الشاهنامة الجزء الأول

by أبو القاسم الفردوسي, الفتح بن علي البنداري (مترجم), عبد الوهاب عزام (محقق)

497 pages, Unknown Binding

Published January 1, 1993

Reviews

[Tawfek · Rating 5 out of 5]

أولاً باب في مديح د.عبد الوهاب عزام
بسهولة جدًا ممكن نتوقع أن دكتور عبد الوهاب عزام أحسن محقق ممكن تقرأله كتاب انت هنا مش بتقرأ الشاهنامة و أخبار ملوكها الأسطورية فقط
و لكن كمان بتقرأ المصادر الدينية و التاريخية عن نفس الملوك من كتب تانية كتير بيذكرها دكتور عبد الوهاب عزام زي الأفستا الكتاب المقدس للديانة الزرادشتية و تاريخ الطبري و كتاب البلدان للهمذاني و كتاب الغرر و أوراق أسيوية و فارس نامه و غيرهم كتير من الكتب الراجل ملم بكل حاجة هو بيكتب عنها بطريقة فظيعة غير انه مكتفاش بتحقيق الشاهنامة نفسها من النسخة اللي شاف انها أكمل نسخة فقط و لكنه كان بيقرأ الخمس نسخ اللي كانوا في ايده طول الوقت و بيشير للاختلافات في بعض الكلمات بسبب النقل و ساعات بيصحح كلام النسخة نفسها من نسخ تانية لأن المعني فيها كان هو الصح فنسخته بالفعل هي أكمل نسخة للشاهنامة و لن تحتاج لقراءة غيرها
ده غير انه ترجم حاجات كتير و ذكر باختصار حاجات كتير تانية لم تترجم من قبل و حطهم في مواضعهم من الكتاب
الحقيقة راجل عبقري ربنا يجعل كل ده في ميزان حسناته مقدمته للشاهنامة جميلة جدًا فتحت عليا فتوحة كتب عايز أشتريها في أقرب فرصة
بالذات ملحمة الراميانا و ملحمة الماهابهاراتا و أتمني جديًا ان في يوم من الأيام تترجم بقيت سير الفرس الشعبية اللي طلعت بعض الشاهنامة علي شاكلتها
ثانيًا و قبل ما اتكلم عن الشاهنامة و أبوابها بالتفصيل و إنطباعي عنهم أحب أتكلم عن ماهية الشاهنامة و تصنيفها
زي أي تاريخ قديم الشاهنامة مليانة بالأساطير و لكن أسلوب الشاهنامة ببساطة شديدة هو نفسه أسلوب السير الشعبية
هي ملحمة شعرية علي ثيمة السير الشعبية و تم ترجمتها بأسلوب السير الشعبية
بالنسبة لتاريخ الشاهنامة دكتور عبد الوهاب عزام و هوامشه و مقدماته بتساعد كتير تدي أقرب رؤية تاريخية لملوك الشاهنامة و أقرب رؤية دينية لأن أغلبهم ذكروا في كتاب الأبستاق (الأفستا) فهم مش مجرد ملوك تاريخيين الطبري نفسه اتكلم عنهم و حاول يوفق بين تاريخهم و بين تاريخ الرسل و لكن هما كمان رموز دينية لأهل فارس و الشاهنامة نفسها ببساطة شديدة بالنسبة لهم عاملة زي كتاب مقدس بسبب حبهم الشديد ليها ممكن نقول مكانة الشاهنامة عندهم زي مكانة ألف ليلة و ليلة عندنا مع الأفضلية كملحمة شعرية قوية للشاهنامة طبعًا محتاجه نظم و مجهود سنين
ثالثًا أحب أتكلم عن الفردوسي ناظم الشاهنامة بإستثناء ألف بيت اللي نظمهم الدقيقي و اللي كان أهم شاعر قبل ما يظهر الفردوسي و يخسف نجم كل شاعر قبله
الفردوسي نظم الشاهنامة من كتاب كان مشهور وقتها عن تاريخ ملوك فارس و كان نيته من نظمها انه يقدمها لملك من الملوك و يعيش من الدخل اللي هيجيله من نظمها و بعد ما يخلصها تجيله مكافئة كبيرة من الملك يبني بيها سد و يعيش بيها بقيت حياته في رخاء
و للأسف لم تحقق أمنية الفردوسي لأن الملك و هو محمود بن سبكتكين ملك الدولة الغزنوية في عصر الخلافة العباسية بخل علي الفردوسي و لم يعطه حقه بعد ما أنجزها
الفردوسي كان مدرك دايمًا و هو بينظم الشاهنامة انها هتعيش لألاف السنين و الناس هتفتكر اسمه بسببها الي أبد الآبدين

