ما وراء الأفيش: القصة الحقيقية وراء أهم الأفلام السينمائية في التاريخ

by منال عبد الحميد

يا ترى الأفلام اللي بنحبها مرّت بإيه عشان تطلع للنور؟
أفلام شهيرة كتير كواليسها خبّت أسرار مشوقة، مثيرة، وأحيانًا مظلمة، ودار المصري للنشر والتوزيع بتكشفها لك في كتابها الجديد، اللي هتتفاجئ أنه بيعرض لك جرائم حقيقية، ملفات غامضة، وحوادث مرعبة، وكل دة… مستخبي ورا الأفيش.
“كان من الممكن اعتبار الأمر برمته نوعًا من الشائعات المضحكة، خاصة وأن مشاهد السحر والتعزيم نادرة جدًّا في السينما المصرية والعربية، لكن حادث وفاة “الحسيني” نفسه، والذي وقع في عام 2003م، في مكتبه الفاخر، إذ كان يعد ساحر الصفوة، لكنه حين تأخر في العودة إلى منزله، ذهب أقاربه لتفقده في المكتب، لكنهم عجزوا عن اقتحام الغرفة الخاصة به، مما دعاهم إلى طلب الشرطة، التي جاءت لتكسر باب الغرفة بصعوبة، وفي الداخل عثروا على المشعوذ المعروف ملقى على الأرض، وتبدو على وجهه علامات الرعب الشديد، وقيل إنهم وجدوا حوله طلاسم وأدوات تستخدم في السحر الأسود، ويقال أيضًا إن عينيه ظلَّتا تحدقان برعب، ولم تستجيبا لمحاولة إغلاقهما بكل الطرق، بل حتى في لحظات الغسل والتكفين، بقيت العينان مفتوحتين على اتساعهما، وهذا يفسره بعضهم بأنه رأى، لحظة موته، شيئًا مرعبًا للغاية!”.

173 pages

First published January 1, 2026

Reviews

[Mina Habib · Rating 2 out of 5]

* في البداية لازم أعترف إني ماخترتش الكتاب ده بعناية وتركيز، و لكن كان اختيارمبني على أسس بسيطة جداً: عاوز أقرأ كتاب مش تقيل و مش صعب و مش محتاج تركيز و مجهود ولكن في نفس الوقت يبقى في موضوع لطيف وفئة لطيفة. و الصراحة عنوان الكتاب شدني و أنا بتصفح عناوين الكتب على تطبيق أبجد، ولكن للوضوح بردو إن قلة العناية وقلة التركيز خلوني أبص على العنوان الكبير فقط "ما وراء الأفيش" و ما اهتمتش أكمل العنوان الفرعي بتاع الكتاب. كتاب عن السينما والأفلام و يمكن كنت بأمني نفسي بكتاب يتكلم عن العلاقة ما بين أفلام معينة أو تصنيفات معينة من الأفلام و بين الأفيش بتاع الفيلم و تصميمه، سواء من حيث التكوينات أو من حيث الألوان، ولكن الحقيقة العنوان الفرعي، اللي ما أخدتش بالي منه، كان بيحمل حقيقة الكتاب، اللي بتهدم الخيلات والأحلام اللي في دماغي من أساسها.

* فيما يخص الكتاب نفسه بقى، فوجب التنويه إن أغلب الأفلام المذكورة في الكتاب هي أفلام قديمة جداً، و الصراحة أنا ما أعرفش مدى شهرة هذه الأفلام و هل هي فعلاً مهمة أو علامات فارقة في تاريخ السينما زي ما الكاتبة بتدعي ولا هي مجرد مجموعة من الأفلام العادية أو الفوق متوسطة و كل اللي بيجمعها إنها بتخدم الفكرة اللي الكاتبة عاوزة تطرحها في الكتاب؟!

* الكاتبة مقدمة خليط بين مجموعة من الأفلام العالمية و بالذات الأمريكية، وبين بين مجموعة من الأفلام العربية بالأخص المصرية، مع وجود فيلم فرنسي في الفصل الأخير.

* الأفلام اللي الكاتبة اختارت تتكلم عنها كانت مترتبة بشكل عشوائي جداً، يعني لا تم تصنيفهم بناء على اللغة الناطقة للفيلم، ولا تم تصنيفهم بناء على نوع الحبكة ولا على العمل اللي تم الاقتباس منه، الترتيب كان عشوائي و من غير أي فكرة وراه.

* طبعاً مش هنكر إني كنت محبط شوية من الكتاب لأنه ما أدنيش اللي أنا تحمست له وكنت متوقعه أو بمعنى أصح بتمناه، ولكن الغلطة دي عندي أنا لأن أنا اللي تجاهلت العنوان الفرعي اللي كان تقريباً قايل كل حاجة عن الكتاب وإيه اللي ممكن نتوقعه منه .. بس أنا اللي ما قرأتش، في الوقت نفسه ما أقدرش أنكر إن الكتاب قدم لي مجموعة من الترشيحات سواء لأفلام سينمائية أو لأعمال أدبية من القصص اللي بتتقال عنها فهي مثيرة للاهتمام و ممكن أفكر في مشاهدة وقراءة بعض من هذه الأعمال.

* قراءة الكتاب كانت سهلة و بسيطة، ما فيش لغة معقدة أو صعبة و ده كان متماشي مع الجو العام للكتاب والموضوع اللي بيناقشه. و بالرغم من إن الكتاب ما يعتبرش من كتبي المفضلة، إلا إن قرائته كانت سهلة و لذيذة، يمكن الكتاب كان محبط بالنسبة لي لأني مالقيتش اللي في خيالي و لكن ده ما يخليهوش كتاب وحش أو سيء، ولكنه ببساطة غير مناسب للتخيلات بتاعتي، واللي هو نفسه لم يعد بتقديمها.