Uit die bloute

by Chanette Paul

Jojo Richter moet ondersoek instel na ʼn groep wat wag vir ʼn moederskip van die Pleiade-sterrestelsel. Hou die groep verband met die sluipskutmoord op die regter? En dalk met die verdwyning van ʼn klompie fris, jong mans ook?

575 pages, Kindle Edition

Published April 23, 2018

About the author

Chanette Paul word rond en bont groot. Sy woon nege skole by, studeer aan vyf universiteite en het al in sewe provinsies gebly. Haar eerste verhaal waarvoor sy betaling ontvang het, is ‘n sprokie wat sy op sestienjarige ouderdom geskryf het en op Siembamba voorgelees is. Die tweede, ‘n kortverhaal, is in haar universiteitsjare in Huisgenoot gepubliseer.
Eers twintig jaar later, in 1995, gee sy weer aandag aan haar skryfwerk. Sedertdien het ‘n verskeidenheid verhale en humoristiese artikels in tydskrifte verskyn asook in die omgewing van 50 boeke in verskillende genres.

Reviews

[Madri · Rating 4 out of 5]

Hierdie boek gaan jy binne 'n dag of wat kafdraf. Karakters wat so menslik is dat jy verwag om hulle iewers in die Hermanus omgewing raak te loop. Vreemde verskynsels en verdraaide feite, spanning, speurtogte, suspisie - alles dra by tot 'n storie wat die leser in een sitting wil klaarmaak.

[Anne-Marie · Rating 5 out of 5]

Chanette Paul stel NOOIT teleur nie. Uit die Bloute het weliswaar 'n vreemde tema, maar Paul het haar feite goed nagevors en die uiteindelike les aan mense om swendelaars te kan uitken en nie meegevoer te raak met fanatici nie, kom baie duidelik deur in die verhaal.

*spoiler alert* *spoiler alert*

Dit was so lekker om weer saam met Jojo te kuier en ek hoop hierdie is nie die laaste sien van haar en Joachim nie - en dankie tog dat sy uiteindelik oor haarself gekom het en sy en Joachim mekaar gevind het in alle opsigte :-)

Chanette Paul is een van my gunsteling skrywers en ek is altyd traag om 'n boek van haar te begin lees, want ek weet ek gaan dit nie kan neersit nie, en dan is die lekkerte sommer gou verby en moet ek lank wag vir die volgende een!

[Amanda · Rating 5 out of 5]

Net toe ek dink dat Chanette Paul nou omtrent elke vreemde onderwerp getakel het en in haar stories verweef het, pluk sy uit die bloute 'n nuwe haas uit die hoed, of liewer, uit die lug, met die omstrede kwessies van vreemde vlieënde voorwerpe, van alien planete en van ’n gemeenskap wat wag vir die moederskip om hulle te kom haal. Drie uiteenlopende karaktertipes wat in die storielyn ingespan word, het my opgeval: eerstens, mense is uiters beïnvloedbaar en sal ’n sterk leier slaafs navolg. Om die skrywer se woorde te gebruik: "omdat selfs die ongeloofbare geloofwaardig word as dit is waarvan jou en jou kinders se oorlewing afhang." Dan is daar gewetenlose mense wat ander blatant sal uitbuit en selfs elimineer vir eie gewin. Derdens is daar diegene wat nooit sal kompromie maak nie, selfs nie in die gesig van die dood nie. Hierdie elemente gee aan die verhaal substansie, te midde van die debateerbare onderwerpe soos VVV's en grafologie. Dit was heerlik om ou bekendes, en by uitstek die interessante Jojo weer te beleef, en oor Joachim is ek erg. Dit is nou ’n ordentlike man. Dalk is ek bevooroordeeld, omdat ons aan dieselfde kant van sestig is. Die skrywer het weereens beïndruk met die akkuraatheid waarmee soveel detail hanteer is; vir elke raaisel was daar uiteindelik ’n oplossing aangebied en al die los drade netjies vasgeknoop. Dit is ’n lywige boek, maar beslis die leesure deur en deur werd.

[Karin Behrens · Rating 4 out of 5]

‘n Nuwe Chanette-Paul boek is iets waarna al haar lojale lesers uitsien. In so ‘n mate dat lesers na die verskyning van elke boek vra: “Wanneer kom die volgende een?” Ek voorspel dat Uit die bloute geen uitsondering gaan wees nie.