كل بناء يناله الدمار ، بوهج للشمس و سيل الأمطار
و لكني وطدت قصرا عظيم الخطر ، يهزأ بعصفات الريح و المطر
تمر علي هذا الكتاب السنين ، و يتلوه كل حكيم فطين

و كمان ننتهي من نقطة أخيرة و هي ترجمة الشاهنامة كانت في عصرالدولة الأيوبية و أمر بترجمتها الملك المعظم عيسي بن العادل ده صلاح الدين الأيوبي كان عمه
رابعًا هنتكلم بقي عن ملوك الشاهنامة و قصصها و انطباعي عنهم لو لسه حاضر في الذاكرة لاني قرأت ال 500 صفحة دول صحيح بتركيز و لكن في 35 يوم تقريبًا من ضمنهم أيام كتير مقرأتش فيها اصلًا
الشاهنامة بتبدأ بأسطورة بدء الخليقة الفارسية و ازاي ان ملوك فارس الأوائل ملوك الدولة البيشدادية كانوا هما بداية العالم و هما اللي اكتشفوا كل الصناعات و اتخذوا الأسلحة و زرعوا و صادوا و لبسوا الجلود و ما الي ذلك من حاجات أساسية في حياة الإنسان الأول
و طول الوقت هتحس و انت بتقرأ الشاهنامة كان فيه تشابه كبير جدًا بين الأساطير الفارسية و الأساطير الدينية السامية اللي احنا عارفينها فيه ملوك شبيهه بنوح و ملوك شبيهه بآدم و غيره و غيره
عندنا مثلًا الملك أفريدون و ازاي ولاد إيرج و سلم و تور و ازاي ان احدهم كان ملك الصين و الآخر كان ملك الروم و الثالث كان ملك الإيرانيين ليس بهذا الترتيب بالتأكيد
و كمان عندنا حكاية مهمة جدًا بتشترك فيها الأساطير الإيرانية و الأساطير العربية لأن شره طال الشعبيين و هو الضحاك و بيتقالنا تاريخ الضحاك الأسطوري بالتفصيل و إزاي الشيطان غواه و ما إلي ذلك
حكاية تانية من الحكايات اللي اكيد هتعلم معاك من الشاهنامة هي أسرة زال بن سام بن ناريمان و أبطالهم العديدين إنتهاءًا لبطل الفرس الأعظم علي الإطلاق رستم اول ما اي ملك هيتزنق في اي حرب اعرف علي طول انه هيستدعي رستم ده طبعًا لحد ما تبدأ الحروب الدينية و يتغير البطل رسميًا لإسفنديار
و عيلة رستم الأبطال بتفكرنا بحاجة مهمة جدًا و هي الكسل اللي بيوصله من ذاع صيتهم و زاد غناهم و عظمت قوتهم في الأساطير و في وقتنا الحالي الحقيقة رستم و عيلته تحس انهم كانوا بيجبوا علي الملوك بخدمتهم
و طبعًا زي ما بطل السيرة الشعبية العربية المشهورة فارس اليمن الملك سيف بن ذي يزن انسي اتربي علي ايد الجن
فرستم اتربي علي جناحات عنقاء

النص الأولاني من المجلد الأول كل الحروب ضد التورانيين اللي هيملكهم أطول فترة الملك أفرسياب قاتل اخوه إغريرث و قاتل الملك نوذر و قتل الملوك في الأسر شئ مشين جدًا زيه زي قتل الأخ و بسبب ده أفرسياب هو الشرير الرئيسي للشاهنامة و اللي الجميع منتظر بفارغ الصبر انه يتحط عليه
هتفكر طب فين رستم و ازاي الإيرانيين يخسروا و رستم رمز الرجولية و الفروسية معاهم لا حضرتك الأمور مش بتمشي كده اي حرب الإيرانيين هيخسروها رستم مش هيبقي ضمنها و اي حرب هيكسبوها يبقي رستم اكيد وصل
رستم عامل زي كارت إكسوديا في لعبة يوغي اول ما ينزل الملعب الخصم بيخسر و انت بتكسب بس بيبقي فيه تفاصيل كتير طبعًا

