليوتيوب واسلوبه فعلا بيتطور وعنده افكار حلوة جدا

[Sara]

ذات صباح، يدقُ باب منزل عالم الآثار المُتقاعد "كمال زيدان" زائرٌ غريب يرغبُ في شراء منزلٍ في الحي التاسع، في نفس الوقت الذي يتقدم فيه الدكتور مروان بأوراق رسالة الدكتوراه والتي يُناقش فيها الأمراض الانتكاسية.
بعد أيام من الزيارات غير المُبررة يكتشف "كمال" حيلة الزائر، ويقرر خوض صراع مجهول من أجل الحفاظ على سرٍّ ما أخفاه هو منذ سنين، في حين يصل "الدكتور مروان" إلي خيوط الحالة المَرَضيَّة، بعد أن يجد عاملاً خطيرًا يسوقه في نهاية الأمر إلى بيتٍ ما في الحي التاسع

[Nourhan Amr]

انا نادرا اوي ما بكتب تعليق بس حقيقي من بشاعة القصه ، قلت لازم اكتب لاني حقيقي اتاذيت جدا في قرايتها و انا اساسا لما اشتريتها كان هدفي اشجع الكتاب الشباب بس كان اسوأ قرار.
كمية الإباحيه و السفاله الي في القصه مش طبيعيه لدرجة اني مقدرتش اقرأ اخر كام صفحه رغم اني استحملت القصه كلها يعتبر.
هو بجد ازاي مفيش رقابه كده!!
كاتب فيلم اباحي !! طيب كنت اكتب على القصه تنويه بدل ما الواحد يتقرف و ياخد سيئات و هو متغفل كده.
حقيقي شيء مؤسف و مقرف جدا.

[YUMNA]

11211221212122121221212121

[Ahmed Eslam · Rating 5 out of 5]

This is amazing story