Jojo Richter is terug en saam met haar twee ewe sterk vroulike karakters. Irene Richter is Jojo se eks se nuwe vrou wat saam met Valk privaat speurders is. Dan is daar die handskrifdeskundige Ayla Hurter wat Jojo en Irene in hulle ondersoek bystaan. Vir my is dit verblydend dat die vrouekarakters nie die tradisionele perfekte heldinne is nie.

Alhoewel die tema, Vreemde Vlieënde Voorwerpe ietwat ongewoon is, is dit ‘n interessante storielyn. Saam met al die intrige, spannings, moorde en goeie dialoog sorg dit vir ‘n boek wat moeilik neergesit gaan word. Boonop word feit en fiksie so verweef dat die leser later nie meer kan onderskei tussen waar en wolhaar nie. Daar is heelwat karakters maar die karakterlys maak dit maklik vir die leser om die storielyn te volg.

[Lelani · Rating 4 out of 5]

In 'Uit die bloute' maak Jo-Jo weer 'n draai in Bientangsbaai. Dié keer om Irene te help soek na haar suster, Diana. Diana het betrokke geraak by 'n groep wat vas glo in VVV's en dat die moederskip hulle binnekort kom haal.
Ayla Hurter, 'n grafoloog, sal wat wil gee om haar grootwordjare te vergeet, maar Irene krap alles van voor af oop met die brief wat sy ge-annaliseer wil hê. Na aanleiding van die brief voel Ayla dis haar plig om haar suster op te spoor wat deel is van die groep waar Diana haarself bevind.

Die lekkerte van 'Uit die bloute' was dat dit so te sê aangaan waar 'Paaiboelie' geëindig het en is propvol intrige. Jo-Jo is in twee oor haar verhouding met Joachim en Irene en Valk is ook nie lekker met mekaar oor die geheime wat sy weerhou van hom nie. Chanette skep 'n goedgeweefde en goed nagevorsde prentjie van VVV-voorvalle in Suid-Afrika so by so dat jy self nie anders kan as om te wonder nie.

'Uit die bloute" is 'n lekker spanningsvolle verhaal en so af-en-toe duik ou bekende karakters weer op om dinge interessant te hou terwyl die tyd al hoe vinniger uitloop wat die moederskip gaan arriveer...
Hierdie is beslis 'n moet-lees!

[Nenette de Lange · Rating 5 out of 5]

O my vrek, WAT ‘N BOEK. Hierdie is ‘n boek wat jy mee moet gaan wegkruip waar niemand jou kan pla nie. Want neersit, is daar geen sprake nie. Ek het soms selfs gewonder of daar nie wel UFO’s is nie. Maar wat ‘n draai in die storie!! Net sodra jy dink jy weet nou wat volgende gaan gebeur, gebeur iets wat jy net nooit sou verwag het nie. Alles, het ‘n storie wat van ver langs kom en sy eindpunt op die plot met die piering geboue kom stop. Mense wat hulle lewe voorberei vir die einde wanneer hulle kom haal word. Dan, die mans wat gereeld wegraak uit die samelewe en dan na ‘n paar jaar, dood gevind word. En wat het die moord van die regter met alles uit te maak. Doodgeskiet met ‘n pyl en boog. Drie keer. Dan kom Irene na Ayla toe met ‘n brief wat deur haar suster geskryf is. ‘N brief wat wys sy sal doodmaak en nie eens sleg voel daaroor nie. Maar Irene se suster, is Ayla se suster se boesemvriendin. Wie van die twee is gebreinspoel. Hoe kan hulle sulke onsin kwytraak. Of is dit onsin. Ek wil nie te veel vertel nie, want net nou laat ek die kat uit die sak en hierdie boek is ‘n absolute MOET om te lees.
Chanette, hierdie is nie net “welgedaan” nie. Hierdie boek was onbeskryflik!!

[Marnich · Rating 5 out of 5]

Weereens stel Chanette nie teleur nie.

[Sanri Van der Walt · Rating 5 out of 5]

Nog ‘n fantastiese boek uit Chanette Paul se pen. Hier ontmoet ons talle karakters uit vorige boeke weer.

Hierdie boek was boeiend tot die laaste bladsy. Chanette se karakters lewe.

Ek sien uit na die volgende boek!

[Magda Fourie Stegmann · Rating 5 out of 5]

Wonderlik!

[Sariethia · Rating 5 out of 5]

heerlik gelees