بتنتهي الدولة البيشدادية و اللي أغلب ملوكها ممكن يكونوا أسطوريين بسبب بعد زمانهم جدًا بعد عشر ملوك
و بتبدأ الدولة الكيانية و دي أغلب ملوكها بيبدأوا بكي كيقباذ كيكاوس كيخسرو و غيره و غيره
هنسيب كيقباذ عشان مش فاكر أحداثه و ندخل علي كيكاوس
كيكاوس ده مجنون مش بيحب يقعد في حاله هو عايز يحارب اي حد و خلاص و الغريب انه بيسيب التورانيين اللي حاطين عليه و بيروح يحارب بلاد مازندان اللي أهلها مشهورين بأنهم جن
و بيتأثر كيكاوس بسبب تهوره و هجومه علي بلاد مازندان و بيوصل خبر لرستم ان الملك أسر و بيروح مازندان بنفسه و بعد ما يعدي سبع أحداث أسطورية من وحوش لساحرات بيوصل مازندان و بيغزوها و بينقذ الملك و بيقتل ملك مازندان و بيرجعوا كلهم سالمين
فكرك كيكاوس هيتعظ هنا ؟
لا طبعًا كيكاوس هيروح يهاجم مملكة هاماوران المؤرخين بيقولوا انها حمير يعني بيهاجم العرب اللي بيكيدوا له و بعد ما بيجوزوه بنتهم الجميلة بيأسروه
و طبعًا رستم بيروح ينقذ الملك مرة تانية و ملك هاماوران بيقدم فروض الطاعة و بيعتذر عن ذنبه
و حدث تاني ينم علي طيش كيكاوس انه بني عربه بأجنحه عشان يطير و يوصل للسماء و الأجنحة ساحت و وقع علي جدور رقبته بس عاش و رستم برضه انقذه
بنقف هنا و بنركز علي رستم شوية لأن الحدث ده هو أكثر حدث مؤثر في الشاهنامة
رستم بيروح لمكان بيصطاد فيه أفرسياب ملك التورانيين الأعداء و بيصطاد و بيعربد هو و اصحابه و أفرسياب بيحاول يردعهم لكن بينهزم و بيرجع خائب الأمل لبلده و بعدها رستم بيروح بلد اسمها سمنجان و الملك بيضيفه و بليل بنت الملك بتخش عليه

واحد سكران طينه و نايم و واحده داخله عليه هي دي الصورة بالظبط اكيد
المهم البنت صحته و قالتله انها عايزة تخلف منه ابن عشان يبقي في قوته و بأسه و هو الحقيقة ما صدق
و كان نتاج اللقاء ده هو سهراب
سهراب كبر و ترعرع و هو عنده 14 سنة اكتشف انه أقوي من كله أقرانه و محدش يقدر يقف قصاده استخبر امه عن أصله و قالتله انه ابن رستم خرج بجيش كبير عشان يحتل بلاد إيران و توران و يقدمهم لابوه هدية و لكن بسبب كيد الكائدين لم يتعرف علي أبوه لما وقف قصاده بجيش و اتقتل سهراب علي إيد رستم و أصيب رستم بحزن عظيم و قتلت أم سهراب نفسها حزنًا علي إبنها
نوصل دلوقتي لشخصية مؤثرة جدًا في نهاية التورانيين و هو سياوخش
سياوخش ابن كيكاوس الجميع بيحبوه و شخصية مثالية جدًا بس مرات أبوه بتقع في عشقه و بتكيد له فبيتم إبعاده عن المملكة و بيروح للتورانيين اللي بيستقبلوه خير إستقبال و بعدها بيغير منه العديدين و بيكيدوا له و بيقتلوه
و دي كانت بداية النهاية للتورانيين
سياوخش قبل ما يموت كان قعد في بلد و بنا فيها قصور و اتجوز بنت ملك توران أفرسياب و البنت كانت حامل و بيران اليد اليمني لأفرسياب بينقذ بنت أفرسياب من بطشه هي و ابنها
و بيترعرع الإبن و بيرجع للإيرانيين و بيقوم بجيش عشان ينتقم لأبوه من جده أفرسياب
و الإبن ده هو الملك كيخسرو
بتحصل حروب كثيرة بين الفريقين الإيراني و التوراني و بيخسر الفريق الإيراني تقريبًا اول تلات حروب دايمًا حطها قاعدة في الأدب القديم لما الفريق اللي الجميع متوقع انه يكسب يخسر تلات مرات ورا بعض يبقي بيجهزوا لفوز حاسم و نهائي علي الفريق التاني اللي هو شوف احنا كنا بنخسر ازاي بس شدينا حيلنا و حطينا عليهم و قضينا عليهم كلهم
و من أهم الحروب دي هي حرب ال 12 رخ و بيموت قواد التورانيين قائد ورا التاني
و بيهرب أفرسياب و بيلاقوه في الآخر في كهف و بيمسكوه و بيقتصوا منه
من أهم قصص الحب في الشاهنامة من رأيي هي قصة بيزن و منيزه اللي حصلت في عهد كيخسرو و فيها بيزن بيكون في بلاد التورانيين بيكيد به صديقه الإيراني بسبب فتوته و شجاعته و بيرشده لأميرة جميلة جدًا و بيدخل عليها بيزن و بيحبوا بعض و مش بيمشي من عندها لحد ما بيتمسك و بيتحبس في بئر علي حمل ثقيل و منيزه معاه طول الوقت ده بترميله اكل من فتحه في البئر و بتبكي عليه لحد ما رستم بيروح ينقذه قصة جميلة جدًا
كيخسرو بسبب انه ملك عادل جدًا و أغلب الملوك بيظلموا لما بتمتد مدتهم عزف عن الحكم و سابه و مسك الدولة للهراسب
لهراسب بيمسك الحكم و بيعتزل لابنه كشتاسب
اللي بيمتاز عهده بانه العهد الديني عهد الديانة الزرادشتية و الفتوحات و نشر الدين الزرادشتي و طبعًا محتاجين حرب أخيرة لإرساء الدين و هتكون برضه مع التورانيين و آخر ملك فيهم اللي اسمه أرجاسب
متضايق جدًا من كشتاسب لان زي ما ابوه سابله الحكم هو امتنع انه يسيب الحكم لابنه إسفنديار بعد ما وعده بالحكم لو انقذ البلاد و أخذ بثأرهم و رد سباياهم من آخر ملك توراني في الجزء ده و هو أرجاسب
مكفاهوش انه ظلم ابنه و حبسه و لجأله وقت ما احتاجه و انقذهم و كان إسفنديار هو البطل الديني في الشاهنامة الموازي لرستم لدرجة ان مكنش ينفع يبقي فيه تفضيل واحد فيهم علي التاني
بعد ما بيمتنع كشتاسب عن إعطاء الحكم لإسفنديار بيوقع بينه و بين رستم لأن رستم امتنع عن خدمة الملوك من وقت لهراسب
و بيروح إسفنديار مضطر لحرب رستم و بيتفوق عليه لكن بمساعدة العنقاء رستم بيرجع و بيهزم إسفنديار
و بتدور الدائرة علي رستم و بيتقتل من ملك كابل
و بكده نهاية عهد أهم بطلين في الشاهنامة رستم و إسنفنديار
الأربع ملوك الجايين فيهم اتنين مهمين جدًا بالنسبة ليا
هماي و دي أول ملكة إيرانية في الشاهنامة و ده حدث لو تعلمون عظيم فكرة ان تكون أنثي علي عرش الملك صعبة جدًا من زمان و مع ذلك قامت بعض النساء بالوصول الي هذا الكرسي و أبلوا بلاء جيدًا و تركوا علامتهم في التاريخ حتي لو كان الأمر عن طريق الخديعة الا انهم خلدوا
هماي عشان تستقل بالحكم وضعت ابنها داراب في النهر و سابته يروح لصاحب نصيبه و قالت للجميع انه مات و استقلت بحكم المملكة لحد عودة داراب مرة أخري و تركها للحكم له
و الملك التاني المهم بالنسبة ليا هو آخر ملك في الجزء ده من الشاهنامة و هو دارا
دارا هو الملك اللي حارب الإسكندر في العديد من الوقائع و اللي الإسكندر هزمه و اللي قواده إغتالوه عشان يعلنوا نفسهم حكام
و للاسف حتي تاريخ الإسكندر المذكور في الشاهنامة مش صحيح تاريخيًا
بس فيه جزئية مهمة الإسكندر نفسه يدفع فلوس عشان تتكتب و هو خلط نسب الإسكندر و أصله بنسب أهل فارس لانه كان عايز جميع الشعوب تعرفه كواحد منهم و بنشوف في الشاهنامة انها خلت أصل الإسكندر هو الملك داراب أبو دارا يعني خلوا الملكين اخوات !!!
ملحمة رائعة طولت عليكم و حكيتلكم كاننا قاعدين علي مسطبة بس يللا تجربة جديدة في كتابة الريفيو و خلاص <3.

[وسام عبده · Rating 5 out of 5]

لا يزال القسم الأول من الشاهنامه القسم الأقرب إلى قلبي، الرواية الفارسية الأسطورية عن نشأة العالم، والصراع بين الضحاك وملوك الفرس، ثم صعود نجم أفريدون الذي استلزم قتله الضحاك؛ ثم تقسيم أفريدون للعالم بين أبناءه الثلاثة، تلك القسمة التي سوف تؤدي إلى إندلاع الحرب بينهم، الحرب التي ترمز للصراع بين الفرس وجيرانهم الطورانيين والرومان.
كانت الشاهنامه من اوائل ما قرأت في شبابي، والآن أعيد قراءتها، بل ربما استكشافها.

[Gehad El-Walily · Rating 5 out of 5]

كتاب رائع ... تحتاج لتصفية عقلك قبل وأثناء القراءة حتى تستمتع بما تقرأ
لا يمكنك قرائته على عجل أو بأسلوب القراءة السريعة ، نظراً اترابط موضوعاته ببعضها البعض
أزعم أني قرأته أكثر من مرة